അനുഭവസാക്ഷ്യം: ആധുനിക കാലത്തെ പരസ്യവിദ്യയും വഞ്ചനയും :ദിവാകരൻ ചോമ്പാല

എന്നാൽ ഈ പരസ്യങ്ങൾ സത്യത്തിൽ നിന്ന് എത്രയോ അകലെയാണെന്ന് ചിന്തിക്കുന്നവരും വിമർശിക്കുന്നവരും എണ്ണത്തിലേറെ.

ചെടികളുടെയും മരങ്ങളുടെയും വിളവ് വർദ്ധിപ്പിക്കാൻ ഹോമിയോ മരുന്നുകൾക്ക് കഴിവുണ്ടെന്ന് ശാസ്ത്രീയമായി തെളിയിക്കപ്പെട്ടിട്ടുണ്ടോ ?.

കാർഷിക ഹോമിയോപ്പതിയെക്കുറിച്ച് വ്യാപകമായ ഗവേഷണങ്ങൾ നടന്നതായി അറിവുണ്ടോ ?.

നിലവിലുള്ള ഹോമിയോപ്പതി മരുന്നുകളിൽ, തന്മാത്രകളുടെ അളവ് വളരെ കുറവായതുകൊണ്ട് അത് എങ്ങനെയാണ് ചെടികളിൽ മാറ്റങ്ങൾ ഉണ്ടാക്കുന്നതെന്നതിന് ശാസ്ത്രീയ വിശദീകരണം വല്ലതും ഇക്കൂട്ടരുടെ കയ്യിലുണ്ടോ ?

കേരള കാർഷിക സർവകലാശാല പോലുള്ള സ്ഥാപനങ്ങളിലെ ഉന്നസ്ഥാനീയരും കാർഷികഗവേഷകരും ഈ വിഷയത്തിൽ ഔദ്യോഗികമായനിലയിൽ അന്വേഷണം നടത്തി കർഷകരെ ബോധ്യപ്പെടുത്തുമെങ്കിൽ അതൊരനഗ്രഹമായിരിക്കും തീർച്ച.

പാവപ്പെട്ട കർഷകരുടെ പിച്ചച്ചട്ടിയിൽ കയ്യിട്ടുവാരാൻ തന്ത്രശാലികൾക്ക് അവസരമൊരുക്കരുത്...

സംസ്ഥാന കൃഷി മന്ത്രിയുടെയും കാർഷിക ഗവേഷണ കേന്ദ്രം ഉന്നതാധികാരികളുടെയും ശ്രദ്ധ ഈ പരസ്യ പ്രചാരണത്തിലേക്ക് എത്തേണ്ടിയിരിക്കുന്നു.

 ഈ പറയുന്ന വസ്തുതകൾ ശരിയാണെങ്കിൽ ഈ ഹോമിയോ കൃഷി വിദഗ്ധരെ ദേശീയ പുരസ്‌കാരം നൽകി പ്രധാനമന്ത്രി ആദരിക്കേണ്ട താണെന്ന് ആഗ്രഹിച്ചാൽ തെറ്റാകുമോ ?

എന്നാൽ സംഗതി മറിച്ചാണെങ്കിൽ, കർഷകരുടെ വിശ്വാസം ചൂഷണം ചെയ്‌തുകൊണ്ടുള്ള തട്ടിപ്പുകൾക്ക് തടയിടാനും അധികൃതർക്ക് കഴിയണം.

ഒന്നും രണ്ടും കമ്പനികളല്ല ഈ രംഗത്ത് ചുവടുറപ്പിച്ചത് .

പരമ്പരാഗത അറിവുകളുടെ ദുരുപയോഗം

ആധുനികതയുടെയും ശാസ്ത്രത്തിന്റെയും പിൻബലത്തിൽ പ്രചരിക്കുന്ന ഇത്തരം പരസ്യങ്ങൾ, നമ്മുടെ പുരാതനമായ അറിവുകളെയും ദുരുപയോഗം ചെയ്യുന്നുണ്ട്.

 "വൃക്ഷായുർവേദം, അഗ്നിഹോത്രം" തുടങ്ങിയ മഹത്തായ സമ്പ്രദായങ്ങളെ ഈ പ്രചാരണങ്ങൾക്ക് മറയാക്കുന്നു.

സസ്യങ്ങളുടെ ആരോഗ്യം പരിപാലിക്കുന്നതിനുള്ള ഒരു പ്രാചീന ശാസ്ത്രമാണ് വൃക്ഷായുർവേദം. ജൈവവളങ്ങളുടെ ഉപയോഗവും ഇത് നിർദ്ദേശിക്കുന്നു.

അതേപോലെ, അഗ്നിഹോത്രം പരിസ്ഥിതി ശുദ്ധീകരണത്തിനും മാനസികാരോഗ്യത്തിനും സഹായിക്കുന്ന ഒരു വൈദിക ആചാരമാണ്.

ഇവയൊന്നും കേവലം പണം തട്ടാനുള്ള കുറുക്കുവഴികളല്ല, മറിച്ച് പ്രകൃതിയെയും മനുഷ്യനെയും ബന്ധിപ്പിക്കുന്ന ആഴമേറിയ തത്വങ്ങളാണ്.

