വരവർണ്ണങ്ങളിലെ സായീ ചെതന്യം :ദിവാകരൻ ചോമ്പാല

അവിടെ കോഴിക്കോടുകാരുടെ പ്രിയങ്കരനായ ഒരു കലാകാരനുണ്ടായി രുന്നു, ആർട്ടിസ്റ്റ് രാമദാസ്. ചിത്രകാരൻ, ഡിസൈനർ, കൈയെഴുത്തുകാരൻ, ബാനർ രചയിതാവ്, സിനിമാ സ്ലൈഡുകൾ നിർമ്മിക്കുന്നയാൾ എന്നിങ്ങനെ ചിത്രകലയുമായി ബന്ധപ്പെട്ട ഏത് ആവശ്യങ്ങൾക്കും ആളുകൾ തേടിയെത്തിയിരുന്നത് അദ്ദേഹത്തെയാണ്.

തിരക്കൊഴിയാത്ത 'രചന'യുടെ ലോകം

രാംദാസ് തന്റെ ജീവിതത്തിന്റെ വലിയൊരു ഭാഗം ചെലവഴിച്ച പണിപ്പുരയായിരുന്നു ഈ ഇടുങ്ങിയ മുറി. ഫ്ലെക്സ് പ്രിന്റിംഗ് നിലവിലില്ലാത്ത ആ കാലഘട്ടത്തിൽ, തുണിയിൽ ഇനാമൽ പെയിന്റ് കൊണ്ട് ബാനർ എഴുതിത്തൂക്കിയ സമയമായിരുന്നു അത്. തിരക്കൊഴിഞ്ഞ നേരമില്ലാത്ത കലാകാരനായിരുന്നു രാംദാസ്.

കോഴിക്കോട്ടെ അന്നത്തെ പ്രമുഖ സ്ഥാപനങ്ങളുടെ ആകർഷകമായ ബോർഡുകളിൽ ഒട്ടുമുക്കാലെണ്ണ ത്തിൻറെയും ഒരരികിൽ ചരിഞ്ഞ ഇംഗ്ലീഷ് അക്ഷരത്തിൽ ''രചന'' എന്ന കൈയൊപ്പ് പതിഞ്ഞതായി കാണാം.

 കൈകൊണ്ട് വിരിയിച്ച ഡിസൈനുകൾ

ലെറ്റർ സ്റ്റൈൽ മരപ്പലകയിൽ വരച്ചുണ്ടാക്കി, കല്ലായിയിലെ ഇൻഡസ്ട്രിയിൽ നിന്ന് ഫ്രെറ്റ് സോ മെഷീൻ കൊണ്ട് മുറിച്ചെടുത്ത്, ഉരക്കടലാസ്സിട്ട് മിനുസപ്പെടുത്തി, പുട്ടിയിട്ട്, ഇനാമൽ പെയിന്റുകൊണ്ട് നിറം നൽകിയാണ് അദ്ദേഹം അക്ഷരങ്ങൾ ബോർഡിൽ ഉറപ്പിച്ചിരുന്നത്. മിഠായിത്തെരുവിലെ പ്രശസ്തമായ ഒരു കടയ്ക്ക് മുകളിൽ ഇത്തരത്തിലുള്ള ബോർഡ് ആദ്യമായി സ്ഥാപിച്ചപ്പോൾ, രാംദാസിന്റെ കരവിരുത് കാണാൻ നഗരത്തിലെ ബോർഡ് എഴുത്തുകാർ കടയ്ക്ക് മുന്നിൽ തടിച്ചുകൂടിയ കഥകൾ കടയുടമ മുഹമ്മദ്ക്ക ഓർത്തെടുത്തിട്ടുണ്ട്. കാലപ്പഴക്കത്തിലും പഴയ പ്രൗഢിയോടെ ഇന്നും കോഴിക്കോടിന്റെ അങ്ങാടിയിൽ അത്തരം ചില ബോർഡുകൾ കാണാം.

