വാട്‌സാപ്പ് വെബിലും ഇനി വോയ്‌സ്-വീഡിയോ കോളുകൾ; പുതിയ ഫീച്ചറുകളുമായി മെറ്റ

വാട്‌സാപ്പ് വെബിലും ഇനി വോയ്‌സ്-വീഡിയോ കോളുകൾ; പുതിയ ഫീച്ചറുകളുമായി മെറ്റ

ന്യൂഡൽഹി: ലോകത്തെ ഏറ്റവും ജനപ്രിയമായ മെസേജിങ് പ്ലാറ്റ്‌ഫോമുകളിലൊന്നായ വാട്‌സാപ്പിൽ വെബ് പതിപ്പിലും ഇനി വോയ്‌സ് കോളും വീഡിയോ കോളും ചെയ്യാം. ഇതിനായി പ്രത്യേക ഡെസ്‌ക്ടോപ്പ് ആപ്ലിക്കേഷൻ ഇൻസ്റ്റാൾ ചെയ്യേണ്ടതില്ല. ബ്രൗസർ വഴി നേരിട്ട് കോളുകൾ ചെയ്യാൻ കഴിയുന്ന പുതിയ സംവിധാനം മെറ്റ ഘട്ടംഘട്ടമായി ഉപയോക്താക്കൾക്ക് ലഭ്യമാക്കിത്തുടങ്ങി.

ഒന്നിലധികം ഉപകരണങ്ങളിൽ വാട്‌സാപ്പ് ഉപയോഗിക്കുന്നവർക്കാണ് ഈ പുതിയ സൗകര്യം ഏറെ പ്രയോജനപ്പെടുക. ഡെസ്‌ക്ടോപ്പ് ആപ്പ് ഇൻസ്റ്റാൾ ചെയ്യാൻ കഴിയാത്ത കമ്പ്യൂട്ടറുകളിലും ബ്രൗസർ ഉപയോഗിച്ച് വ്യക്തിഗത കോളുകളും ഗ്രൂപ്പ് കോളുകളും നടത്താനാകും.

പുതിയ അപ്ഡേറ്റിന്റെ ഭാഗമായി കോൾ ട്രാൻസ്ഫർ സംവിധാനവും അവതരിപ്പിച്ചിട്ടുണ്ട്. ഇതിലൂടെ ഫോൺ, ടാബ്ലറ്റ്, കമ്പ്യൂട്ടർ തുടങ്ങിയ ഉപകരണങ്ങൾക്കിടയിൽ കോൾ വിച്ഛേദിക്കാതെ തന്നെ മാറ്റി തുടരാനാകും. ഉദാഹരണത്തിന്, ഫോണിന്റെ ബാറ്ററി കുറയുമ്പോൾ അതേ കോൾ കമ്പ്യൂട്ടറിലേക്കോ ടാബ്ലറ്റിലേക്കോ എളുപ്പത്തിൽ മാറ്റാം.

വെയ്റ്റിങ് റൂം എന്ന പുതിയ സുരക്ഷാ ഫീച്ചറും ഗ്രൂപ്പ് കോളുകൾക്ക് ലഭ്യമാകും. ഗ്രൂപ്പ് കോൾ ആരംഭിക്കുന്ന വ്യക്തിക്ക് ആരെ എപ്പോൾ കോളിൽ പ്രവേശിപ്പിക്കണമെന്നത് നിയന്ത്രിക്കാനാകും. 'Require approval to join' എന്ന ഓപ്ഷൻ സജീവമാക്കിയാൽ, പങ്കെടുക്കുന്നവർ ആദ്യം വെയ്റ്റിങ് റൂമിലായിരിക്കും. അനുമതി ലഭിച്ച ശേഷമേ അവർ കോളിൽ ചേരാൻ കഴിയൂ.

കോളുകളുടെ ശബ്ദ-ദൃശ്യ നിലവാരം മെച്ചപ്പെടുത്തുന്ന ക്വിക് എച്ച്ഡി സംവിധാനവും അപ്ഡേറ്റിന്റെ ഭാഗമാണ്. 'Noise Suppression' സാങ്കേതികവിദ്യയുടെ സഹായത്തോടെ പശ്ചാത്തല ശബ്ദം കുറയ്ക്കുകയും വീഡിയോ കോളുകൾ കൂടുതൽ വ്യക്തതയോടെ എച്ച്ഡി നിലവാരത്തിൽ ലഭ്യമാക്കുകയും ചെയ്യും.

അതേസമയം, മെറ്റയുടെ ഉടമസ്ഥതയിലുള്ള മറ്റൊരു സാമൂഹികമാധ്യമ പ്ലാറ്റ്ഫോമായ ഫെയ്സ്ബുക്കിൽ 'Facebook Verified' എന്ന പുതിയ സൗജന്യ വെരിഫിക്കേഷൻ സംവിധാനവും കമ്പനി പ്രഖ്യാപിച്ചിട്ടുണ്ട്.