ആരും അനിവാര്യരല്ല. അതെ, ഒഴിച്ചുകൂടാനാവാത്തരായി ആരും തന്നെയില്ല: ഡോ :റിജി

ആരും അനിവാര്യരല്ല. അതെ, ഒഴിച്ചുകൂടാനാവാത്തരായി ആരും തന്നെയില്ല: ഡോ :റിജി 

സ്ഥാനം 'വഴിയമ്പലം' മാത്രം: നിങ്ങൾ അനിവാര്യനല്ല!

ജ്ഞാനത്തിൻ്റെ വെളിച്ചത്തിൽ നാം മനസ്സിലാക്കേണ്ട പരമമായ സത്യമുണ്ട്: ഈ ലോകത്ത് ഒഴിച്ചുകൂടാനാവാത്തവരായി (Indispensable) ആരും തന്നെയില്ല.

'നിങ്ങളില്ലെങ്കിൽ കാര്യങ്ങൾ നടക്കില്ല', 'നിങ്ങളുടെ അഭാവം ചിന്തിക്കാൻ പോലും സാധ്യമല്ല' എന്നൊക്കെ ആളുകൾ നിങ്ങളെ പുകഴ്ത്തിയേക്കാം. എന്നാൽ ആ പ്രശംസയിൽ വീണ്, 'ഞാനൊരു സംഭവം' എന്ന് അഹങ്കരിക്കരുത്. അഹങ്കാരം വലിയ പതനങ്ങൾക്ക് കാരണമായ ചരിത്രമേ നമുക്ക് മുന്നിലുള്ളൂ.

നിങ്ങൾ ഇന്ന് ഇരിക്കുന്ന കസേരയിലേക്ക് നാളെ നിങ്ങളെക്കാൾ മിടുക്കനായ ഒരാൾ വരും. അയാൾ നിങ്ങളെക്കാൾ നന്നായി കാര്യങ്ങൾ ചെയ്യും. അന്ന് നിങ്ങളെ പുകഴ്ത്തിപ്പറഞ്ഞവർ പുതിയ അധികാര കേന്ദ്രത്തിനു ചുറ്റും കൂടും. നിങ്ങളുടെ ഫോൺ കോൾ എടുക്കാൻ പോലും അവരുണ്ടായെന്ന് വരില്ല.

ഈ സത്യം നിങ്ങൾ എല്ലാം കഴിഞ്ഞ്, ഒറ്റപ്പെട്ട ശേഷം അറിയേണ്ട ഒന്നല്ല. നിങ്ങൾ പ്രതാപത്തിൽ നിൽക്കുമ്പോൾ തന്നെ ഇത് മുൻകൂട്ടി കാണണം. സ്തുതിപാഠകർ നിങ്ങളെ മഹാനായി വാഴ്ത്തുമ്പോൾ, നിങ്ങളുടെ സ്വരം ഏറ്റവും നല്ല നിലയിൽ നിൽക്കുമ്പോൾ തന്നെ സ്ഥാനം വച്ചൊഴിയുക. അടുത്ത ലക്ഷ്യത്തിലേക്കുള്ള യാത്ര തുടരുക.

ഓർക്കുക, നിങ്ങളുടെ സ്ഥാനം യാത്രയ്ക്കിടയിലെ വഴിയമ്പലം മാത്രമാണ്. അതിനെ സ്വന്തം വീടായി കണ്ടാൽ യാത്ര മുടങ്ങിപ്പോകും, ഒടുവിൽ യഥാർത്ഥ വീട്ടിൽ വെറുതെയിരിക്കേണ്ടി വരും. അതുകൊണ്ടാണ് പഴമക്കാർ പറഞ്ഞത്:

"സ്വരം നല്ലപ്പോഴേ പാട്ട് നിർത്തണം.

(ഡോ. റിജി)