 കെട്ടിടത്തിൻ്റെ പുറംചുമരിൽ തുണി ആണിവെച്ചുറപ്പിച്ച്, ഇടതു കൈയ്യിൽ മീറ്റർകോലുപോലൊരു വടിയും വലതു കൈയ്യിൽ ചായത്തിൽ മുക്കിയ ബ്രഷുമായി നിലത്തിരുന്ന് ബാനർ എഴുതിയ രാമദാസിന്റെ ചിത്രം, ആ കാലഘട്ടത്തിന്റെ ഓർമ്മയാണ്.

 സിനിമയും രാമദാസിന്റെ കരവിരുതും

കമ്പ്യൂട്ടറോ ഡി.ടി.പി., സ്കാനിങ് പോലുള്ള ആധുനിക സൗകര്യങ്ങളോ ഇല്ലാത്ത കാലത്ത്, പ്രമുഖ സിനിമാപ്രവർത്തകരും പോസ്റ്റർ ഡിസൈൻ ചെയ്യാൻ എത്തിയിരുന്നത് 'രചന' ആർട്സിലായിരുന്നു.

സിനിമയുടെ ഷൂട്ടിങ്ങിനിടയിൽ സ്റ്റിൽ ഫോട്ടോഗ്രാഫർമാർ എടുത്ത ബ്ലാക്ക് ആൻഡ് വൈറ്റ് ചിത്രങ്ങൾ വെച്ചാണ് പോസ്റ്റർ ഡിസൈൻ ചെയ്തിരുന്നത്. പോസ്റ്ററിന്റെ വലുപ്പത്തിന് ആനുപാതികമായി ചെറിയ സൈസിലാണ് ഡിസൈൻ തയ്യാറാക്കുക.

ചിത്രങ്ങളുടെ സംയോജനം:

പ്രധാന നടീനടന്മാരുടെ ചിത്രങ്ങൾ ശ്രദ്ധയോടെ മുറിച്ച്, വലിയ ഡ്രോയിങ് ഷീറ്റിൽ പശ തേച്ച് ഒട്ടിക്കും. മറ്റ് കഥാപാത്രങ്ങളുടെ ചെറുതും വലുതുമായ ചിത്രങ്ങൾ വശങ്ങളിലേയ്ക്ക് ചരിച്ചും താഴ്ത്തിയും കലാപരമായി സംയോജിപ്പിക്കും.

പശ്ചാത്തലത്തിൽ എയർ ബ്രഷ് കൊണ്ട് പല നിറങ്ങൾ സ്പ്രേ ചെയ്യും, അല്ലെങ്കിൽ ഇന്ത്യൻ ഇങ്കിലോ പോസ്റ്റർ കളറിലോ ബ്രഷ് മുക്കി പശ്ചാത്തലം ഒരുക്കും.

സിനിമയുടെ പേര് അഥവാ ടൈറ്റിൽ പെൻസിൽ കൊണ്ട് വലുപ്പത്തിൽ എഴുതി, അതിനു മുകളിലൂടെ നേരിയ ബ്രഷുകൊണ്ട് ഇന്ത്യൻ ഇങ്കിൽ വരച്ചുതീർക്കും. പ്രിന്റിംഗിനേക്കാൾ മനോഹരവും സൂക്ഷ്മവുമായിരുന്നു ഇദ്ദേഹം കൈകൊണ്ടെഴുതുന്ന വടിവൊത്ത അക്ഷരങ്ങൾ.

ഡിസൈൻ പൂർത്തിയായാൽ, മലബാർ ക്രിസ്ത്യൻ കോളേജിന് എതിർവശത്തുള്ള പ്രശസ്തമായ ലൂക്കോസ് ബ്ലോക്കിലേക്ക് കൊണ്ടുപോയി ബ്ലോക്കുകൾ നിർമ്മിക്കും. മരക്കട്ടയിൽ ഉറപ്പിച്ച ഈ ബ്ലോക്കുകളുമായിട്ടായിരുന്നു പ്രിന്റിങ് പ്രസ്സിലേക്കുള്ള യാത്ര.

