ഗാന്ധിഭവനിൽ പ്രകൃതി ഭക്ഷണശാലക്ക് തുടക്കം ബിജു കാരക്കോണം.

ഉമ്മൻചാണ്ടിയെ അനുസ്മരിച്ച് എൻ. രാധാകൃഷ്ണൻ

ഗാന്ധി സ്മാരക സമിതി ചെയർമാൻ ഡോ. എൻ. രാധാകൃഷ്ണൻ, മുൻ മുഖ്യമന്ത്രി ഉമ്മൻചാണ്ടിയുടെ ഗാന്ധിഭവനോടുള്ള ബന്ധം അനുസ്മരിച്ചു. ഗാന്ധിഭവന്റെ അറുപതാം വാർഷികം പ്രമാണിച്ച് അറ്റകുറ്റപ്പണികൾക്കാ യി 25 ലക്ഷം രൂപ ആവശ്യപ്പെട്ടപ്പോൾ, ഗാന്ധിഭവന്റെ ശോചനീയാവസ്ഥ കണ്ട് 60 ലക്ഷം രൂപ അനുവദിച്ച ഉമ്മൻചാണ്ടിയുടെ നടപടി അദ്ദേഹം ഓർത്തെടുത്തു. ചാണ്ടി ഉമ്മൻ എം.എൽ.എ.യെ വേദിയിലിരുത്തി ക്കൊണ്ടായിരുന്നു അദ്ദേഹത്തിന്റെ പരാമർശം. ഉമ്മൻചാണ്ടി ഉണ്ടായിരുന്നെങ്കിൽ ഗാന്ധിഭവന്റെ പ്രവർത്തനങ്ങൾക്ക് കൂടുതൽ സഹായങ്ങൾ ലഭിക്കുമായിരുന്നു എന്നും അദ്ദേഹം അഭിപ്രായപ്പെട്ടു.

വിഷരഹിത ഭക്ഷണം ഉത്പാദിപ്പിക്കാൻ കർഷകരെ പഠിപ്പിക്കുന്നതിനും പ്രകൃതി ഭക്ഷണം പ്രചരിപ്പിക്കുന്നതിനും ഡോ. ജേക്കബ് വടക്കാഞ്ചേരിയെപ്പോലൊരാളെ ലഭിച്ചത് ഗാന്ധി സ്മാരകനിധിക്ക് വലിയ ഭാഗ്യമാണെന്നും രാധാകൃഷ്ണൻ പറഞ്ഞു. കോട്ടയത്തെ കേരള ഗാന്ധി സ്മാരകനിധിയുടെ കെട്ടിടം പുനരുദ്ധരിക്കുന്നതിനായി തിരുവഞ്ചൂർ രാധാകൃഷ്ണന്റെ നേതൃത്വത്തിൽ മൂന്ന് കോടിയോളം രൂപ സമാഹരിച്ച് നടത്തിയ പ്രവർത്തനങ്ങളെയും അദ്ദേഹം പ്രശംസിച്ചു. ഈ മാസം 18-ന് ഈ കെട്ടിടം ഉദ്ഘാടനം ചെയ്യുമെന്നും അദ്ദേഹം അറിയിച്ചു.

മരണനിരക്ക് വർധിക്കുന്നതിൽ ആശങ്ക പ്രകടിപ്പിച്ച് വി.ഡി. സതീശൻ

കോവിഡിനുശേഷം സമൂഹത്തിൽ മരണനിരക്ക് വർധിച്ചതിൽ പ്രതിപക്ഷ നേതാവ് വി.ഡി. സതീശൻ ആശങ്ക പ്രകടിപ്പിച്ചു.

സ്ട്രോക്ക്, കാർഡിയാക് അറസ്റ്റ്, ശ്വാസകോശ സംബന്ധമായ അസുഖങ്ങൾ എന്നിവ വർധിക്കുന്നതായി അദ്ദേഹം ചൂണ്ടിക്കാട്ടി. എന്തുകൊണ്ടാണ് ഇത്തരം സംഭവങ്ങൾ കൂടുന്നതെന്ന് പഠിക്കാൻ ആരോഗ്യ വിവരശേഖരണം നടത്തണമെന്ന് നിയമസഭയിൽ താൻ ആവശ്യപ്പെട്ടതായും അദ്ദേഹം വെളിപ്പെടുത്തി.

ലക്ഷക്കണക്കിന് രൂപ ചികിത്സയ്ക്കായി ചെലവഴിക്കേണ്ടിവരുന്നത് സാധാരണക്കാർക്ക് താങ്ങാനാവുന്നതിലും അപ്പുറമാണെന്ന് അദ്ദേഹം പറഞ്ഞു. കേരളം രോഗാതുരമായ ഒരു സമൂഹമായി മാറിക്കൊണ്ടിരിക്കുക യാണെന്നും, ഇതിന് കാരണം നമ്മുടെ ഭക്ഷണരീതികളാണെന്നും അദ്ദേഹം കൂട്ടിച്ചേർത്തു.

