വോട്ട് ചെയ്യാൻ മാത്രം ചുമന്നാൽ പോരാ- വൃദ്ധരും മനുഷ്യരാണ്; വയവന്ദന വഴി തുറക്കണം.

 വോട്ട് ചെയ്യാൻ മാത്രം

ചുമന്നാൽ പോരാ-

വൃദ്ധരും മനുഷ്യരാണ്;

വയവന്ദന വഴി തുറക്കണം.

:ദിവാകരൻ ചോമ്പാല 

തിരഞ്ഞെടുപ്പ് കാലമായാൽ കിടക്കപ്പായയിൽ വയ്യാതെ കിടക്കുന്ന രോഗികളായ വയോജനങ്ങളെവരെ  വാരിയെടുത്ത് കസേരയിലുരുത്തി

യും തോളിൽ ചുമന്നും വോട്ട് ചെയ്യാൻ അഥവാ വോട്ടുചെയ്യിക്കാൻ പോ

ളിംഗ് ബൂത്തികളിലേക്കെത്തിക്കുന്ന 'പരോപകാരികൾ' രംഗത്തെത്താൻ ഇനി ഏതാനും ദിവസങ്ങൾമാത്രം .......

ജനാധിപത്യ പ്രക്രിയയിൽ, പ്രായമായവരും രോഗികളുമായ പൗരന്മാരെപ്പോലും പോളിങ് ബൂത്തുകളിലെത്തിക്കാൻ രാഷ്ട്രീയ കക്ഷികൾ പ്രകടിപ്പിക്കുന്ന ഉത്സാഹം ശ്രദ്ധേയമാണ്. 

എന്നാൽ, ആ വോട്ട് രേഖപ്പെടുത്തിക്കഴിഞ്ഞാൽ, അതേ ദുർബലരായ വൃദ്ധന്മാർ തുടർന്നും ജീവിക്കാൻ അർഹിക്കുന്ന ഏറ്റവും അടിസ്ഥാനപ രമായഅവകാശമായ ആരോഗ്യ സുരക്ഷയുടെ കാര്യത്തിൽ സർക്കാരുകൾ മുഖം തിരിക്കുന്നത് പ്രതിഷേധാർഹമാണ് ,അതിലേറെ അനാദരവുമാണ് .

വൃദ്ധന്മാർ കേവലം വോട്ടുചെയ്യാൻ മാത്രമുള്ള മനുഷ്യരൂപങ്ങൾ അല്ല, അവർക്ക് വേദനയും ആശങ്കയുമുണ്ട്.

കറവ വറ്റിയ പശുക്കളായി അവഗണിക്കരുത് .

കേരളത്തിലെ 70 വയസ്സും അതിനുമുകളിലും പ്രായമുള്ള മുതിർന്ന പൗരന്മാർക്ക് പ്രതിവർഷം 5 ലക്ഷം രൂപ വരെ സൗജന്യ ചികിത്സ ഉറപ്പാക്കുന്ന, മഹത്തായ ലക്ഷ്യത്തോടെ കേന്ദ്ര സർക്കാർ ആവിഷ്കരിച്ച ആയുഷ്മാൻ വയോ വന്ദന പദ്ധതിയുടെ വഴിമുടക്കമാണ് ഈ വിമർശനത്തിന് കാരണം. 

കാഷ്‌ലെസ് ചികിത്സയും, നിലവിലുള്ള എല്ലാ രോഗങ്ങൾക്കും കവറേജും വാഗ്ദാനം ചെയ്യുന്ന ഈ പദ്ധതി, ജീവിതസായാഹ്നത്തിൽ ലക്ഷക്കണക്കിന് പേർക്ക് ആശ്വാസമാകേണ്ടിയിരുന്നു.

നിർഭാഗ്യകരമെന്നു പറയട്ടെ, പദ്ധതിയുടെ വാർഷിക പ്രീമിയം തുക പങ്കുവെക്കുന്നതിലെ കേന്ദ്ര-സംസ്ഥാന തർക്കം കാരണം ഇതിന്റെ പ്രയോജനം ബഹുഭൂരിപക്ഷം പേർക്കും നിഷേധിക്കപ്പെടുന്നു.