ഐ.വി. ശശി സംവിധാനം ചെയ്ത 'ദേവാസുരം', 'ഇൻസ്പെക്ടർ ബൽറാം', പി.എൻ. മേനോന്റെ 'കുട്ടിയേടത്തി' എന്നിവയുടെ ടൈറ്റിലുകൾ ഉൾപ്പെടെ എത്രയോ സിനിമകളുടെ പോസ്റ്റർ-പരസ്യകലകൾ പിറവിയെടുത്തത് രാമദാസിന്റെ 'രചന ആർട്സ്' എന്ന ഈ കൊച്ചുമുറിയിൽ നിന്നാണ്. 'ദേവാസുരം' ടൈറ്റിൽ പ്രമുഖ ചിത്രകാരനായ സി.എൻ. കരുണാകരന്റെ ശൈലിയിൽ വേണം എന്നതായിരുന്നു സംവിധായകൻ രഞ്ജിത്ത് നൽകിയ നിർദ്ദേശം.

 രാമദാസിന്റെ പ്രചോദനവും സൗഹൃദങ്ങളും

ദേശീയ അന്തർദ്ദേശീയ പ്രസിദ്ധീകരണങ്ങളുടെ പഴയ പ്രതികൾ നിസ്സാരവിലയ്ക്ക് വിൽക്കുന്ന ആനി ഹാൾ റോഡിലെ കടയിൽ രാംദാസിന് കടയുടമയായ ബാലേട്ടൻ നൽകിയിരുന്ന സ്വാതന്ത്ര്യം, പരസ്യകലയിലെ പുതിയ ട്രെൻഡുകൾ കണ്ടെത്താൻ അദ്ദേഹത്തിന് ഏറെ സഹായകമായി.പലപ്പോഴും ഈ പുസ്തക്കടയിൽ രാം ദാസിനൊപ്പം ഞാനും കൂടും .

തമിഴ്നാട്ടിൽ നിന്ന് വന്നിരുന്ന പാക്കിങ് ബോക്സുകളുടെ ഡിസൈനുകളിൽ നിന്ന് തികച്ചും വ്യത്യസ്തവും വേറിട്ട ചായക്കൂട്ടുകളിലുമായിരുന്നു രാമദാസ് ലേബലുകളും പാക്കിംഗ് ബോക്സുകളും പത്രപരസ്യ ലേഔട്ടുകളും തയ്യാറാക്കിയിരുന്നത്.

ടെക്‌സ്റ്റൈൽ മാർക്കറ്ററിംഗുമായി ബന്ധപ്പെട്ട് ഞാൻ പ്രവർത്തിച്ചിരുന്ന കാലങ്ങളിൽ ബാംഗ്ളൂരിലും മദ്രാസിലും തിരുപ്പൂരിലും മറ്റുമുള്ള പല പ്രമുഖ കമ്പനികളുടെ ലോഗോയും പേക്കിങ് ബോക്സുകളും ഞാൻ ഡിസൈൻ ചെയ്യിച്ചിരുന്നത് രചന രാംദാസിനെക്കൊണ്ടായിരുന്നു .മറ്റു ചിലപ്പോൾ മിഠായിത്തെരുവിലെ പ്രദീപ് ആർട്സിലെ വാസു പ്രദീപിനെക്കൊണ്ടുമായിരുന്നു.

പ്രമുഖരുടെ സങ്കേതം

കാഴ്ചയിൽ ഇടുങ്ങിയ മുറിയായിരുന്നെങ്കിലും, 'രചന ആർട്സ്' എന്ന ഈ സ്ഥാപനത്തിൽ എത്താത്ത പ്രമുഖരില്ല. ഇവിടെ വെച്ചാണ് ഞാൻ  പ്രമുഖ ചലച്ചിത്ര നിർമ്മാതാവും സംവിധായകനുമായ ഐ.വി. ശശിയെ ആദ്യമായി പരിചയപ്പെടുന്നത്.

