നിർമിത ബുദ്ധിയും നാളത്തെ ലോകവും: :ടീ .ഷാഹുൽ ഹമീദ്

മനുഷ്യവിവേകവും യന്ത്രവേഗതയും കൈകോർക്കുമ്പോൾ

മാനവചരിത്രത്തിന്റെ ഏറ്റവും നിർണായകമായ ഒരു വഴിത്തിരിവിലൂ ടെയാണ് ലോകം ഇന്ന് കടന്നുപോകുന്നത്. ആർട്ടിഫിഷ്യൽ ഇന്റലിജൻസ് (AI) സാങ്കേതിക വിദ്യ അത്യുന്നതിയിൽ നിൽക്കുന്ന 2026-ലാണ് ആഗോള ബിസിനസ്-ഭരണ മേഖലകളിൽ അഭൂതപൂർവമായ പരിവർത്തനം ഉണ്ടാകുവാൻ പോകുന്നത്. ശാസ്ത്രസാങ്കേതികവിദ്യയുടെ വളർച്ചയിൽ നിർമിത ബുദ്ധി വരുത്തിക്കൊണ്ടിരിക്കുന്ന മാറ്റങ്ങൾ കേവലം ഒരു സാങ്കേതിക വിപ്ലവം മാത്രമല്ല; മറിച്ച് മനുഷ്യന്റെ ചിന്തകളെയും ജീവിതരീതികളെയും തൊഴിൽ സംസ്കാരത്തെയും അടിമുടി മാറ്റിമറിക്കുന്ന ഒന്നാണ്. ആഗോള വിപണിയിലും വിദ്യാഭ്യാസ രംഗത്തും ഭരണസംവിധാനങ്ങളിലും AI ഇന്ന് അതിന്റെ സ്വാധീനം ഉറപ്പിച്ചു കഴിഞ്ഞു. എന്നാൽ, ഈ യന്ത്രക്കുതിപ്പിനിടയിൽ മനുഷ്യന്റെ പങ്ക് എന്താണ് എന്ന ചോദ്യം ഇന്ന് ശക്തമായി ഉയരുകയാണ്.

തൊഴിൽ മേഖലയിലെ എഐ വിപ്ലവം:-

സഹവർത്തിത്വത്തിന്റെ പുതിയ യുഗം

ഇന്ന് തൊഴിലിടങ്ങളിൽ വലിയൊരു വിഭാഗം ജീവനക്കാരും ഏതെങ്കിലും തരത്തിൽ AI ടൂളുകൾ ഉപയോഗിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. എന്നാൽ സാങ്കേതികവിദ്യ ഉപയോഗിക്കുന്നതിനപ്പുറം, മനുഷ്യനും AI-യും തമ്മിലുള്ള ആശയവിനിമയം മികച്ച രീതിയിൽ കൊണ്ടുപോകാൻ സാധിക്കുന്നത് കുറച്ചുപേർക്ക് മാത്രമാണ്. മുൻകാലങ്ങളിൽ മനുഷ്യനും യന്ത്രങ്ങളും വ്യത്യസ്ത വശങ്ങളിൽ ഒരേസമയം ജോലി ചെയ്യുന്ന അവസ്ഥയായിരുന്നുവെങ്കിൽ, ഇന്നത് പരസ്പരപൂരകമായി ലയിച്ചുചേരുന്ന ഘട്ടത്തിലേക്ക് എത്തിയിരിക്കുന്നു.

പ്രമുഖ കൺസൾട്ടൻസി സ്ഥാപനമായ ഡെലോയിറ്റിന്റെ (Deloitte) 2026 ലെ റിപ്പോർട്ട് പ്രകാരം, എഐയുടെ വരവോടെ തൊഴിൽ സംസ്കാരത്തിൽ വലിയ മാറ്റങ്ങളാണ് പ്രകടമാകുന്നത്. അന്തിമ തീരുമാനമെടുക്കുവാനുള്ള അധികാരം മനുഷ്യന് നിലനിർത്തിക്കൊണ്ട് പ്രവർത്തിക്കുന്ന AI പ്ലാറ്റ്‌ഫോമുകൾ ഉപയോഗിക്കുന്ന സ്ഥാപനങ്ങൾക്കാണ് വിപണിയിൽ മികച്ച നേട്ടമുണ്ടാക്കാൻ സാധിക്കുന്നത്. ഇവിടെ സാങ്കേതികവിദ്യയുടെ വേഗതയ്ക്ക് മേൽനോട്ടം വഹിക്കാൻ മനുഷ്യന്റെ വിവേകം ആവശ്യമായി വരുന്നു.