ഈ മഹത്തായ അറിവുകളെ ലാഭേച്ഛയോടെ ഉപയോഗിക്കുന്നത് അവയുടെ പരിശുദ്ധിയെ ഇല്ലാതാക്കുന്നു.

ജാഗ്രത പുലർത്തേണ്ടത് അനിവാര്യം

ആർട്ടിഫിഷ്യൽ ഇന്റലിജൻസിന്റെ മാന്ത്രികസ്പർശമുള്ള നവമാധ്യമങ്ങളിൽ പരസ്യപ്രചരണം ഒരു കലയായി മാറിയിരിക്കുന്നു.

എന്നാൽ, നന്മയെയും സത്യസന്ധതയെയും അടിസ്ഥാനമാക്കി മാത്രമേ ഒരു സമൂഹത്തിന് മുന്നോട്ട് പോകാൻ കഴിയൂ. ഹോമിയോപ്പതി ചികിത്സയ്ക്ക് 200 വർഷത്തിൽ കൂടുതൽ പഴക്കമുണ്ടെങ്കിലും, കാർഷിക പുരോഗതിക്കുവേണ്ടി ഡോ.സാമുവൽ ഹാനിമാൻ മരുന്ന് കണ്ടുപിടിച്ചതായി ആരും പറഞ്ഞുകേട്ടിട്ടുമില്ല;

കഴിഞ്ഞ കുറച്ചു വർഷങ്ങളായി, സോഷ്യൽ മീഡിയയുടെ വളർച്ചയോടെയാണ് ഈ ചികിത്സാരീതിക്ക് കാർഷികരംഗത്ത് വലിയ പ്രചാരണം ലഭിച്ചത്.

 വാട്സാപ്പ്, ഫേസ്ബുക്ക് തുടങ്ങിയ പ്ലാറ്റ്‌ഫോമുകളിലൂടെയുള്ള വ്യക്തിപരമായ സാക്ഷ്യങ്ങളും അനുഭവകഥകളും അതിവേഗം പ്രചരിക്കുന്നു. ഇതിന്റെ ഫലപ്രാപ്തിയെക്കുറിച്ച് ശാസ്ത്രീയമായ തെളിവുകൾ ഇല്ലാതിരുന്നിട്ടും, കുറഞ്ഞ ചെലവിൽ വലിയ വിളവ് ലഭിക്കുമെന്നുള്ള വാഗ്ദാനങ്ങൾ കർഷകരെ വല്ലാതെ ആകർഷിക്കുന്നു.

ശാസ്ത്രീയപരമായ അടിസ്ഥാനമില്ലാത്ത അവകാശവാദങ്ങൾ ഉന്നയിക്കുകയും അതുവഴി ആളുകളിൽ നിന്ന് പണം വാങ്ങുകയും ചെയ്യുന്നത് ഒരുതരം വഞ്ചനയായി കണക്കാക്കാം. ഇത് കർഷകരെ സാമ്പത്തികമായി ചൂഷണം ചെയ്യാനും ശരിയായ ശാസ്ത്രീയരീതികളിൽ നിന്ന് അവരെ അകറ്റാനും സാധ്യതയുണ്ട്. കർഷകർക്ക് മികച്ച വിളവ് ലഭിക്കണമെങ്കിൽ, ശാസ്ത്രീയമായി തെളിയിക്കപ്പെട്ട കാർഷികരീതികൾ, വളങ്ങൾ, കീടനാശിനികൾ എന്നിവ ഉപയോഗിക്കുന്നതാണ് ഏറ്റവും ഉചിതം.

 അതിനാൽ, ഇത്തരം അനുഭവസാക്ഷ്യങ്ങളെ തിരിച്ചറിയുകയും അവക്കെതിരെ ജാഗ്രത പാലിക്കുകയും ചെയ്യേണ്ടത് ഓരോ പൗരന്റെയും കടമയാണ്.

അതേസമയം ഈ ഹോമിയോ മരുന്നുകൊണ്ട് പരസ്യത്തിൽ പറയുന്ന തരത്തിൽ വിളവുലഭിക്കുമെന്നു കേരളകാർഷികഗവേഷണകേന്ദ്രം സാക്ഷ്യപ്പെടുത്തുമെങ്കിൽ യാതൊരുപ്രതിഫഫലവും വാങ്ങാതെ ഈ ഹോമിയോ ചെടിചികിത്സയുടെ പ്രചാരകനായി പ്രവർത്തിക്കാൻ ഞാൻ തയ്യാറാണെന്ന് ഉറപ്പുതരുന്നു .

ബഹു .കാർഷികമന്ത്രിയുടെ അടിയന്തിര ശ്രദ്ധയും അന്വേഷണവും വിലയിരുത്തലും ഇക്കാര്യത്തിലു ണ്ടാകുമെങ്കിൽ ലക്ഷക്കണക്കിന് കർഷകർ ചതിക്കുഴിയിൽ വീഴുന്നത് ഒഴിവാകും ,ഇനി മറിച്ചാണ് കാര്യമെങ്കിൽ തല്ലാനോങ്ങിയ കൈകൊണ്ട് തലോടുകയുമാവാം .