കൂടാതെ, രഞ്ജിത്ത്, കലാ സംവിധായകൻ എസ്. കൊന്നനാട്ട്, ആർ.കെ. രാധാകൃഷ്ണൻ, സിനിമാ നിർമ്മാതാക്കളായ വി.ബി.കെ. മേനോൻ, പുഷ്പരാജൻ, ചിത്രകാരനും കവിയുമായ പോൾ കല്ലാനോട്, പ്രശസ്ത ഫോട്ടോഗ്രാഫർ പുനലൂർ രാജൻ വയനാട്ടിലെ ബേബി തങ്കപ്പൻ തുടങ്ങിയ എത്രയോ വിശിഷ്ട വ്യക്തിത്വങ്ങളെ കാണാനും പരിചയപ്പെടാനും ഇവിടെ എനിക്ക്‌ അവസരം ലഭിച്ചിട്ടുണ്ട്.

പയ്യോളി സ്വദേശിയായ പ്രഗത്ഭ ചിത്രകാരൻ യു. ശങ്കരനായിരുന്നു രാമദാസിന്റെ ആദ്യ ഗുരു. എന്നാൽ, മദ്രാസിലെ പരസ്യക്കമ്പനിയിൽ ആർട്ട് ഡയറക്ടറായി ജോലി നോക്കിയിരുന്ന ജ്യേഷ്ഠനിൽ നിന്നാണ് ചിത്രകലാ രംഗത്തേക്കുള്ള അദ്ദേഹത്തിന്റെ പ്രധാന പ്രചോദനം ലഭിച്ചത്.

 കാലം മാറിയപ്പോൾ

46 വർഷങ്ങൾക്ക് മുൻപ് എൻറെ വിവാഹ ക്ഷണക്കത്ത് പോലും രാംദാസിന്റെ കൈയക്ഷരത്തിൽ ബ്ലോക്കുണ്ടാക്കി പ്രിന്റ് ചെയ്തതായിരുന്നു. ഇന്നത്തെ ഡി.ടി.പി. ചെയ്യുന്നതിനേക്കാൾ മനോഹരവും വടിവൊത്തതുമായിരുന്നു ആ അക്ഷരങ്ങൾ.

ഉത്സവകാലങ്ങളിലും താരനിശ, സന്തോഷ് ട്രോഫി പോലുള്ള വൻ പരിപാടികളുടെ പരസ്യങ്ങളിലും രാമ ദാസിന്റെ 'രചന'യുടെ കൈയൊപ്പ് പതിഞ്ഞ പോസ്റ്ററുകളും നോട്ടീസുകളും വിരളമായിരുന്നു. സത്യസായി സേവാസമിതിയുടെ പരിപാടിക്കായി അദ്ദേഹം നിർമ്മിച്ച 18 അടി വലുപ്പമുള്ള സത്യസായി ബാബയുടെ കട്ട് ഔട്ട് ഭക്തജനങ്ങളുടെ ആരാധനാപാത്രമായി.

ഇന്ന്, കല്ലിക്കോട്ടെ പഴയ 'രചന ആർട്സ്' ഡിജിറ്റൽ സാങ്കേതികത്തികവിലേയ്ക്ക് ചുവടുമാറിക്കഴിഞ്ഞിരിക്കുന്നു. കമ്പ്യൂട്ടർ ഗ്രാഫിക്സിൽ പ്രാവീണ്യം നേടിയ മകൻ പ്രജിത്ത് കലയിൽ അച്ഛനോടൊപ്പം ഉയരത്തിലെത്തി. പഴയ മുറിയിൽ, പുതിയ ശൈലിയുമായി, അച്ഛനും മകനും കോഴിക്കോടിന്റെ പരസ്യകലാരംഗത്ത് തിരക്കൊഴിയാതെ തുടരുന്നു. വലിയ സ്വപ്നങ്ങളും ലളിത ജീവിതവുമായി സായീഭക്തനായ രാമദാസ് എന്ന കലാകാരൻ കോഴിക്കോടൻ 'രചന'യുടെ ഓർമ്മയായി ഇന്നും അവിടെയുണ്ട്.