ചിറയിൽ പീടികയിലെ റോഡിൽ കണ്ടെത്തിയ ഭൂഗർഭ അറ എന്താണ് ? :ഡോക്ടർ കെ കെ എൻ കുറുപ്പ്

ഒരു വർഷത്തോളമായത്രേ ഇവിടെ ഇങ്ങനെ ഒരു തുരങ്കം രൂപപ്പെട്ടതായി കാണാൻ തുടങ്ങിയിട്ട് .

എന്നാൽ ബന്ധപ്പെട്ട അധികൃതരുടെ അടിയന്തര ശ്രദ്ധയോ പരിഹാര നിർദ്ദേശങ്ങളോ ഇതുവരെ ഉണ്ടാകാത്തതിൽ നാട്ടുകാർക്ക് കനത്ത പ്രതിഷേധമുണ്ട് .

ഈ ദ്വാരം ഉടനടി അടക്കുകയോ അതുവഴിയുള്ള ഗതാഗതത്തിന് അപകട മുന്നറിയിപ്പ് നൽകി നിയന്ത്രിക്കുകയോ ചെയ്തില്ലെങ്കിൽ ഇതൊരു അപകട മേഖലയായി മാറുമെന്നാണ് പരിസരവാസികൾഭയപ്പെടുന്നത് .

 ദിനംപ്രതി ബസ്സുകളടക്കം നൂറുകണക്കിന് വാഹനങ്ങളും കാൽനടയാത്രക്കാരും കടന്നുപോകുന്ന ഈ സർവ്വീസ് റോഡിൽ വരും നാളുകളിൽ വൻജീവഹാനി സംഭവിക്കാനിടയുണ്ടെന്നും ആയതിനാൽ ത്രിതലസർക്കാരുകൾ അടിയന്തര നടപടികൾ സ്വീകരിക്കേണ്ടതാണെന്നും നാട്ടുകാർ ആവശ്യപ്പെടുന്നു.

 ചോമ്പാല പോലീസ് അധികൃതർ സ്ഥലം സന്ദർശിച്ച് അപകടനില റിപ്പോർട്ട് ചെയ്യുകയും ഇവിടെ അപകട സൂചന ബോർഡ് അടിയന്തരമായും സ്ഥാപിക്കേണ്ടത് ആവശ്യമാ ണെന്നും നാട്ടുകാർ പറയുന്നു.

 കഴിഞ്ഞദിവസം അഴിയൂരിലെ മഴക്കെടുതിയിൽ രതീഷ് എന്ന ആൾ മരണപ്പെട്ട ദുഃഖം നാട്ടുകാരിൽ ഇപ്പോഴും വിട്ടൊഴിഞ്ഞിട്ടില്ല .

പണ്ടുകാലങ്ങളിൽ ചിറയിൽ പീടികയിൽ വലിയ ചിറയും ക്ഷേത്രവും ഉണ്ടായിരുന്ന സ്ഥലമായതു കൊണ്ടാണ് ഇവിടം ചിറയിൽ പീടിക എന്ന പേരിൽ അറിയപ്പെടുന്നത് .

ചിറയിൽ എന്ന പേരിൽ ചില ഭവനങ്ങൾ ഇപ്പോഴും ഇവിടെ നിലവിലുണ്ട്.

 മയ്യഴിപ്രദേശം ബ്രിട്ടീഷുകാരും കടത്തനാട്ട് തമ്പുരാക്കന്മാരും പണ്ട് ആക്രമിച്ച അവസരങ്ങളിൽ വെടി മരുന്നുകളും ഉണ്ടകളും സൂക്ഷിച്ച അറകളും മറ്റും ഈ പ്രദേശങ്ങളിൽ ഉണ്ടാകാനിടയുണ്ടെന്ന കാര്യം വിസ്മരിച്ചുകൂടെന്നും പ്രമുഖ ചരിത്ര ഗവേഷകനും സോഷ്യൽ ആക്ടിവിസ്റ്റും പ്രദേശവാസിയായ ഡോക്ടർ കെ കെ എൻ കുറുപ്പ് ഓർമ്മിപ്പിക്കുന്നു .

ഈ അറ കൂടുതൽ ഗവേഷണത്തിന് വിധേയമാക്കി ജനങ്ങളുടെ ഭീതി അകറ്റേണ്ടത് ആവശ്യമാണെന്നും കുറുപ്പ് സാർ വാർത്താകുറിപ്പിൽ ആവശ്യപ്പെടുന്നു .