കൈത്തറിമുണ്ടിൽ ഗോവിന്ദൻ്റെ കരസ്പർശം :ഡോ. കെ. കെ. എൻ. കുറുപ്പ്

കൈത്തറിമുണ്ടിൽ

ഗോവിന്ദൻ്റെ കരസ്പർശം

:ഡോ. കെ. കെ. എൻ. കുറുപ്പ്

ഓണാഘോഷം കേരളത്തിൻ്റെ വീടുകളെല്ലാം ഒരുമിപ്പിക്കുന്ന തിരുനാളാണ്. പൂക്കളവും ഉത്സവവിരുന്നും മാത്രമല്ല, നമ്മുടെ പാരമ്പര്യത്തോടുള്ള അഭിമാനവുമാണ് ഓണത്തിന്റെ സാരാംശം. ആ പാരമ്പര്യത്തിന്‍റെ മഹത്തായ പ്രതീകമാണ് കൈത്തറി മുണ്ട്.

കൈത്തറി – ഒരു കലാരൂപം

കൈത്തറി വസ്ത്രങ്ങൾ വെറും ധരിക്കാനുളള വസ്ത്രമല്ല, അത് കലാരൂപമാണ്. കൈകളുടെ കരവിരുതിൽ ജനിക്കുന്ന ഓരോ തുണിയും സാംസ്കാരിക പാരമ്പര്യത്തിന്‍റെ മുദ്ര പതിപ്പിച്ചവയാണ്. 

ഇന്ന് ലോകോത്തര വസ്ത്ര സംവിധാനത്തിന്റെ ഭാഗമായി കൈത്തറി മാറിയിരിക്കുന്നു. തൊഴിലാളികളും ഡിസൈനർമാരും വെറും ജീവനക്കാരല്ല, കലാകാരന്മാരാണ്.

ചോമ്പാലയുടെ അഭിമാനം

എൻ്റെ ഗ്രാമമായ ചോമ്പാലയിലെ കൊളരാട് തെരുവ് ഒരിക്കൽ നെയ്ത്തുതൊഴിലിലൂടെ പ്രശസ്തിയാർജ്ജിച്ചു. ശ്രീ .പി .ചാത്തു എന്ന മനുഷ്യസ്നേഹിയുടെ കരുതലും ശ്രമവുമായിരുന്നു അതിൻറെ പ്രേരകശക്തി . അതിന്റെ വികസിത രൂപമാണ് കുഞ്ഞിപ്പള്ളിക്കടുത്തുള്ള ചിറയിൽപീടികയിലെ കേരള ഹാൻഡ്‌ലൂം വീവേഴ്സ് ഇൻഡസ്ട്രിയൽ കോ-ഓപ്പറേറ്റീവ് സൊസൈറ്റി.

വർഷങ്ങളോളം ഞാൻ ഇവിടെ നിന്ന് കൈത്തറി മുണ്ടുകളും തുണികളും വാങ്ങിയിരുന്നു. ഓണക്കാലത്ത് വീണ്ടും ഇവിടെ എത്തി വൈവിധ്യമാർന്ന കൈത്തറി ഉൽപ്പന്നങ്ങൾ വാങ്ങാൻ കഴിഞ്ഞപ്പോൾ, പഴയ ഓർമ്മകൾ പുതുക്കി.