 3250 രൂപ പ്രീമിയം എന്ന കേരളത്തിന്റെ ആവശ്യവും, കാരുണ്യ പദ്ധതിയുടെ നിരക്കായ 1052 രൂപയിൽ നടപ്പാക്കണമെന്ന കേന്ദ്രത്തിന്റെ വാശിയും തമ്മിലുള്ള ഈ കടുംപിടിത്തം, ഏറ്റവും ദുർബലരായ ഒരു ജനവിഭാഗത്തിന്റെ ജീവന്റെ കാര്യത്തിൽ ഒരു ഒത്തുതീർപ്പിന് തയ്യാറാകാത്തതിന്റെ ഏറ്റവും പുതിയ ഉദാഹരണമാണ്.

കേരളത്തിലെ വയോജനങ്ങളുടെ സാമൂഹിക-ആരോഗ്യസ്ഥിതി പരിശോധിക്കുമ്പോൾ, ഈ പദ്ധതിയുടെ പ്രാധാന്യം എത്രത്തോളമുണ്ടെന്ന് വ്യക്തമാകും:

വരുമാനമില്ലായ്മ: വയോജനങ്ങളിൽ നാലിലൊന്ന് പേർക്കും കാര്യമായ വരുമാനമില്ല.

രോഗാതുരത: പകുതിയിലേറെ പേരും വാതം, പ്രമേഹം, ഹൃദ്രോഗം തുടങ്ങിയ ജീവിതാവസാനം വരെ ചികിത്സ ആവശ്യമുള്ള ഒന്നിലധികം രോഗങ്ങളുള്ളവരാണ്.

ഇൻഷുറൻസ് ഇല്ലായ്മ: സംസ്ഥാനത്ത് മുതിർന്ന പൗരന്മാരിൽ അഞ്ചിൽ നാലുപേർക്കും നിലവിൽ മെഡിക്കൽ ഇൻഷുറൻസ് പോളിസികളുടെ സേവനം ലഭിക്കുന്നില്ല.

ഉയർന്ന പ്രീമിയവും കർശന നിബന്ധനകളുമുള്ള സ്വകാര്യ ഇൻഷുറൻസ് പോളിസികൾ ഇവർക്ക് അപ്രാപ്യമാകുമ്പോൾ, യാതൊരു ഉപാധികളുമില്ലാതെ ചികിത്സ ഉറപ്പാക്കേണ്ട വയവന്ദന പദ്ധതിയുടെ അനിശ്ചിതത്വം കേരളത്തിന്റെ സാമൂഹിക ആരോഗ്യരംഗത്തെ ആശങ്കാജനകമായ അവസ്ഥയിലേക്ക് എത്തിക്കുന്നു.

മുതിർന്ന പൗരന്മാർക്ക് സജീവ വരുമാനമില്ലാത്തതിനാൽ തുടർച്ചയായ ചികിത്സാ ചെലവുകൾ വലിയ സാമ്പത്തിക വെല്ലുവിളിയാണ്. അതുകൊണ്ട്, ഈ പദ്ധതി അടിയന്തരമായി നടപ്പാക്കേണ്ടത് ഏറ്റവും ജനകീയമായ ആവശ്യമാണ്. സാങ്കേതിക തടസ്സങ്ങളോ സാമ്പത്തിക കണക്കുകളോ പറഞ്ഞല്ല, മനുഷ്യത്വം കൊണ്ടാണ് ഇത്തരമൊരു സഹായപദ്ധതിയെ ഇരുസർക്കാരുകളും കാണേണ്ടത്.

വോട്ടിങ് യന്ത്രങ്ങൾ പോലെ ഉപയോഗിക്കപ്പെടേണ്ടവരല്ല നമ്മുടെ വൃദ്ധജനങ്ങൾ. അവർക്ക് അർഹിക്കുന്ന പരിരക്ഷയും പരിഗണനയും ലഭിക്കണം. ജീവിതാവസാനം ചികിത്സ മുടങ്ങിപ്പോകില്ലെന്ന് അവർക്ക് ഉറപ്പുകൊടുക്കാൻ ഭരണകൂടത്തിന് ബാധ്യതയുണ്ട്.

ഈ പദ്ധതിയുടെ പ്രയോജനം സംസ്ഥാനത്തെ എല്ലാ മുതിർന്ന പൗരന്മാർക്കും ലഭ്യമാക്കാൻ, കേന്ദ്ര-സംസ്ഥാന സർക്കാരുകൾ തങ്ങളുടെ കടുംപിടിത്തം ഉപേക്ഷിച്ച്, അടിയന്തരമായി ഒരു സമവായത്തിലെത്തണം. വയോജനങ്ങളുടെ ചികിത്സ മുടങ്ങിപ്പോകരുത്; വയവന്ദനയുടെ വഴി ഉടൻ തുറന്നേ തീരൂ.

ചിത്രം :പ്രതീകാത്മകം