സമരപോരാട്ടങ്ങൾ കൊണ്ട് അടയാളപ്പെടുത്തിയ ജീവിതമായിരുന്നു സഖാവ് വി. എസിന്റേത്:എം .പി .സൂര്യദാസ്

 സമരപോരാട്ടങ്ങൾ കൊണ്ട് അടയാളപ്പെടുത്തിയ ജീവിതമായിരുന്നു സഖാവ് വി. എസിന്റേത് :എം .പി .സൂര്യദാസ് 

അഴിമതി ക്കെതിരായ വിട്ടുവീഴ്ചയില്ലാത്ത നിലപാടുകൾ വി. എസ് എന്ന നേതാവിനെ എങ്ങനെ വ്യത്യസ്തനാക്കി എന്നത് ഓർമപ്പെടുത്തുന്നതാണ് 2002 ലെ ആ സംഭവം.

അടച്ചുപൂട്ടിയ മാവൂർ ഗ്രാസിം കമ്പനിയിൽ ഉണ്ടായിരുന്ന 1.30ലക്ഷം മെട്രിക് ടൺ മുള ടെൻഡർ നടപടികൾ കൃത്യമായി പാലിക്കാതെ അന്നത്തെ വനം വകുപ്പ് മേധാവികൾ തുച്ഛമായ വിലയ്ക്ക് വിറ്റതിലൂടെ സർക്കാരിന് കോടികൾ നഷ്ടമുണ്ടാക്കിയെന്ന എന്റെ വാർത്ത 2002 ജൂൺ 29 ന് വന്നത് വലിയ വിവാദമായി.

വാർത്ത വന്നതിന് തൊട്ടടുത്ത ദിവസം അന്നത്തെ മേപ്പയൂർ എം. എൽ. എ സഖാവ് മത്തായി ചാക്കോ വിളിച്ചു.

വാർത്തയ്ക്ക് ആധാരമായ രേഖകൾ തരാമോ എന്ന് ചോദിച്ചായിരുന്നു വിളി. മാവൂർ ഗ്രാസിം കമ്പനിയുടെ 10 ഗോഡൗണുകളിലായി സൂക്ഷിച്ച മുള ലേലം ചെയ്തതിന്റെ എല്ലാ രേഖകളും കൈമാറി.

രണ്ടുദിവസം കഴിഞ്ഞ് നിയമ സഭയിൽ ഈ വിഷയം കോടികളുടെ അഴിമതിയാരോപണമായി മത്തായി ചാക്കോ ഉന്നയിച്ചു.

അന്നത്തെ വനം മന്ത്രി കെ. സുധാകരനും മത്തായി ചാക്കോയും തമ്മിൽ വാക്പോരായി.

റീ ടെൻഡർ വേണമെന്നായിരുന്നു പ്രതിപക്ഷത്തിന്റെ ആവശ്യം. റീ ടെൻഡർ നടത്തിയാൽ ഇപ്പോൾ കിട്ടിയ തുക പോലും കിട്ടില്ലെന്ന്‌ ഭരണപക്ഷം.

പ്രതിപക്ഷ നേതാവ് വി. എസ് നേരിട്ട് പ്രശ്നം ഏറ്റെടുത്തു. ഇതിനിടെ വിഷയം പൊതു താല്പര്യ ഹർജിയായി ഹൈ കോടതി പരിഗണിച്ചു.

റീ ടെൻഡർ നടത്താൻ ഉത്തരവായി.

ഇതിനിടെ ഒരു ദിവസം മത്തായി ചാക്കോ വീണ്ടും വിളിച്ചു. " നാളെ രാത്രി പ്രതിപക്ഷ നേതാവ് വി. എസ് കോഴിക്കോട് ഗസ്റ്റ് ഹൌസിൽ ഉണ്ട്. മാവൂർ ഗ്രാസിം വാർത്തയുടെ കൂടുതൽ വിവരം അറിയാൻ അദ്ദേഹത്തിന് താല്പര്യമുണ്ട്.

രാത്രി എട്ട് മണിക്കു ശേഷം ഗസ്റ്റ് ഹൌസിൽ കാണാം " എന്ന് പറഞ്ഞു. എന്റെ പത്രപ്രവർത്തന ജീവിതത്തിലെ അപൂർവ നിമിഷമായിരുന്നു അത്.

1994 ൽ ഇടതുപക്ഷ വിദ്യാർത്ഥി സംഘടനകളുടെ നേതൃത്വത്തിൽ ഉജ്ജ്വല സമരം നടക്കുമ്പോൾ എൽ ഡി. എഫ് കൺവീനറായിരുന്നു വി. എസ്. ആദ്യമായി വി. എസിനെ നേരിൽ കാണുന്നതും സംസാരിക്കുന്നതും അന്നാണ്.

