അതിദരിദ്രരില്ലാത്ത കേരളത്തിൽ... അംബുജാക്ഷന് താങ്ങായി ഡോക്ടർ രവീന്ദ്രൻ നായർ.

വികസനം: താഴെത്തട്ടിൽ നിന്നുള്ള തിരുത്ത്

അംബുജാക്ഷന്റെ അനുഭവം വിരൽചൂണ്ടുന്നത് പ്രാദേശിക ഭരണകൂടത്തിന്റെ ഉത്തരവാദിത്തത്തിലേക്കും പദ്ധതി നടത്തിപ്പിലെ പാളിച്ചകളിലേക്കുമാണ്. കേന്ദ്രീകൃതമായ പദ്ധതികൾ താഴെത്തട്ടിലെത്തിക്കേണ്ടത് വാർഡ് മെമ്പർമാരാണ്. എന്നാൽ, പലപ്പോഴും ഭരണസമിതിയുടെ മുൻഗണനകൾ ജനങ്ങളുടെ യഥാർത്ഥ ആവശ്യങ്ങളിൽ നിന്ന് വ്യതിചലിക്കുന്നു.

തിരഞ്ഞെടുപ്പിലെ ജാഗ്രത പ്രധാനം

സമീപകാലത്ത് നടക്കാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പിൽ ജാതി-മതം-രാഷ്ട്രീയം എന്നിവയ്ക്ക് അപ്പുറം, സ്വന്തം വാർഡിലെ ജനങ്ങളുടെ നന്മയ്ക്കായി പ്രവർത്തിക്കുമെന്ന് ഉറപ്പുള്ള, വിദ്യാസമ്പന്നരും കാര്യശേഷിയുള്ളവരുമായ നല്ല മനുഷ്യരെ തിരഞ്ഞെടുക്കാൻ വോട്ടർമാർ ജാഗ്രത പുലർത്തണം.

  "തിരഞ്ഞെടുപ്പ് പ്രഖ്യാപിച്ച ശേഷം കാണിക്കുന്ന സ്നേഹമല്ല മാനദണ്ഡം. വോട്ടവകാശം വിനിയോഗിക്കുന്നവർ യജമാനന്മാരാവുകയും, തിരഞ്ഞെടുക്കപ്പെടുന്നവർ ജനസേവകരാവുകയും ചെയ്യുമ്പോളാണ് ജനാധിപത്യം വിജയിക്കുന്നത്. അടുത്ത അഞ്ചുവർഷം അടിമകളും യജമാനന്മാരുമായി നാടുവാഴാതിരിക്കാൻ, വിദ്യാഭ്യാസവും വിവേകവുമുള്ള തലമുറകളെ അധികാരം ഏൽപ്പിക്കണം."

വേണ്ടത് പൊതുജന ഓഡിറ്റിംഗ്

  പാവപ്പെട്ടവർക്ക് വീട് വയ്ക്കാൻ 4 ലക്ഷം രൂപ നൽകുമ്പോൾ, ലക്ഷങ്ങൾ മുടക്കി വിളക്കുമരങ്ങൾ സ്ഥാപിക്കുന്നതിലും, ആർക്കും ഉപകാരമില്ലാത്ത ആധുനിക ബസ് സ്റ്റോപ്പുകൾ നിർമ്മിക്കുന്നതിലും, സ്കൂളുകൾക്കും സർക്കാർ സ്ഥാപനങ്ങൾക്കും മുന്നിൽ കൂറ്റൻ കവാടങ്ങൾ പണിയുന്നതിലും ഉള്ള 'രഹസ്യങ്ങൾ' പൊതുജനങ്ങൾക്ക് മനസ്സിലാകില്ല. ഈ ഫണ്ട് വിനിയോഗങ്ങളെ സോഷ്യൽ ഓഡിറ്റിംഗിന് വിധേയമാക്കാനുള്ള സംവിധാനം ഉണ്ടാകണം.

മാസത്തിൽ ലഭിക്കുന്ന ഓണറേറിയത്തിനു വേണ്ടിയുള്ള മത്സരമായി ഇത് ചുരുങ്ങാതിരിക്കാൻ, കാലഘട്ടത്തിനനുസരിച്ച് ജനപ്രതിനിധികളുടെ ഓണറേറിയം വർധിപ്പിക്കേണ്ടതും അനിവാര്യമാണ്.

  അംബുജാക്ഷന്റെ കാര്യത്തിൽ ഡോക്ടർ രവീന്ദ്രൻ നായർ ചെയ്തത് ഒരു വ്യക്തിപരമായ സഹായമാണ്. എന്നാൽ, ഇത് ഒരു മാതൃകയാക്കി, പദ്ധതികളുടെ പിഴവുകൾ തിരുത്തി, അതിദരിദ്രർ ഇല്ലാത്ത കേരളം എന്ന പ്രഖ്യാപനം യാഥാർത്ഥ്യമാക്കാൻ താഴെത്തട്ടിലെ ഭരണകൂടങ്ങൾ പ്രവർത്തിക്കേണ്ടതുണ്ട്.

 "വാർത്തകളിലും പ്രഖ്യാപനങ്ങളിലും മാത്രമായി മാറാനുള്ളതല്ല അതിദരിദ്രർ ഇല്ലാത്ത സംസ്ഥാനം. ഇതുപോലുള്ള ജനങ്ങളെ കണ്ടെത്തി അവരുടെ പ്രാഥമിക ആവശ്യങ്ങളായ പാർപ്പിടവും, ഭക്ഷണവും, ആരോഗ്യ സംരക്ഷണവും ഉറപ്പാക്കേണ്ടത് ഏറ്റവും താഴെ തട്ടിലെ പ്രവർത്തകരായ വാർഡ് മെമ്പർമാരുടെ ഉത്തരവാദിത്തമാണ്."

  ബിജു കാരക്കോണം.