അച്ഛൻ എൻ്റെ ജീവിതത്തിൻ്റെ വെളിച്ചമാണ് , കരുത്താണ്. അച്ഛനെൻ്റെ ഗുരുവാണ്. അച്ഛനെൻ്റെ എല്ലാമാണ് : - മുല്ലപ്പള്ളി രാമചന്ദ്രൻ

അച്ഛൻ എൻ്റെ ജീവിതത്തിൻ്റെ വെളിച്ചമാണ് , കരുത്താണ്. അച്ഛനെൻ്റെ ഗുരുവാണ്. അച്ഛനെൻ്റെ എല്ലാമാണ് .....

:  മുല്ലപ്പള്ളി രാമചന്ദ്രൻ

അച്ഛൻ ഞങ്ങളെ വിട്ട് പോയിട്ട് ഇന്നേക്ക് 25 വർഷം.

ഒരു ജന്മം മുഴുവൻ നാട്ടിനായി, നാട്ടുകാർക്കായി എരിഞ്ഞു കത്തിയ ഒരു ജീവിതം. 

മരണ ദിവസം ആളും ആരവും ആചാര വെടിയുമുണ്ടായിരുന്നു.

ഒരുപാട് സമുന്നത വ്യക്തികൾ രാഷ്ട്രീയം മറന്ന് ഓടിയെത്തി. വന്നവരോട് വിളിച്ചവരോട് എല്ലാവരോടും നന്ദിയുണ്ട്.

അമ്മയും അച്ഛൻ്റെ സുഹൃത്തുക്കളും പറഞ്ഞു കേട്ടിട്ടുണ്ട് നട്ടെല്ലുള്ള അച്ഛനെ കുറിച്ച്. ചോമ്പാലിലെ ബാസൽ മിഷ്യൻ ബംഗ്ളാവിനോട് ചേർന്ന് സ്ഥാപിക്കപ്പെട്ട എം.എസ്സ്. പി. ക്യാമ്പിൽ പിടിച്ചു കൊണ്ടു പോയി ദിവസങ്ങളോളം ക്രൂരമായി മർദ്ദിച്ചത്.

അന്ന് എം.എസ്.പി. ക്കാരനായ, പിന്നീട് ആർ.പി.എഫ്. ൽ ജോലി നോക്കിയ നെല്ലാച്ചേരിക്കാരൻ നമ്പ്യാർ അച്ഛനെ കുറിച്ച് പലരോടും പറഞ്ഞു - ഒരക്ഷരം പറയിപ്പിക്കാൻ മലബാർ സ്പെഷൽ പോലിസ്സിന്ന് കഴിഞ്ഞില്ല. ആരാണ് റയിൽപ്പാളം വലിച്ചത്, ആരാണ് ടെലഫോൺ കമ്പികൾ മുറിച്ചത്. ഒറ്റ ഉത്തരം മാത്രം. "എനിക്കറിയില്ല".

അവസാനം ജീവച്ഛവമായി വിട്ടയച്ചു. ക്വിറ്റ് ഇന്ത്യ പ്രക്ഷോഭ കാലമായിരുന്നു. പോലീസിൻ്റെ കണ്ണ് വെട്ടിച്ച് മാത്രം വീട്ടിൽ വരും.

പതിവായി മലബാർ സ്പെഷൽ പോലീസ് രാത്രികാലങ്ങളിൽ വീട്ടിലെത്തും. അമ്മയും അച്ഛമ്മയും മാത്രം വീട്ടിലുണ്ടാകും.

അച്ഛനെ അന്വേഷിക്കും.വാതിൽ ചവുട്ടി തുറക്കുമെന്ന് ആക്രോശിച്ച്, വൃത്തികെട്ട ഭാഷയിൽ ഭീഷണിപ്പെടുത്തും.   

സ്വാതന്ത്ര്യ സമരത്തിൽ പങ്കെടുത്ത് ശിക്ഷിക്കപ്പെട്ട് കണ്ണൂർ സെൻ്ട്രൽ ജയിലിലും കോഴിക്കോട് ജയിലിലും തടവുകാരനായി കിടന്നു.

 മയ്യഴി വിമോചന സമരത്തിൽ പങ്കെടുത്ത് 20 വർഷത്തിലേറെ ശിക്ഷിക്കപ്പെട്ടവരുടെ കൂട്ടത്തിൽ അച്ഛൻ്റെ പേരും കണ്ടു. 

 മയ്യഴി ഗാന്ധി ഐ. കെ. കുമാരൻ മാസ്റ്റർ, പില്കാലത്ത് പോണ്ടിച്ചേരി വിദ്യാഭ്യാസമന്ത്രിയായ സി.ഇ. ഭരതേട്ടൻ , സി.കെ. ഗോവിന്ദൻ നായർ, വി.പി. കുഞ്ഞിരാമകുറുപ്പ്, കെ. കുഞ്ഞിരാമ കുറുപ്പ്, എം.കൃഷ്ണേട്ടൻ, തറമ്മൽ കൃഷ്‌ണേട്ടൻ, തുടങ്ങിയ നിരവധി സ്വാതന്ത്ര്യ സമര നായകന്മാർ വീട്ടിൽ പതിവായി വരും.

