വി.എസ്. അച്യുതാനന്ദൻ: ഒരു പോരാളിയുടെ ജീവിതം, പ്രകൃതിയുടെ പാത : ബിജു കാരക്കോണം

2006-ൽ കേരള മുഖ്യമന്ത്രിയായി ചുമതലയേറ്റ വി.എസ്., പരിസ്ഥിതി സംരക്ഷണം, അഴിമതി വിരുദ്ധ പോരാട്ടം, കൈയേറ്റം ഒഴിപ്പിക്കൽ തുടങ്ങിയ വിഷയങ്ങളിൽ കർശന നിലപാടുകളെടുത്തു. മൂന്നാറിലെ കൈയേറ്റം ഒഴിപ്പിക്കൽ, കായൽ കൈയേറ്റങ്ങൾക്കെതിരായ നടപടികൾ എന്നിവ അദ്ദേഹത്തിൻ്റെ ഭരണകാലത്തെ പ്രധാനപ്പെട്ട തീരുമാനങ്ങളായിരുന്നു. പ്രതിപക്ഷ നേതാവായിരിക്കുമ്പോഴും ഭരണപക്ഷത്തിൻ്റെ തെറ്റുകൾക്കെതിരെ വിട്ടുവീഴ്ചയില്ലാത്ത സമീപനം സ്വീകരിച്ചു. സാധാരണ ജനങ്ങളുമായി ആഴത്തിലുള്ള ബന്ധം പുലർത്തിയ അദ്ദേഹം, വാർദ്ധക്യത്തിലും സമരമുഖങ്ങളിൽ നേരിട്ടെത്തി ജനങ്ങൾക്ക് ഐക്യദാർഢ്യം പ്രകടിപ്പിച്ചു. അഴിമതിരഹിത പൊതുജീവിതത്തിൻ്റെ പ്രതീകമായിട്ടാണ് വി.എസ്. എക്കാലത്തും വാഴ്ത്തപ്പെട്ടത്.

യോഗയും പ്രകൃതി ചികിത്സയും: വി.എസ്സിൻ്റെ ആരോഗ്യരഹസ്യം

   ആധുനിക വൈദ്യശാസ്ത്രം കൈവിട്ട സൈമൺ ബ്രിട്ടോയാണ് വി.എസ്. അച്യുതാനന്ദനെ യോഗയുടെയും പ്രകൃതി ചികിത്സയുടെയും ലോകത്തേക്ക് കൈപിടിച്ച് നടത്തിയത്. യോഗാചാര്യൻ വി.എസ്. സുധീർ, പ്രകൃതി ചികിത്സകൻ ഡോ. ജേക്കബ് വടക്കഞ്ചേരി എന്നിവരുമായുള്ള സൗഹൃദമാണ് അദ്ദേഹത്തിൻ്റെ ജീവിതത്തിൽ നിർണായകമായ വഴിത്തിരിവായത്. പുസ്തകങ്ങളിലൂടെ യോഗയെക്കുറിച്ച് മനസ്സിലാക്കിയിരുന്ന വി.എസ്സിന് സുധീർ മാഷിൻ്റെ പ്രായോഗിക പരിശീലനം ഒരു പുതിയ അനുഭവമായിരുന്നു.

   ഡോ. ജേക്കബ് വടക്കഞ്ചേരിയുടെ പ്രകൃതി ചികിത്സയിലൂടെ രോഗം ഭേദമാക്കിയ സൈമൺ ബ്രിട്ടോയുടെ അനുഭവങ്ങളും, സുധീർ മാഷിൻ്റെ പ്രകൃതി ചികിത്സയെക്കുറിച്ചുള്ള വാക്കുകളും വി.എസ്സിനെ ജേക്കബ് വടക്കഞ്ചേരിയുമായി അടുപ്പിച്ചു. മരുന്ന് മാഫിയകൾക്കെതിരെയും വിഷം കലർന്ന ഭക്ഷണങ്ങൾക്കെതിരെയും നിലകൊണ്ട ഡോ. ജേക്കബിനെ വി.എസ്. നേരിൽ കണ്ടു. ഇത് അദ്ദേഹത്തെ പ്രകൃതി ചികിത്സയുടെ പാതയിലേക്ക് നയിച്ചു. ഡോ. ജേക്കബ് അറസ്റ്റിലായപ്പോൾ അദ്ദേഹത്തെ പിന്തുണച്ച് പോലീസ് നടപടിയിൽ നിന്ന് പിന്തിരിയണമെന്ന് വി.എസ്. ശക്തമായി ആവശ്യപ്പെട്ടു. ഈ രണ്ടു വ്യക്തികളുടെയും ഇടപെടലുകളാണ് പതിവ് കമ്മ്യൂണിസ്റ്റ് ശൈലിയിൽ നിന്ന് മാറി പ്രകൃതിയെയും പരിസ്ഥിതിയെയും ചേർത്തുപിടിച്ചുള്ള ജീവിതം നയിക്കാൻ വി.എസ്സിന് കരുത്ത് നൽകിയത്.

