മണ്ണിൻ്റെ മക്കൾക്ക് മനംനൊന്ത് മണ്ണ് നൽകിയ ജ്ഞാനസൂര്യൻ; ഡോ. സി.എം. നീലകണ്ഠനും സഹധർമ്മിണിയും : ദിവാകരൻ ചോമ്പാല

രാജ്യത്തിന്റെ സാംസ്‌കാരികവും സാമൂഹികവുമായ ഐക്യത്തിന് വേണ്ടി പ്രവർത്തിക്കുന്ന മഹത് വ്യക്തികളെ ആദരിക്കുന്ന ഭാരത് സേവക് സമാജ് ദേശീയ പുരസ്‌കാരം അദ്ദേഹത്തിന്റെ കർമ്മപഥത്തിലെ സമഗ്രതയ്ക്കുള്ള അംഗീകാരമായി അദ്ദേഹത്തെ തേടിയെത്തി.

വൈദിക പാരമ്പര്യത്തെയും ആധുനിക സാമൂഹിക വീക്ഷണങ്ങളെയും സമന്വയിപ്പിച്ചുകൊണ്ടുള്ള ദീർഘവീക്ഷണമാണ് ഈ ബഹുമതിക്ക് അദ്ദേഹത്തെ അർഹനാക്കിയത്.

കൂടാതെ, സംസ്‌കൃത ഭാഷാ സേവനത്തിലുള്ള അതുല്യമായ സംഭാവനകൾ പരിഗണിച്ച് പൂണെയിലെ തിലക് മഹാരാഷ്ട്ര സർവ്വകലാശാല നൽകുന്ന ലോകമാന്യ തിലക് സംസ്‌കൃത പുരസ്‌കാരത്തിനും അദ്ദേഹം അർഹനായി. ഈ പുരസ്‌കാരങ്ങൾ ഡോ. സി.എം. നീലകണ്ഠൻ എന്ന വ്യക്തിത്വത്തിനുള്ള ആദരം മാത്രമല്ല, ഭാരതീയ പൈതൃകത്തിന്റെ പ്രസക്തി ലോകത്തിന് മുമ്പിൽ വിളിച്ചോതുന്ന സാക്ഷ്യപത്രം കൂടിയാണ്.

സമ്പത്ത് പങ്കിടാനുള്ളതാണ്: ദാർശനികന്റെ വിപ്ലവകരമായ പ്രവൃത്തി

ജ്ഞാനം സമ്പാദിക്കുന്നതുപോലെ തന്നെ പ്രധാനമാണ് അത് സമൂഹത്തിന് വേണ്ടി വിനിയോഗിക്കുക എന്നത്. 'കിടപ്പാടം ഓരോ പൗരന്റെയും അടിസ്ഥാന അവകാശമാണ്' എന്ന പുരോഗമനപരമായ കാഴ്ചപ്പാട്, ഈ ജ്ഞാനതപസ്വി ജീവിതത്തിൽ പകർത്തിയപ്പോൾ അത് ഒരു സാംസ്‌കാരിക പ്രഖ്യാപനമായി മാറി.

കേരള സർക്കാർ ഭൂരഹിത ഭവനരഹിതർക്കായി ആവിഷ്‌കരിച്ച് നടപ്പിലാക്കുന്ന ലൈഫ് മിഷൻ പദ്ധതിയുടെ ഭാഗമായി, ജനകീയ പങ്കാളിത്തത്തോടെ ഭൂമി കണ്ടെത്താൻ ആരംഭിച്ച 'മനസ്സോടിത്തിരി മണ്ണ്' ക്യാമ്പയിന് ലഭിച്ച ഏറ്റവും വലിയ കൈത്താങ്ങാണ് ഡോ. സി.എം. നീലകണ്ഠന്റെയും പത്‌നി ഡോ. കെ.പി. ശ്രീദേവിയുടെയും ഉദാരത. ഷൊർണ്ണൂർ നഗരസഭയിലെ കിടപ്പാടമില്ലാത്ത ദരിദ്ര നാരായണന്മാർക്ക് കുടിപാർപ്പിനായി വീടുവെക്കാൻ 25 സെന്റ് സ്ഥലം സൗജന്യമായി വിട്ടുകൊടുക്കാൻ ഈ അദ്ധ്യാപക ദമ്പതിമാർ തീരുമാനിച്ചു.

പരുത്തിപ്ര യു.പി. സ്‌കൂളിനോട് ചേർന്നുള്ള ഈ സ്ഥലം, അവകാശപ്പെട്ട മണ്ണ് സ്വപ്നം കണ്ടിരുന്ന നിരവധി കുടുംബങ്ങൾക്ക് ഇനി ആശ്രയമാകും.