സമരത്തിന്റെ ഒരു ഘട്ടത്തിൽ ഇടത് വിദ്യാർത്ഥി നേതാക്കളുമായി എ. കെ. ജി സെന്ററിൽ വി. എസ് വിളിച്ചുചേർത്ത യോഗത്തിൽ പങ്കെടുത്തതു ൾപ്പെടെ പഴയ സംഭവങ്ങളൊക്കെ അപ്പോൾ മനസിലൂടെ കടന്നുപോയി.

മത്തായി ചാക്കോ പറഞ്ഞതുപ്രകാരം ഗസ്റ്റ് ഹൌസിൽ എത്തി. എ. പ്രദീപ്കുമാറും മത്തായി ചാക്കോയോടൊപ്പം ഉണ്ടായി.

കണ്ണൂരിൽ നിന്ന് വി. എസ് ഗസ്റ്റ് ഹൌസിൽ എത്താൻ ഒരു മണിക്കൂറോളം വൈകി. അദ്ദേഹം മുറിയിൽ കയറി അധികം കഴിയും മുൻപേ, മത്തായി ചാക്കോ എന്റെ കൈയ്യും പിടിച്ച് മുറിയിലേക്ക് കടന്നു.

പഴയ വിദ്യാർത്ഥി സമരം ആമുഖമായി പരാമർശിച്ചാണ് മത്തായി ചാക്കോ എന്നെ വി. എസിന് പരിചയപ്പെടുത്തിയത്.

പിന്നീട് ഒരു മണിക്കൂറോളം അടച്ചിട്ട മുറിയിൽ ഇരുന്ന് വി. എസ് ലേലത്തിന്റെ എല്ലാ രേഖകളും പരിശോധിച്ചു.

കുറെ കാര്യങ്ങൾ ചോദിച്ചറിഞ്ഞു. "മുള ചീഞ്ഞളിഞ്ഞതാണ് എന്നാണല്ലോ നിയമസഭയിൽ മന്ത്രി പറഞ്ഞത്.

താങ്കൾ ഈ മുള ഗോഡൗണിൽ പോയി കണ്ടിരുന്നോ " അദ്ദേഹം ചോദിച്ചു. നല്ല മുളയാണെന്ന് ഞാൻ പറഞ്ഞു.

. എങ്കിൽ നമുക്ക് അവിടെ പോയി മുള പരിശോധിക്കണം എന്നായി വി എസ്. എന്നാണ് വരിക എന്ന് മത്തായി ചാക്കോ അറിയിക്കും എന്നും പറഞ്ഞു .ഇതുപോലുള്ള വിഷയം ഇനിയും പുറത്തുകൊണ്ടുവരണം എന്ന് പറഞ്ഞാ ണ് എന്നെ പറഞ്ഞയച്ചത്.

മുളയുടെ ഗുണമേന്മ പരിശോധിക്കാനായി 2002 ഓഗസ്റ്റ് 15 ന് വി. എസ് കോഴിക്കോടെത്തി.

ചെറുപ്പക്കാരായ മാധ്യമ പ്രവർത്തകരെയും പാർട്ടി പ്രവർത്തകരെയും പിന്നിലാക്കി 78 വയസുള്ള വി. എസ് മാവൂരിലെ ഗോഡൗണിലേക്ക് ഓടി ക്കയറി.

വെട്ടു കത്തി എടുത്തു വലിയൊരു മുള മുറിച്ചു കൊണ്ട് വി. എസ് പറഞ്ഞു, ഇതാണോ ചീഞ്ഞളിഞ്ഞ മുള ?

വിഷയം നിയമ സഭ സമിതിയെ കൊണ്ട് അന്വേഷിപ്പിക്കണം എന്ന് അവിടെവെച്ഛ് ആവശ്യപ്പെടുമ്പോൾ വി. എസ് അക്ഷരാർത്ഥത്തിൽ രോഷം കൊള്ളുകയായിരുന്നു.

ഒടുവിൽ വീണ്ടും ലേലം ചെയ്യാൻ സർക്കാർ നിർബന്ധിതമായി.

കോടികൾ അധികം നൽകി ലേലം കൊള്ളാൻ ചില കമ്പനികൾ വന്നു.

ഒരു വിഷയം ഏറ്റെടുക്കുക മാത്രമല്ല,അതിൽ നീതി നടപ്പാക്കാനും തെറ്റ് തിരുത്തിക്കാനും അവസാനം വരെ പൊരുതും എന്നതാണ് വി. എസിനെ വ്യത്യസ്തനാക്കുന്നത്.വിപ്ലവ നായകന് വിട.