നല്ല ഭക്ഷണം ലഭിക്കണമെങ്കിൽ നമ്മുടെ പറമ്പുകളിൽ വിഷരഹിത ഭക്ഷ്യോത്പന്നങ്ങൾ നാം തന്നെ ഉത്പാദിപ്പിക്കാൻ ശ്രമിക്കണമെന്നും അദ്ദേഹം ആഹ്വാനം ചെയ്തു.

പ്രവർത്തനമാണ് ആവശ്യം, പ്രസംഗമല്ല - എം. വിജയകുമാർ

മുൻ നിയമസഭാ സ്പീക്കർ എം. വിജയകുമാർ, പ്രസംഗിക്കുന്നതിൽ നാം ആരും മോശക്കാരല്ലെന്നും എന്നാൽ പ്രവർത്തനമാണ് വേണ്ടതെന്നും ഓർമിപ്പിച്ചു. ഗാന്ധിഭവൻ ആരംഭിച്ച പ്രകൃതി ഭക്ഷണശാല നമ്മുടെ നാടിനും രാജ്യത്തിനും മാതൃകയാക്കാവുന്ന ഒരു സംരംഭമാണെന്നും അദ്ദേഹം അഭിപ്രായപ്പെട്ടു.

ഗാന്ധി വസ്ത്രം പ്രചരിപ്പിക്കേണ്ടതിന്റെ ആവശ്യകതയെക്കുറിച്ച് മുൻ ആഭ്യന്തര മന്ത്രി തിരുവഞ്ചൂർ രാധാകൃഷ്ണൻ എം.എൽ.എ. സംസാരിച്ചു. ഖാദി വസ്ത്രങ്ങൾ ഉപയോഗിക്കുന്നതിലൂടെ നമ്മുടെ നാട്ടിലെ പാവപ്പെട്ട നെയ്ത്തുതൊഴിലാളികളുടെ ജീവിതത്തിന് താങ്ങാവാനാകുമെന്നും അദ്ദേഹം പറഞ്ഞു. ഗാന്ധിഭവൻ സംഘടിപ്പിച്ച ഖാദി ഓണം മേള ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മദ്യവും മയക്കുമരുന്നും സമൂഹത്തെ കാർന്നുതിന്നുന്നു - ബിഷപ്പ് ജോഷ്വാ ഇഗ്നത്തിയോസ്

ഉദ്ഘാടന ചടങ്ങിന്റെ തുടക്കത്തിൽ പെയ്ത മഴയെ പ്രകൃതിജീവന വക്താക്കളുടെ ഈ സംരംഭത്തിനുള്ള അനുഗ്രഹമായി ബിഷപ്പ് ജോഷ്വാ ഇഗ്നത്തിയോസ് വിശേഷിപ്പിച്ചു. മദ്യത്തിന്റെയും മയക്കുമരുന്നിന്റെയും ഉപയോഗം വർധിക്കുന്നതിൽ അദ്ദേഹം ആശങ്ക രേഖപ്പെടുത്തി. കുറച്ചുവർഷം മുൻപ് അന്നത്തെ എക്സൈസ് കമ്മീഷണർ മദ്യലഭ്യതയെ ന്യായീകരിച്ചത് മദ്യം ലഭിക്കാതെ വന്നാൽ മയക്കുമരുന്ന് ലഭ്യത കൂടുമെന്ന് പറഞ്ഞായിരുന്നു. എന്നാൽ ഇന്ന് മദ്യവും മയക്കുമരുന്നും സമൂഹത്തെ കാർന്നുതിന്നുന്ന വിപത്തായി മാറിയിരിക്കുന്നു.

ഉമ്മൻചാണ്ടിയുടെ കാലഘട്ടത്തിൽ സമരങ്ങളുടെയും പ്രക്ഷോഭങ്ങ ളുടെയും ഭാഗമായി ബാറുകളുടെ എണ്ണം 96 ആയി കുറച്ചതിൽനിന്ന് ഇന്ന് അത് 900 കടന്നതിനെയും പുതിയ മദ്യനയത്തെയും ബിഷപ്പ് വിമർശിച്ചു.