കേരളകൗമുദി കുളപ്പുള്ളി ഗാസിബോ ഹെറിറ്റേജിൽ നടന്ന കാർഷിക വികസന സെമിനാറിൽ വൈദ്യൂതി മന്ത്രി കെ കൃഷ്ണൻകുട്ടി കേരളകൗമുദി ലൈഫ്ടൈംഅച്ചീവ്‌മെന്റ് അവാർഡ് നൽകി ആദരിക്കുകയുമുണ്ടായി;

പാഠപുസ്തകത്തിലെ കമ്മ്യൂണിസ്റ്റ് ദർശനം

"

പോയകാലങ്ങളിൽ ചെറുപ്പകാലത്ത് തങ്ങൾ അനുഭവിച്ച ദുരിതാനുഭവങ്ങളും കഷ്ടതകളും കുറച്ചുപേരെങ്കിലും അനുഭവിക്കാതിരിക്കണം" എന്ന വാക്കുകൾ, കേവലം ദാനമല്ല, മറിച്ച് ദീർഘവീക്ഷണമുള്ള ഒരു സാമൂഹിക നീതിബോധമാണ് വെളിപ്പെടുത്തുന്നത്.

മനുഷ്യൻ സ്വയം ആർജ്ജിച്ച ധനം സമൂഹത്തിന്റെ പൊതുസ്വത്താണെന്ന കമ്യൂണിസ്റ്റ് ആശയം എത്രയോ ലളിതമായി ഈ പ്രവൃത്തിയിൽ ധ്വനിക്കുന്നു. പാണ്ഡിത്യത്തിന്റെ പീഠത്തിൽ ഇരുന്നുകൊണ്ട് വേദങ്ങളും വേദാന്തങ്ങളും പഠിപ്പിച്ച ഒരു വ്യക്തി, തന്റെ സ്വകാര്യ സമ്പത്തിന്റെ ഒരംശം, സ്വന്തമായി മണ്ണില്ലാത്ത പാവപ്പെട്ടവരുടെ 'വർഗ്ഗ'ത്തിനായി പങ്കുവെക്കുന്നത്, ഏതൊരു വിപ്ലവ പ്രസ്ഥാനത്തിനും മാതൃകയാക്കാവുന്നതാണ്.

ഭൂരഹിതർക്ക് ഭൂമി ലഭിക്കുമ്പോഴാണ്, 'മനുഷ്യൻ മണ്ണോടുചേർന്ന് അവന്റെ അവകാശം സ്ഥാപിക്കുന്നത്' എന്ന ഉദാത്തമായ തത്വം ഇവിടെ പ്രായോഗികമാകുന്നത്. ഡോ. നീലകണ്ഠനും ഭാര്യയും കാണിച്ച ഈ ഉദാരത, നാട്ടുകാർക്ക് കേവലം ആരാധനാ മനോഭാവത്തോടെ നോക്കിക്കാണാനുള്ള ഒന്നല്ല; മറിച്ച്, അറിവും സമ്പത്തും സമൂഹത്തിന്റെ താഴെത്തട്ടിലുള്ളവർ

ക്കായി പരിവർത്തനം ചെയ്യപ്പെടാനുള്ളതാണ് എന്ന പുരോഗമനപരമായ രാഷ്ട്രീയ സന്ദേശമാണ്.

ഈ അദ്ധ്യാപക ദമ്പതിമാർ കാണിച്ച മാതൃക, ലൈഫ് മിഷൻ എന്ന മഹത്തായ സർക്കാർ പദ്ധതിക്ക് നൽകുന്ന കരുത്ത് ചെറുതല്ല.

മക്കൾ വിദ്യാഭ്യാസ-ശാസ്ത്ര രംഗത്ത് പ്രശസ്തരായവരാണെങ്കിലും (സി.എൻ. വിഷ്ണുപ്രസാദ് - സയന്റിസ്റ്റ്, പ്രൊഫ. ഡോ. സി.എൻ. ശ്യാംകുമാർ - എൻ.ഐ.ടി. പ്രൊഫസർ) അവരുടെ മാതാപിതാക്കൾ കാട്ടിയ ഈ 'ത്യാഗം', ഒരു കുടുംബം സമൂഹത്തിനായി ചെയ്യുന്ന ഏറ്റവും വലിയ നിക്ഷേപമാണ്. ജ്ഞാനം മനുഷ്യനെ നയിക്കേണ്ടത് വ്യക്തിഗതമായ നേട്ടങ്ങളിലേക്കല്ല, മറിച്ച്, സമത്വവും സാഹോദര്യവും നിറഞ്ഞ ഒരു സാമൂഹിക നിർമ്മിതിയിലേക്കാണ് എന്ന് ഈ സംഭവം അടിവരയിടുന്നു.