പെരുമഴയത്തും തളരാത്ത പൗരബോധം സേവാപ്രവർത്തനത്തിലും ബാലകൃഷ്ണൻ ഒരടി മുന്നിൽ

പെരുമഴയത്തും തളരാത്ത പൗരബോധം

സേവാപ്രവർത്തനത്തിലും

ബാലകൃഷ്ണൻ ഒരടി മുന്നിൽ....

 ചോമ്പാല : വടക്കേ മുക്കാളിയുടെ ലാൻഡ് മാർക്ക് എന്ന് വിശേഷിപ്പിക്കാവുന്നതാണ് റോഡരികിൽ ഇന്ന് കാണുന്ന സാമാന്യം ഉയരത്തിൽ പടർന്നുപന്തലിച്ച ഇവിടുത്തെ അരയാൽമരം . 

 ഇന്ന് രാവിലെ വീശിയടിച്ച കാറ്റിൽ ഈ മരത്തിൽ നിന്നും അടർന്നുവീണ വൃക്ഷശിഖരം കനത്ത മഴക്കോള് പോലും വകവെക്കാതെ പ്രായംമറന്നനിലയിൽ മുന്നിട്ടിറങ്ങി വെട്ടിമാറ്റി പരിസരം സഞ്ചാരയോഗ്യമാക്കുന്ന പാമ്പള്ളി ബാലകൃഷ്ണൻ എന്ന മുക്കാളിക്കാരൻ സമൂഹ മാധ്യമങ്ങളിൽ നിറഞ്ഞു നിൽക്കുന്നു . 

പ്രായാധിക്യത്തിലും തളരാത്ത പൗരബോധം കൊണ്ടു തന്നെയാവാം പാമ്പള്ളി ബാലകൃഷ്ണൻ ജനഹൃദയങ്ങളിൽ നിറഞ്ഞുനിൽക്കുന്നത്.

മുക്കാളിലെ അയ്യപ്പക്ഷേത്രം നടത്തിപ്പിലും നിശ്ശബ്ദ സേവകനായ ബാലകൃഷ്ണൻറെ പങ്ക് ചെറുതല്ല .

ഏകദേശം 35 - 40 വർഷങ്ങൾക്ക് മുൻപ് വടക്കേമുക്കാളിയിലെ അന്നത്തെ ടാക്സി സ്റ്റാൻഡിൽ മുല്ലപ്പള്ളി കുഞ്ഞിക്കണ്ണേട്ടൻറെ മകൻ ബാബുവും (റാണി മിൽസ് വടകരയിലെ ജീവനക്കാരൻ ) , കളരിക്കുന്നുമ്മൽ ആണ്ടിയേട്ടൻ്റെ മകൻ ബാബു ,MRS അശോകൻ തുടങ്ങിയ ഒരുകൂട്ടം ടാക്സി ഡ്രൈവർമാരും ചേർന്നു കൊണ്ടാണ് ഈ അരയാൽമരം അക്കാലത്ത് വടക്കേ മുക്കാളിയിൽ റോഡരികിലെ അന്നത്തെ ടാക്സി സ്റ്റാൻഡിൽ നട്ടുപിടിപ്പിച്ചതും വളവും വെള്ളവും നൽകി പരിപോഷിപ്പിച്ചതും .

പടർന്നുപന്തലിച്ച്‌ തലയെടുപ്പോടെ ഉയർന്നു നിൽക്കുന്ന ഈ അരയാൽ മരത്തിന് പ്രൗഢോജ്വലമായ നിലയിൽ കരിങ്കല്ലുകൊണ്ട് തറകെട്ടിനിർത്തിയതാകട്ടെ ഉയർന്ന സാമൂഹ്യ ബോധമുള്ള മറ്റൊരു 'നന്മമരം '.

പേര് വെളിപ്പെടുത്താനാഗ്രഹിക്കാത്ത ഒരു നല്ല മനുഷ്യൻറെ സഹായവുമായി എന്ന് പറയുന്നതാവും കൂടുതൽ ശരി .