ഇടപെടലുകൾ സാധാരണ ആളുകളുടെ പ്രതികരണങ്ങളാകണം : സത്യൻ മാടാക്കര .

ഇടപെടലുകൾ സാധാരണ

ആളുകളുടെ പ്രതികരണങ്ങളാകണം

:സത്യൻ മാടാക്കര .

എല്ലാവർക്കും ബാധകമായ നിത്യജീവിതത്തിലെ നിരവധി പ്രശ്നങ്ങളുണ്ട്. റേഷൻ കടയിൽ എന്തു കൊണ്ട് മണ്ണെണ്ണ വേണ്ട സമയത്ത് ലഭിക്കുന്നില്ല. റോഡ് ഉണ്ടാക്കാൻ ലേലം എടുത്തവർ അതു താറുമാറാക്കി യാത്ര എന്തുകൊണ്ട് ദുസ്സഹമാക്കുന്നു. കടൽ ഭിത്തികെട്ടി അവിടെ പാർക്കുന്നവരെ സംരക്ഷിക്കാൻ പഞ്ചായത്തിനും, ഫിഷറീസ് വകുപ്പിനും ബാധ്യതയില്ലേ. പാർട്ടിക്ക് സ്വാധീനമുള്ളിടത്തു മാത്രം എന്തെങ്കിലും ചെയ്യുക എന്നതാണോ ജനപ്രതിനിധിയായി തെരഞ്ഞെടുക്കുന്നതിന്റെ അർത്ഥം. മായം ചേർത്ത സാധനങ്ങൾ (വെളിച്ചെണ്ണ, കറി മസാല, നിത്യോപയോഗ സാധനങ്ങൾ) നിർലോഭം കടകളിലൂടെ വിറ്റഴിക്കപ്പെടുമ്പോൾ അത് നിരീക്ഷിക്കാനും, പരിശോധിക്കാനും, പിഴ ചുമത്താനും ശ്രമിക്കേണ്ടഉദ്യോഗസ്ഥർ അത് നിറവേറ്റുന്നുണ്ടോ ! മനുഷ്യപ്പറ്റിന്റെ ലോകം ചെറുതായി വരുന്നു. ഇതാരുo ചർച്ചയാക്കുന്നില്ല.ആ മറവിൽ രോഗിയെ മൾട്ടിനേഷണൽ ഹോസ്പിറ്റൽ പണം തീരുവോളം ചികിത്സയുടെ പേരിൽ മരുന്ന് തീറ്റിച്ചാലും, ഭക്ഷ്യവസ്തുക്കൾ മായം കലർത്തി പരസ്യം മുഖേന സൂപ്പർ മാർക്കറ്റിൽ വിലക്കുറവ് പറഞ്ഞ് ആകർഷിച്ച് വിറ്റാലും, വെളിച്ചെണ്ണം മായം കലർത്തി പായ്ക്കറ്റിൽ എത്തിയാലും,- ശരീരത്തിന് മാരകരോഗം വരുത്തുന്ന വിഷവസ്തുക്കൾ അടിച്ച് എത്തുന്ന പചക്കറികൾ, മത്സ്യം നിത്യേന ലോറിയിൽ നിന്ന് വില്പനക്ക് ഇറക്കിയാലും ആർക്കും പ്രശ്നമില്ല. ഈ അടിയറവ് തിരിച്ചറിയുക എന്നിടത്താണ് നമ്മൾ മനുഷ്യപ്പറ്റുള്ളവരായി മാറുക.

ഇങ്ങനെ നിത്യജീവിതവുമായി ബന്ധപ്പെട്ട പാൽ, പഴങ്ങൾ, മത്സ്യം, കോഴി ഗുണനിലവാരം ഉറപ്പു വരുത്തി സാധാരണക്കാരന് ലഭിക്കേണ്ട പ്രതിരോധമാണ്, ബദൽ ഷോപ്പുകളിലൂടെയുള്ള മാതൃകകളാണ് ആവശ്യം. അത് പറയാൻ വലിയ പദവിയൊന്നും വേണ്ടതില്ല. ഇന്ത്യൻ പൗരനായ ആർക്കും പറയാം. എന്തു ചെയ്യാനാണ് അവസരവാദം എല്ലാം റദ്ദ് ചെയ്യുന്നു. ഇവിടെയാണ് പൗരൻ, ഉപഭോക്താവ്,കച്ചവടക്കാരൻ എന്നിവയുടെ വ്യത്യാസം മനസ്സിരുത്തി തിരിച്ചറിഞ്ഞു പ്രവർത്തിക്കേണ്ടത്.

അങ്ങനെ നടന്ന അവകാശ സമരങ്ങളാണ് ഇന്നത്തെ കേരളം. നവോത്ഥാനകാലത്ത് നടന്ന ചാന്നാർ ലഹള നോക്കുക:

പതിനെട്ടാം നൂറ്റാണ്ടിന്റെ അവസാന കാലം തിരുവിതാംകൂറിൽ നാടാർ സമുദായത്തിൽപ്പെട്ട സ്ത്രീകൾ നടത്തിയ സമരമാണ് മാറ് മറക്കൽ സമരം. ലഹള നീണ്ടു നിന്നപ്പോൾ 1859 ജൂലൈ 6 ന് ഉത്രം തിരുനാൾ ഇപ്രകാരം ഒരു വിളംബരം പുറപ്പെടുവിച്ചു. "ചാന്നാർ സ്ത്രീകൾക്ക് ആഭിജാത്യ ബോധമനുസരിച്ച് ഏതു തരത്തിലും വസ്ത്രം ധരിച്ച് നഗ്നത മറയ്ക്കുന്നതിനുള്ള പൂർണ്ണ സ്വാതന്ത്ര്യം ഇതിനാൽ അനുവദിച്ചിരിക്കുന്നു. എന്നാൽ അവർ ഉന്നത കുലജാതിയിലെ സ്ത്രീകളുടെ വസ്ത്രങ്ങളെ അനുകരിക്കാൻ പാടില്ലാത്തതാകുന്നു "

എന്നാൽ ഉയർന്ന ജാതിക്കാരെ അനുകരിക്കരുത് എന്ന പ്രസ്താവന മദ്രാസ് ഗവർണർക്ക് ഇഷ്ടമായില്ല.( സർ . ചാൾസ്.ടി. വില്യം.). അങ്ങനെ ബ്രട്ടീഷ് അധികാരികളുടെ നിർബന്ധത്തിന് വഴങ്ങി തിരുവിതാംകൂർ മഹാരാജാവ് വ്യവസ്ഥ പിൻവലിച്ചു