മരണനിരക്കിൽ പഠനം വേണമെന്ന് ചാണ്ടി ഉമ്മൻ

ചാണ്ടി ഉമ്മൻ എം.എൽ.എ. തന്റെ കുട്ടിക്കാലം മുതൽ ഗാന്ധി സ്മാരകനിധിയിലെ ലൈബ്രറിയിൽ വരുന്നതിനെക്കുറിച്ചും തന്റെ പിതാവ് ഉമ്മൻചാണ്ടിയുടെ ഗാന്ധിഭവനുമായുള്ള ബന്ധത്തെക്കുറിച്ചും ഓർത്തെടുത്തു. വർധിച്ചുവരുന്ന മരണനിരക്കിനെക്കുറിച്ച് സർക്കാർ പഠനം നടത്തണമെന്ന് അദ്ദേഹം ആവശ്യപ്പെട്ടു. കഴിഞ്ഞ ഒരു വർഷത്തിനിടെ തന്റെ മണ്ഡലത്തിലെ ഒരു ദേവാലയത്തിൽ 120 മരണങ്ങൾ നടന്നതായും അദ്ദേഹം ചൂണ്ടിക്കാട്ടി.

തന്റെ മണ്ഡലത്തിൽ ഒരു ബിവറേജസ് ഔട്ട്ലെറ്റ് പോലും ഇല്ലെന്നും, ഒന്ന് തുടങ്ങാൻ ശ്രമിച്ചപ്പോൾ താൻ തന്നെ അതിനെ എതിർത്തെന്നും അദ്ദേഹം പറഞ്ഞു. വീണ്ടും അത്തരം നീക്കങ്ങൾ നടക്കുന്നതായും അതിനെ ശക്തമായി പ്രതിരോധിക്കുമെന്നും അദ്ദേഹം വ്യക്തമാക്കി. വഴിനീളെ ബിവറേജസ് ഔട്ട്ലെറ്റുകളും ബാറുകളും തുറന്ന് ജനങ്ങളുടെ ആരോഗ്യം നശിപ്പിക്കാനുള്ള ശ്രമങ്ങൾ അപലപനീയമാണെന്നും അദ്ദേഹം കൂട്ടിച്ചേർത്തു.

പ്രകൃതിജീവനത്തിന്റെ പ്രാധാന്യം ഊന്നിപ്പറഞ്ഞ് ഡോ. ജേക്കബ് വടക്കാഞ്ചേരി

നേച്ചർ ലൈഫ് ഇന്റർനാഷണലിന്റെ സ്ഥാപകൻ ഡോ. ജേക്കബ് വടക്കാഞ്ചേരി പ്രകൃതി ഭക്ഷണശാലകൾ ആരംഭിച്ചതിനെക്കുറിച്ചുള്ള അനുഭവങ്ങൾ പങ്കുവെച്ചു. ചായയോ കാപ്പിയോ ഇല്ലാത്ത പ്രകൃതി ഭക്ഷണശാല തുടങ്ങാൻ തീരുമാനിച്ചപ്പോൾ, പ്രകൃതിജീവനത്തിന്റെ ആചാര്യൻ സി.ആർ.ആർ. വർമപോലും ഇത് തുടങ്ങരുതെന്ന് പറഞ്ഞിരുന്നതായി അദ്ദേഹം ഓർത്തെടുത്തു. എന്നാൽ, എറണാകുളത്ത് തുടങ്ങിയ 'അരുവി' എന്ന പ്രകൃതി ഭക്ഷണശാലയിൽ കൂടുതലായി എത്തിയത് യുവാക്കളായിരുന്നു. അവരുടെ അനുഭവമാണ് ഈ സംരംഭം വ്യാപിപ്പിക്കാൻ പ്രചോദനമായതെന്നും അദ്ദേഹം പറഞ്ഞു.

1996-ൽ എറണാകുളത്ത് ആരംഭിച്ച അരുവി ഹോട്ടൽ ഉദ്ഘാടനം ചെയ്തത് ഡോ. സുകുമാർ അഴീക്കോടായിരുന്നു. കൊല്ലത്തെ പ്രകൃതി ഭക്ഷണശാല വി.എസ്. അച്യുതാനന്ദൻ മുഖ്യമന്ത്രിയായിരിക്കുമ്പോൾ ഉദ്ഘാടനം ചെയ്തു. മണ്ണാർക്കാട്ടെ പ്രകൃതിചികിത്സാലയവും, ഡോ. സൗമ്യ രചിച്ച 'സുജീവിത പാചകക്കുറിപ്പുകൾ' എന്ന പുസ്തകവും ഉദ്ഘാടനം ചെയ്തത് വി.എസ്. അച്യുതാനന്ദനായിരുന്നുവെന്നും അദ്ദേഹം കൂട്ടിച്ചേർത്തു.

ചടങ്ങിൽ ബിഷപ്പ് ജോഷ്വാ ഇഗ്നത്തിയോസ് അനുഗ്രഹപ്രഭാഷണം നടത്തി. ബി. അശോക് ഐ.എ.എസ്, വാർഡ് കൗൺസിലർ ജി. മാധവദാസ്, ഡോ. എം.പി. മത്തായി എന്നിവരും മറ്റു പ്രമുഖ വ്യക്തിത്വങ്ങളും പങ്കെടുത്തു.

ബിജു കാരക്കോണം.