ഈ പുതിയ തൊഴിൽ ചക്രത്തിൽ മനുഷ്യന്റെ പങ്ക് പ്രധാനമായും നാല് തലങ്ങളിലായി പുനർനിർവചിക്കപ്പെട്ടിരിക്കുന്നു:

 AI Coach / Steward (പരിശീലകരും മേൽനോട്ടക്കാരും): 

മനുഷ്യന്റെ കഴിവിനെ മെച്ചപ്പെടുത്താനും AI ടൂളുകളെ നിയന്ത്രിക്കാനും ഇവ സഹായിക്കുന്നു. AI നൽകുന്ന ഔട്ട്പുട്ട് യഥാർത്ഥ സാഹചര്യങ്ങളുമായി ഒത്തുപോകുന്നുണ്ടോ എന്നും, അത് സ്വീകരിക്കണമോ തള്ളണമോ എന്നും തീരുമാനിക്കുന്നത് ഇവരാണ്.

 AI Collaborator (സഹപ്രവർത്തകർ): 

മനുഷ്യനൊപ്പം ചേർന്ന് പ്രോജക്ടുകൾ പൂർത്തിയാക്കുന്ന പങ്കാളിയാണിത്. ജോലി എക്സിക്യൂട്ട് ചെയ്യുന്നതിന് മുൻപ് ഏത് തരത്തിലുള്ള ഉത്തരവാദിത്തങ്ങളാണ് എഐക്ക് നൽകേണ്ടതെന്ന് ഈ വിഭാഗം തീരുമാനിക്കുന്നു.

 AI Assistant (സഹായി): 

ദൈനംദിന ലളിതമായ ജോലികൾ വേഗത്തിലാക്കാൻ സഹായിക്കുന്ന ഡിജിറ്റൽ സഹായികൾ.

 AI Autonomy (സ്വയംഭരണ സംവിധാനങ്ങൾ): 

മനുഷ്യന്റെ ഇടപെടലുകൾ ഇല്ലാതെ തന്നെ കൃത്യതയോടെ നിസ്സാരവും ആവർത്തന സ്വഭാവമുള്ളതുമായ ജോലികൾ സ്വയം ചെയ്യുന്ന സംവിധാനങ്ങൾ.

സാങ്കേതിക അമിതാശ്രയത്വവും വിവേചനബുദ്ധിയുടെ തകർച്ചയും:-

ഇന്റർനെറ്റിലെ ഉള്ളടക്കങ്ങളുടെ പകുതിയിലധികവും AI നിർമ്മിതമാകുന്ന ഈ കാലഘട്ടത്തിൽ മനുഷ്യന്റെ സർഗ്ഗാത്മകതയും കഴിവും വലിയൊരു ചോദ്യചിഹ്നമായി മാറുകയാണ്. എല്ലാ കാര്യങ്ങൾക്കും അമിതമായി AI-യെ ആശ്രയിക്കുന്നത് ജീവനക്കാരുടെ സ്വന്തമായി തീരുമാനമെടുക്കാനുള്ള ശേഷി, ചിന്താശേഷി, വിവേചന ബുദ്ധി എന്നിവയെ ദോഷകരമായി ബാധിക്കുന്നുണ്ട്.

അനുഭവസമ്പത്ത് കുറഞ്ഞ ജീവനക്കാർ AI ഉപയോഗിച്ച് വളരെ പെട്ടെന്ന് ആകർഷകമായ, എന്നാൽ ആഴമില്ലാത്ത റിപ്പോർട്ടുകൾ നിർമ്മിക്കുന്ന പ്രവണത ഇന്നത്തെ ഓഫീസുകളിൽ വ്യാപകമാണ്. ഇത് സ്ഥാപനങ്ങളുടെ ഗുണനിലവാരത്തെ ബാധിക്കുന്നു. മുൻകാല ഡാറ്റകളെ മാത്രം അടിസ്ഥാനമാക്കി AI നൽകുന്ന നിർദ്ദേശങ്ങൾ ആവർത്തിച്ചു സ്വീകരിക്കുമ്പോൾ, പുതിയ ആശയങ്ങളും വൈവിധ്യമാർന്ന ചിന്തകളും ഇല്ലാതാവുകയും നവീകരണ സാധ്യതകൾ മങ്ങുകയും ചെയ്യുന്നു.

