ഒഡേസ സത്യന്റെ ഓർമ്മ : സത്യൻ മാടാക്കര.

ഒഡേസ സത്യന്റെ ഓർമ്മ

:സത്യൻ മാടാക്കര.

ചങ്ങാത്തത്തിന്റെ മേനി പറച്ചിലല്ല ആശയത്തിന്റെയും ഇടപെടലിന്റെയും തിരിച്ചറിവാണ് സൗഹൃദം. ഞാൻ സി.വി.സത്യനുമായുള്ള വടകര സ്നേഹത്തിന്റെ രാപ്പകലുകൾ മാറ്റിവെയ്ക്കുന്നു. ജനകീയ ഇച്ഛ സിനിമയിൽ എങ്ങനെ നിറവേറ്റാം എന്നത് സത്യന്റെ ജീവിത വീക്ഷണമായിരുന്നു. അതുകൊണ്ടു തന്നെ എ.അയ്യപ്പനെക്കുറിച്ച് ആത്മകഥാപരമായ "ഇത്രയും യാതഭാഗം " എന്ന ഡോക്യുമെന്ററിയും വർഗീസിന്റെ മരണം ഏറ്റുപറഞ്ഞ രാമചന്ദ്രൻ നായരുമായുള്ള അഭ്രപാളി സഞ്ചാരവും ശ്രദ്ധേയമായിരുന്നു. "അമ്മ അറിയാൻ" എന്ന ജോൺ എബ്രഹാമിന്റെ സിനിമയ്ക്കു ശേഷം കുറച്ചു കാലം നിശ്ചലമായ ഒഡേസയെ വടകര ആസ്ഥാനമാക്കി പുത്തനുണർവ്വ് നല്കി പുന:സംഘടിപ്പിച്ചത് സത്യ നാണ്. ജോൺ സ്മൃതി ജേർണൽ, ഋത്വിക് ഘട്ടക്ക് -കുറസോവ പതിപ്പ്, കയ്യൂർ തിരക്കഥ എന്നിവയുടെ പിന്നിൽ സത്യനായിരുന്നു. പക്ഷേ, കൂടുതൽ കാലം ആ പതിപ്പുകൾ തുടരാനായില്ല. എല്ലാവരെയും വിട്ടു പിരിഞ്ഞ് സത്യൻ മരണത്തിനു കീഴടങ്ങി. ഈ ചങ്ങാതിക്കുറിപ്പ് സത്യനുള്ള നന്ദി വാചകമാകുന്നു.

സമകാലീന സാമൂഹ്യാവസ്ഥയിൽ നല്ല സിനിമയിൽ നിന്ന് ജനങ്ങൾ അകന്നു കൊണ്ടിരിക്കുകയാണ്. ലാഭേച്ഛയുടെ ക്ഷുദ്ര പ്രേരണ നമ്മുടെ പ്രതികരണ ശേഷി തന്നെ നഷ്ടപ്പെടുത്തിക്കൊണ്ടിരിക്കുമ്പോൾ നല്ല സിനിമയ്ക്കായി പ്രവർത്തിച്ച ജനകീയ പ്രസ്ഥാനമാണ് ഒഡേസ.പന്ത്രണ്ടു വർഷത്തോളം വീഡിയോ പ്രൊജക്ടർ ഉപയോഗിച്ച് കേരളത്തിലെ തെരുവുകളിലും വിദ്യാലയങ്ങളിലും നല്ല സിനിമ പ്രദർശിപ്പിക്കാനും മികച്ചൊരു വീഡിയോ ചലച്ചിത്ര ശേഖരം ഉണ്ടാക്കാനും, ജനകീയ പങ്കാളിത്തത്തോടെ ഡോക്യുമെന്ററികൾ നിർമ്മിക്കാനും ഒഡേസയ്ക്കു കഴിഞ്ഞു. അതിൽ ശ്രദ്ധേയമായതായിരുന്നു " വേട്ടയാടപ്പെടുന്ന മനസ്സ്" എന്ന ഡോക്യുമെന്ററി.