ഈ മരത്തിൻറെ തൊലിയും വേരും വിത്തും കഷായം വെച്ച് ഔഷധമായി കൊടുക്കുന്ന ഫലപ്രദമായ ചികിത്സാരീതി പണ്ടുകാലങ്ങളിൽ ഉണ്ടായിരുന്നു .

150 വർഷങ്ങൾക്കുമുൻപ് കുട്ടമത്ത് വൈദ്യ പാരമ്പര്യത്തിൽ ഒരു കുറവനെ മാഹേന്ദ്രജാലം പഠിപ്പിച്ച വകയിൽ ഗുരുദക്ഷിണയായി ഭ്രാന്തൻ നായയുടെ കടിയേറ്റാൽ അതിനെതി രെയുള്ള ചികിത്സാവിധി ബാലകൃഷ്ണ കുറുപ്പ് എന്ന ഏൻ്റെ ഏൻ്റെ വല്യമ്മാവനെ  പഠിപ്പിച്ചിരുന്നു .

പിന്നീടത് പരമ്പരാഗതമായി 'ധന്വന്തരി ' എന്ന പേരിലറിയപ്പെട്ടിരുന്ന എൻ്റെ അമ്മാവൻ ചെറിയ രാമകുറുപ്പിന് ലഭിക്കുകയുണ്ടായി .

അദ്ദേഹം കുട്ടമത്ത് നിന്നും അഴിയൂർ കോവുക്കൽ വീട്ടിൽ കാരണവരായി വന്നപ്പോൾ അങ്കോലം എന്ന ഔഷധ വൃക്ഷം വീട്ടുവളപ്പിൽ നട്ടുപിടിപ്പിച്ചിരുന്നു .

ഈ ഔഷധ വൃക്ഷം ചികിത്സക്കായി നട്ടുവളർത്തിയതാണെന്നാണ് എന്റെ അറിവ് .

എൻ്റെ അമ്മയിൽനിന്നും ഇതോടനുബന്ധിച്ചുള്ള കാര്യങ്ങൾ എനിക്കറിയാൻ കഴിഞ്ഞിരുന്നു .

 ആ മരം 25 വർഷങ്ങൾക്കു മുൻപ് മരത്തടിക്കായി പുതിയ അവകാശികൾ മുറിച്ചു വിറ്റുവെങ്കിലും ആ മരക്കുറ്റി വീണ്ടും കിളിർത്തു ഉയർന്നു ചെറിയൊരു മരമായി ഇതേ മണ്ണിൽ തലയെടുപ്പോടെ ഇപ്പോഴും നിൽക്കുന്നുമുണ്ട് .പോയ തലമുറയുടെ തിരുശേഷിപ്പ് പോലെ .

അങ്കോലം എന്ന ഈ വൃക്ഷം വിഷവൈദ്യചികിത്സക്കായി ഉപയോഗിച്ചിരുന്നതായി കേരളത്തിലെ സസ്യസമ്പത്തിനെക്കുറിച്ച് പതിനേഴാം നൂറ്റാണ്ടിന്റെ ഉത്തരാർദ്ധത്തിൽ ലത്തീൻ ഭാഷയിൽ പ്രസിദ്ധീകരിച്ച ഗ്രന്ഥമായ ഹോർത്തൂസ്‌ മലബാറിക്കൂസിൽ പരാമർശിക്കുന്നുമുണ്ട് .

ആയതിനാൽ ഈ വൃക്ഷത്തിൻറെ വേരും തൊലിയും മറ്റും ആധുനിക പരീക്ഷണശാലയിൽ നിരീക്ഷണ വിധേയമായനിലയിൽ ഗവേഷകർ ഗവേഷണം ചെയ്തു പ്രത്യേകമായ വാക്‌സിൻ ഉപയോഗപ്പെടുത്താൻ ആവുമോ എന്ന കാര്യം ചിന്തിക്കുമെങ്കിൽ മഹാപുണ്യം .