അച്ഛനെ കുറിച്ചുള്ള ഒരു പാട് കഥകൾ ഞങ്ങളോട് പങ്കു വെച്ച കെ. കുഞ്ഞിരാമ കുറുപ്പിൻ്റെ ഭാര്യാ സഹോദരൻ, മറ്റൊരു പോരാളിയായ കുഞ്ഞിക്കണ്ണ കറുപ്പ് .  

പാമ്പള്ളി ആണ്ടിയേട്ടൻ, എം.കെ. കുഞ്ഞിരാമൻ തുടങ്ങി എത്രയെത്ര സമര ഭടൻമാർ. 

 ഇവർ സഹിച്ച കഷ്ടപ്പാടുകൾ, പീഢനങ്ങൾ ഏറെ വലുതായിരുന്നു.

സ്വാതന്ത്ര്യത്തിൻ്റെ വിലയറിയണമെങ്കിൽ ഇവർ സഹിച്ച ത്യാഗങ്ങൾ അറിയണം.  

അയിത്തത്തിനും ജാതി ചിന്തയ്ക്കും എതിരെ ചെറുത്തു നിൽപ്പ് നടത്തിയ അച്ഛൻ, ചോമ്പാലിലെ ക്രൈസ്തവ - മുസ്ലിം സഹോദരങ്ങൾക്ക് വിശ്വസ്തനായി എന്നും നിലക്കൊണ്ടു.

 ഞാൻ വിവാഹിതനായ ശേഷം ഐ.കെ. കുമാരൻ മാസ്റ്ററെ കാണാൻ അച്ഛനോടൊപ്പം എൻ്റെ ഭാര്യ മയ്യഴിയിൽ പോയപ്പോൾ കുമാരൻ മാസ്റ്ററാണ് അച്ഛനെ കുറിച്ചു പറഞ്ഞത്.

അച്ഛൻ്റെ ധൈര്യം, നിലപാട്. ആരെയും ഭയപ്പെടാത്ത പ്രകൃതം.

ഞങ്ങൾ വളർന്നപ്പോൾ ഒന്നും ഇല്ലായിരുന്നു. ഒടുവിൽ ഒരു വീടും പറമ്പും മാത്രം. പണ്ഡിറ്റ് ജിയുടെ ചോമ്പാൽ സന്ദർശനവുമായി ബന്ധപ്പെട്ട കട ബാധ്യതകൾ. അവധി പറഞ്ഞു മടുത്തപ്പോൾ, അമ്മ പോലുമറിയാതെ ആ വീടും പറമ്പും വിറ്റു. 

 കുടുംബം വഴിയാധാരം.തകർച്ചയിലും അച്ഛന് ധൈര്യം പകർന്ന അമ്മ.

 അച്ഛൻ ആരാണെന്ന് 'നഷ്ടജാതക'ത്തിൽ കൃത്യമായി പുനത്തിൽ കുഞ്ഞബ്ദുള്ള രേഖപ്പെടുത്തി.

ഒരു പാട് നല്ല കാര്യങ്ങൾ മാത്രം പറയുകയും പഠിപ്പിക്കുകയും ചെയ്ത അച്ഛൻ.

  ബിരുദവു ബിരുദാനന്തര ബിരുദവും എങ്ങിനെ നേടിയെന്നും, കോഴിക്കോട് ലോ കോളെജിൽ എങ്ങിനെ പഠിച്ചുവെന്നും ഓർക്കുമ്പോൾ ഇന്ന് വിസ്മയം തോന്നുന്നു.

 രാഷ്ട്രീയത്തിൽ സജീവമായപ്പോൾ അച്ഛനും അമ്മയും വിലക്കിയില്ല. 

  ഒരു പാട് കഷ്ടപ്പെട്ട് പഠിപ്പിച്ച അച്ഛൻ എൻ്റെ ജീവിതത്തിൻ്റെ വെളിച്ചമാണ് , കരുത്താണ്.

അച്ഛനെൻ്റെ ഗുരുവാണ്. അച്ഛനെൻ്റെ എല്ലാമാണ് . അച്ഛൻ കാണിച്ച വഴിയിലൂടെയാണ് ഓരോ ദിവസവും മുന്നോട്ടു പോകുന്നത്. 

പ്രിയപ്പെട്ട അച്ഛാ, 25 വർഷം- ഒരു ദിവസം പോലും ഓർക്കാതിരുന്നിട്ടില്ല.

     - മുല്ലപ്പള്ളി രാമചന്ദ്രൻ