  മുഖ്യമന്ത്രിയായിരുന്ന കാലത്ത് വി.എസ്. അച്യുതാനന്ദൻ്റെ പ്രകൃതി ഡോക്ടറായി പ്രവർത്തിക്കാൻ ഡോ. ജേക്കബ് വടക്കഞ്ചേരിക്ക് അവസരം ലഭിച്ചു. എല്ലാ ദിവസവും രാവിലെ യോഗാചാര്യനായ വി.എസ്. സുധീറിനൊപ്പം ഡോ. ജേക്കബും ഔദ്യോഗിക വസതിയിലെത്തും. യോഗയ്ക്ക് ശേഷം 20 മിനിറ്റ് ഹിപ്പ് ബാത്തും, പ്രഭാതത്തിലെ ഇളംവെയിൽ കൊള്ളലും വി.എസ്സിൻ്റെ ദിനചര്യയുടെ ഭാഗമായിരുന്നു. തുടർന്ന് ഭക്ഷണക്രമത്തെക്കുറിച്ചുള്ള നിർദ്ദേശങ്ങൾ നൽകും. കടുത്ത രാഷ്ട്രീയ കൊടുങ്കാറ്റുകൾ വീശിയടിക്കുമ്പോഴും അദ്ദേഹത്തിൻ്റെ പൾസ് നോർമലായിരുന്നു എന്ന് ഡോ. ജേക്കബ് വടക്കഞ്ചേരി ഓർക്കുന്നു.

അനീതിക്കെതിരായ വി.എസ്സിൻ്റെ ഉറച്ച നിലപാടുകൾ

  സാധാരണക്കാരനോടുള്ള വി.എസ്സിൻ്റെ സ്നേഹവും അനീതിക്കെതിരെ പോരാടാനുള്ള അദ്ദേഹത്തിൻ്റെ ദൃഢനിശ്ചയവും ഡോ. ജേക്കബ് വടക്കഞ്ചേരി അനുസ്മരിക്കുന്നു. കോഴിക്കോട് യൂണിവേഴ്സിറ്റിയിലെ സൈക്കോളജി വകുപ്പ് മേധാവി ഡോ. ജോൺ ബേബിയെ സസ്പെൻഡ് ചെയ്ത സംഭവത്തിൽ വി.എസ്. നടത്തിയ ഇടപെടൽ അതിന് ഉദാഹരണമാണ്. ക്യാൻസർ ബാധിച്ച ഒരു ദളിത് വിദ്യാർത്ഥിനിക്ക് പ്രകൃതി ഭക്ഷണ രീതികൾ നിർദ്ദേശിച്ചതിൻ്റെ പേരിൽ ഡോ. ജോൺ ബേബിക്കെതിരെ ആരോപണങ്ങൾ ഉയർന്നപ്പോൾ വി.എസ്. യൂണിവേഴ്സിറ്റിയിൽ വിളിച്ച് കാര്യങ്ങൾ അന്വേഷിച്ചു. സസ്പെൻഷൻ പിൻവലിക്കാൻ ആവശ്യപ്പെട്ടിട്ടും ഫലമുണ്ടാകാത്തപ്പോൾ, ഡോ. ജേക്കബ് വടക്കഞ്ചേരിയുടെ മുന്നിൽ വെച്ച് പോലും വി.എസ്. വീണ്ടും ഫോണെടുത്ത് ബന്ധപ്പെട്ടവരെ വിളിച്ചു. തൻ്റെ മുന്നിൽ ഒരു അനീതി കണ്ടാൽ അത് എത്ര ചെറുതായാലും വലുതായാലും അതിനെ ചെറുക്കണമെന്ന വി.എസ്സിൻ്റെ നിലപാട് അദ്ദേഹത്തിൻ്റെ നന്മയുള്ള മനസ്സിനെയാണ് കാണിക്കുന്നത്.

