ജനകീയ സമരം വിജയം; മുക്കാളിയിൽ അടിപ്പാത കെ.കെ. രമ എം.എൽ.എ. ഉദ്ഘാടനം ചെയ്തു

ദേശീയപാത നവീകരണത്തിന്റെ ഭാഗമായി ഇല്ലാതായ, മുക്കാളിയിൽനിന്ന് ആവിക്കര ഭാഗത്തേക്കുള്ള സുരക്ഷിതമായ അടിപ്പാത പുനഃസ്ഥാപിക്കണ മെന്ന നാട്ടുകാരുടെ ആവശ്യം 78 ദിവസത്തെ ശക്തമായ സർവകക്ഷി കർമസമിതിയുടെ സമരത്തിലൂടെയാണ് ദേശീയപാത അതോറിറ്റി അംഗീകരിച്ചത്.

അഴിയൂർ ഗ്രാമപഞ്ചായത്ത് പ്രസിഡന്റ് ആയിഷ ഉമ്മറിന്റെ അധ്യക്ഷത യിൽ ചേർന്ന യോഗത്തിൽ, കരിമരുന്നുപ്രയോഗവും മധുരം വിളമ്പലും ഉൾപ്പെടെയുള്ള ആഘോഷങ്ങളോടെയാണ് നാട്ടുകാർ അഭിമാന നിമിഷം ഏറ്റെടുത്തത്.

ജനകീയ സമിതി കൺവീനർ കെ. പി. ജയകുമാർ റിപ്പോർട്ട് അവതരിപ്പിച്ചു.

നാലര മീറ്റർ നീളത്തിലും രണ്ടു മീറ്റർ ഉയരത്തിലുമാണ് അടിപ്പാത നിർമിച്ചിരിക്കുന്നത്. ആവിക്കരയിൽനിന്നുള്ള യാത്രക്കാർക്കും 'റൈറ്റ് ചോയ്‌സ്' പോലുള്ള വിദ്യാഭ്യാസ സ്ഥാപനങ്ങളിലെ വിദ്യാർത്ഥികൾക്കും കടലോര മേഖലയിലുള്ളവർക്കും ഇനി അടിപ്പാത വഴി മുക്കാളി ടൗണിലെത്താൻ സുഗമമാകും.

ജനകീയ കൂട്ടായ്മയുടെ നേതൃത്വത്തിൽ അടിപ്പാതയിൽ മേൽക്കൂര, വെളിച്ചസംവിധാനം, വെള്ളക്കെട്ടിന് പരിഹാരമായി മോട്ടോർ സംവിധാനം, സി.സി.ടി.വി. സൗകര്യം തുടങ്ങിയവയും ഒരുക്കിയിട്ടുണ്ട്. കക്ഷിരാഷ്ട്രീയ ഭേദമന്യേ കൈകോർത്തുനിന്ന ജനകീയപ്രവർത്തകരെ യോഗത്തിൽ മുക്തകണ്ഠം പ്രശംസിച്ചു.

 ജില്ലാ പഞ്ചായത്ത് അംഗം നിഷ പി. പി., ഗ്രാമപഞ്ചായത്ത് അംഗങ്ങളായ പി. കെ. പ്രീത, റീന രയരോത്ത്, എം. പ്രമോദ്, കെ. കെ. സാവിത്രി, രാഷ്ട്രീയ പാർട്ടി പ്രതിനിധികളായ എ. ടി. ശ്രീധരൻ, കെ. പി. വിജയൻ, പി. പി. ശ്രീധരൻ, ഹാരിസ് മുക്കാളി, പി. എം. അശോകൻ, പ്രദീപ് ചോമ്പാല, കെ. എ. സുരേന്ദ്രൻ, പി. നിജിൻ ലാൽ, ഷംസീർ ചോമ്പാല, പുരുഷു രാമത്ത്, വ്യാപാരി സംഘടനയെ പ്രതിനിധീകരിച്ച് പി. കെ. രാമചന്ദ്രൻ എന്നിവർ സംസാരിച്ചു.

മുക്കാളി ടൗണിലൂടെ കടന്നുപോകുന്ന പഴയ ദേശീയപാതയിലെ ടാറിങ്ങിനും ഡ്രൈനേജ് നിർമാണത്തിനുമായി 90 ലക്ഷം രൂപ പൊതുമരാമത്ത് വകുപ്പ് അനുവദിച്ചതായി എം.എൽ.എ. ചടങ്ങിൽ അറിയിച്ചു.