ജാതി വിഭാഗീയത, വർഗ്ഗീയത തള്ളിപ്പറഞ്ഞേ പറ്റൂ - സത്യൻ മാടാക്കര .

ജാതി വിഭാഗീയത, വർഗ്ഗീയത

തള്ളിപ്പറഞ്ഞേ പറ്റൂ - സത്യൻ മാടാക്കര .

പല തരത്തിലാണ് ജാതി മനുഷ്യരിൽ പ്രവർത്തിക്കുന്നത്. ഓഫീസിൽ നിറം, അവഗണനയായി - താഴ്ന്ന ജാതിക്കാരൻ ഇരുന്ന കസേര ശുദ്ധികലശം ചെയ്യുന്ന രീതിയിൽ, മകനും മകൾക്കും വിവാഹം ഉറപ്പിക്കാൻ സ്വന്തം ജാതി വേണമെന്ന രക്ഷിതാക്കളുടെ ജാതി ശാഠ്യം, ജാതി വിഭാഗീയതയെക്കുറിച്ച് നടന്ന ഇന്റർവ്യൂ കോളേജ് (സ്വകാര്യ ) മാഗസീനിൽ നിന്ന് ഒഴിവാക്കിയത്, ഓരോ ജാതി, മതക്കാർക്കും അതാത് ജാതി എഴുത്തുകാർ നിറഞ്ഞ ചീത്തക്കാലം. അങ്ങനെ ജാതിക്ക് ഒരു നാട്ടു ശബ്ദതാരാവലി തന്നെ എഴുതിയുണ്ടാക്കാനാവും.

റാം മനോഹർ ലോഹ്യ ജാതിയെക്കുറിച്ച് എഴുതിയത് എത്ര വാസ്തവം.

" ഇന്ത്യൻ ജീവിതങ്ങളിൽ ജാതിയാണ് ഏറ്റവും പ്രധാന ഘടകം.തത്ത്വത്തിൽ അതിനെ നിഷേധിക്കുന്നവർ പോലും പ്രായോഗിക ജീവിതത്തിൽ അംഗീകരിക്കുന്നു. ജനനം, മരണം, വിവാഹം, വിരുന്നുകൾ, മറ്റ് ആചാരങ്ങൾ എന്നിങ്ങനെയുള്ള പ്രധാനപ്പെട്ട ജീവിത ഘടകങ്ങളെല്ലാം ജാതിയുടെ ചട്ടക്കൂടിലാണ് പ്രവർത്തിക്കുന്നത്. ഒരേ ജാതിയിൽപ്പെട്ടവർ ഈ നിർണായക പ്രവർത്തനങ്ങളിൽ പരസ്പരം സഹായിക്കുന്നു. ജാതിവ്യവസ്ഥയ്ക്ക് ഭയാനകമായ സ്ഥിരതയുടെ ശക്തിയുണ്ട്. അത് മാറ്റങ്ങളെ എതിർക്കുന്നു. നിലവിലുള്ള എല്ലാ അപമാനങ്ങളെയും നുണകളെയും അത് ഉറപ്പിച്ച് നിർത്തുന്നു.തങ്ങളുടെ രാഷ്ട്രീയവും സാമ്പത്തികവും മതപരവുമായ മേൽക്കോയ്മ നിലനിർത്തുന്നതിന്റെ കാര്യത്തിൽ ഉയർന്ന ജാതിക്കാർ പ്രതിജ്ഞാബദ്ധരാണ്. തോക്കിൻ കുഴലിലൂടെ ഒറ്റയടിക്ക് അവർക്കത് നേടിയെടുക്കാൻ സാധിക്കില്ല. തങ്ങൾ ഭരിക്കാനും ചൂഷണം ചെയ്യാനും ശ്രമിക്കുന്നവർക്കിടയിൽ അപകർഷബോധം വളർത്തിയെടുത്തു കൊണ്ടാണ് അവരാ ലക്ഷ്യങ്ങൾ പൂർത്തീകരിക്കുന്നത്. "

( റാം മനോഹർ ലോഹ്യ)

നാരായണ ഗുരു പറയുന്നു:

പേരൂരു തൊഴിലീ മൂന്നും

പോരുമായതു കേൾക്കുക

ആരുനീയെന്നു കേൾക്കേണ്ടാ

നേരുമെയ് തന്നെ ചൊൽകയാൽ

( ഒരാളെ കണ്ടുമുട്ടിയാൽ പേരെന്താണ്, നാടേതാണ്, തൊഴിലെന്താണ് ഈ മൂന്നു ചോദ്യങ്ങളും ചോദിച്ചാൽ മതിയാകും. പരിചയപ്പെടാനായി അവ ചോദിക്കുക. നിന്റെ ജാതിയെന്താണ് എന്ന് ചോദിക്കരുത്. അയാൾ മനുഷ്യജാതിയിൽപ്പെട്ടവനാണെന്ന സത്യം ശരീരത്തിന്റെ ആകൃതി തന്നെ വ്യക്തമാക്കിത്തരുന്നുണ്ടല്ലോ.

വ്യാഖ്യാനം: പ്രൊഫ.ജി.ബാലകൃഷ്ണൻ നായർ)

അതുകൊണ്ട് ചരട് കെട്ടിച്ച് യുവാക്കളെ വശീകരിക്കുന്നവർ, വർഗ്ഗീയതയുടെ വളർച്ചാ ആധിക്യത്തിന് കൂട്ടുനില്കുന്നവർ, മഹാന്മാരെ ജാതിക്കൊപ്പം കൂട്ടി മാനവികത പ്രസംഗിക്കുന്നവർ എന്നിവർക്കൊപ്പമല്ല നമ്മൾ അണി ചേരേണ്ടത്. ശ്രീരാമനൊപ്പം തന്നെ സ്ത്രീകൾക്കെല്ലാം പ്രിയങ്കരനായ ശ്രീകൃഷ്ണനെന്ന അവതാര കാമുകനെയാണ് എനിക്കിഷ്ടം. യൗവനത്തെ തീയിൽ നടത്തിക്കുന്ന ചങ്കുറപ്പുളള, ഹവാന ചുരുട്ട് വലിക്കുന്ന ചെഗുവേര ചിത്രമാണ് എനിക്കിഷ്ടപ്പെട്ട രാഷ്ട്രീയ പോസ്റ്റർ .( അറിഞ്ഞോ, അറിയാതെയോ അറബി ച്ചെറുപ്പക്കാർ കാറിന്റെ ഗ്ലാസ്സിൽ ചെഗുവേര സ്റ്റിക്കർ ഒട്ടിക്കുന്നു - തൊപ്പി തലയിൽ വെച്ച് നടക്കുന്നു)

ചരിത്രബോധമില്ലായ്മ കീഴ്പ്പെടുത്തരുത്. പല മതക്കാർ ഒന്നിച്ചു ജീവിക്കുന്ന ബഹുസ്വരത, സാഹോദര്യ വിശാല ജീവിതം അത് ആഗ്രഹിക്കുന്നില്ല. രാഷ്ട്രീയമായ ചലനങ്ങളും കീഴാള സമരങ്ങളും നിറഞ്ഞ നവോത്ഥാനകാലഘട്ടം തിരിച്ചറിയാതെ വായിൽ വന്നത് വിളിച്ചു കൂവിയാൽ സംഘർഷങ്ങൾ, ധ്രുവീകരണം പാവം സാമൂഹൃതയിൽ വരുത്തുമെന്നതിന് ഒട്ടനവധി തെളിവുകൾ ഉണ്ട്. ജനാധിപത്യവും സമത്വാദർശവും വികസിപ്പിക്കേണ്ടിടത്ത് മന്ദബുദ്ധിയായി ഒതുങ്ങിപ്പോകാൻ പാടില്ല. ജനവിരുദ്ധ ചിന്തകളല്ല ജനപക്ഷ സംവാദങ്ങൾ നിലനില്ക്കണം. ജനസഞ്ചയത്തിന്റെ കാഴ്ച, ഭാഷ, സാഹിത്യം ധാർമ്മികമായതും സമഭാവന കലർന്നതുമായ ലിറ്റററി അവാസവ്യവസ്ഥ തേടാതിരിക്കില്ല. ഉത്തര ത്തോടൊപ്പം നമുക്ക് ചോദ്യങ്ങളും അന്വേഷിക്കേണ്ടതുണ്ട്.