   പ്രകൃതി ഭക്ഷണങ്ങളുടെ വലിയൊരു ആരാധകനായിരുന്നു വി.എസ്. കൊല്ലത്ത് ഡോ. ജേക്കബ് വടക്കഞ്ചേരിയുടെ പ്രകൃതി ഹോട്ടൽ ജില്ലാ പഞ്ചായത്തുമായി ചേർന്ന് തുടങ്ങിയപ്പോൾ അതിൻ്റെ ഉദ്ഘാടനം നിർവഹിച്ചത് വി.എസ്. ആയിരുന്നു.

   വൈപ്പിൻകരയിലെ പാർട്ടിക്കാർ പോലും വി.എസ്. എത്തുമെന്ന് പ്രതീക്ഷിക്കാത്ത തന്റെ വിവാഹത്തിൽ അദ്ദേഹം പങ്കെടുത്തതും ഡോ. ജേക്കബ് ഓർക്കുന്നു. ഡോക്ടർ ജേക്കബിൻ്റെയും ഡോക്ടർ സൗമ്യയുടെയും വിവാഹം എറണാകുളത്ത് ഗാന്ധിഭവനിലെ ചെറിയൊരു ഹാളിൽ വെച്ച് നടന്നപ്പോൾ വി.എസ്സിനെ പുറത്താക്കാനുള്ള പാർട്ടി യോഗം ഡൽഹിയിൽ നടക്കുകയായിരുന്നു. മറ്റുള്ളവർ വരില്ലെന്ന് കരുതിയ വിവാഹ സൽക്കാരത്തിൽ വൈകിട്ടത്തിയ വി.എസ്. നവദമ്പതികളെ ആശീർവദിച്ചു. തന്റെ ജീവിതത്തിലെ ജീവിതത്തിലെ മാറക്കാൻ കഴിയാത്ത പല നല്ല നിമിഷങ്ങളിൽ ഒന്നായിരുന്നു അത് എന്ന് ജേക്കബ് വടക്കഞ്ചേരി കരുതുന്നു .

ഒരു യുഗത്തിൻ്റെ അടയാളം

  വി.എസ്. അച്യുതാനന്ദൻ്റെ 102 വർഷം നീണ്ട ജീവിതത്തിൽ യോഗയും പ്രകൃതി ചികിത്സയും അദ്ദേഹത്തിന് നൽകിയ ഊർജ്ജവും ആരോഗ്യവും ചെറുതല്ല. യോഗ ശരീരത്തിന് വഴക്കവും ശക്തിയും നൽകിയപ്പോൾ പ്രകൃതി ചികിത്സ ശരീരത്തെ വിഷമുക്തമാക്കി. ഇത് അദ്ദേഹത്തിൻ്റെ ദീർഘായുസ്സിൽ വലിയ പങ്കുവഹിച്ചു. ആധുനിക വൈദ്യശാസ്ത്രത്തെ മാത്രം ആശ്രയിക്കാതെ, യോഗാഭ്യാസത്തിലൂടെയും പ്രകൃതിജീവനത്തിലൂടെയും അദ്ദേഹം തൻ്റെ രോഗപ്രതിരോധ ശേഷി വർദ്ധിപ്പിച്ചു.

   മറ്റൊരു കമ്മ്യൂണിസ്റ്റ് നേതാവിനും സാധിക്കാത്ത തരത്തിൽ വാർദ്ധക്യത്തിലും ഊർജ്ജസ്വലനായി ഇരിക്കാൻ വി.എസ്സിന് സാധിച്ചത് അദ്ദേഹത്തിൻ്റെ ഈ ജീവിതശൈലി കാരണമാണെന്ന് നിസ്സംശയം പറയാം. വി.എസ്. അച്യുതാനന്ദൻ എന്ന വ്യക്തി ഒരു രാഷ്ട്രീയ നേതാവിനപ്പുറം ഒരു യുഗത്തിൻ്റെ അടയാളമാണ്. അദ്ദേഹത്തിൻ്റെ വിയോഗം കേരളത്തിൻ്റെ പൊതുമണ്ഡലത്തിൽ വലിയൊരു ശൂന്യത സൃഷ്ടിക്കുമെങ്കിലും, അദ്ദേഹം ഉയർത്തിപ്പിടിച്ച മൂല്യങ്ങളും സമരവീര്യവും എന്നും വരും തലമുറയ്ക്ക് പ്രചോദനമായിരിക്കും. അതോടൊപ്പം അദ്ദേഹം പിന്തുടർന്ന ഭക്ഷണ രീതികളും ജീവിത ചിട്ടകളും എല്ലാ തലമുറയ്ക്കും ഒരു മാതൃകയാണ്.

ബിജു കാരക്കോണം.