വിദ്യാഭ്യാസ മേഖലയിലെ മാറ്റങ്ങളും പ്രതിസന്ധികളും:-

സ്കൂളുകളിലും കോളേജുകളിലും AI ഉപയോഗം അതിവേഗം വർദ്ധിച്ചുവരികയാണ്. ഏതാണ്ട് 88% വിദ്യാർത്ഥികളും തങ്ങളുടെ പഠന ആവശ്യങ്ങൾക്കായി ഇപ്പോൾ AI ഉപയോഗപ്പെടുത്തുന്നുണ്ട്. ഗണിതം, കോഡിംഗ് തുടങ്ങിയ വിഷയങ്ങളിൽ വിദ്യാർത്ഥികൾക്ക് വ്യക്തിഗതമായ പിന്തുണ നൽകാൻ AI-ക്ക് സാധിക്കുന്നു. കേവലം വിവരങ്ങൾ മനപ്പാഠമാക്കുന്ന രീതിയിൽ നിന്ന് മാറി, കാര്യങ്ങൾ കൃത്യമായി മനസ്സിലാക്കാനും വിശകലനം ചെയ്യാനും എഐ പുതിയ തലമുറയെ സഹായിക്കുന്നുണ്ട്. കോഡിംഗിലെ പിഴവുകൾ കണ്ടെത്തുന്നത് മുതൽ ഗണിത ഒളിമ്പ്യാഡുകളിൽ സ്വർണ്ണം നേടാൻ സഹായിക്കുന്ന തരത്തിൽ വരെ AI വികസിച്ചു കഴിഞ്ഞു. ഉയർന്ന ഗവേഷണങ്ങൾ നടത്തുന്ന പിഎച്ച്.ഡി വിദ്യാർത്ഥികൾക്ക് പോലും സയൻസ് വിഷയങ്ങളിൽ കഠിനമായ ചോദ്യങ്ങൾക്ക് ഉത്തരം നൽകാൻ ഇന്ന് എഐക്ക് സാധിക്കുന്നു.

എന്നാൽ, ഇതിനൊരു മറുപുറവുമുണ്ട്. 88% വിദ്യാർത്ഥികൾ ഇത് ഉപയോഗിക്കുന്നുണ്ടെങ്കിലും പകുതിയിലധികം വിദ്യാഭ്യാസ സ്ഥാപനങ്ങൾക്കും ഇതിനായി കൃത്യമായ നയങ്ങളോ ഗൈഡ്‌ലൈനുകളോ ഇല്ല. ഇത് അധ്യാപകരെ വലിയ രീതിയിൽ ആശയക്കുഴപ്പത്തിലാക്കുന്നു. ഗണിതത്തിൽ സ്വർണ്ണം നേടുമ്പോഴും ഒരു ക്ലോക്കിലെ സമയം കൃത്യമായി പറയാൻ കഴിയാത്ത വിചിത്രമായ പിഴവുകളും എഐ വരുത്താറുണ്ട്. വിപണിയിൽ വ്യാജവിവരങ്ങൾ വർദ്ധിക്കുമ്പോഴും അതിനെ നിയന്ത്രിക്കാനുള്ള കൃത്യമായ മേൽനോട്ട സംവിധാനം വിദ്യാഭ്യാസ രംഗത്ത് ഇനിയും രൂപപ്പെടേണ്ടിയിരിക്കുന്നു.

ആഗോള വിപണിയിലെ കടുത്ത മത്സരവും ചിപ്പ് യുദ്ധവും:-

എഐ സാങ്കേതികവിദ്യയുടെ നിർമാണത്തിലും വികസനത്തിലും ലോകരാജ്യങ്ങൾ തമ്മിൽ കടുത്ത മത്സരമാണ് നടക്കുന്നത്. അമേരിക്കയുടെയും ചൈനയുടെയും മുന്നേറ്റം ഈ മേഖലയിൽ പ്രകടമാണ്. ഗൂഗിളിന്റെ Gemini DeepThink, ഓപ്പൺ എഐ (OpenAI) ടൂളുകൾ എന്നിവയ്ക്ക് പുറമെ, ചൈനീസ് ഓപ്പൺ സോഴ്സ് മോഡലായ DeepSeek-R1 തുടങ്ങിയവ ഇന്ന് ആഗോളതലത്തിൽ വലിയ ചലനങ്ങൾ സൃഷ്ടിക്കുന്നു. അമേരിക്കയും ചൈനയും തമ്മിലുള്ള സാങ്കേതിക മികവിന്റെ അന്തരം വെറും 2.7 % ആയി ചുരുങ്ങിയിരിക്കുന്നു. പേറ്റന്റുകളിലും റോബോട്ടിക്സിലും ചൈന മുന്നേറുമ്പോൾ, വൻതോതിലുള്ള സാമ്പത്തിക നിക്ഷേപം കൊണ്ട് അമേരിക്ക ഈ മേഖലയിൽ പിടിച്ചുനിൽക്കാൻ ശ്രമിക്കുകയാണ്.

ഈ സാങ്കേതിക വിപ്ലവത്തിന്റെ നിയന്ത്രണകേന്ദ്രം എന്ന് പറയുന്നത് എഐ ചിപ്പുകളാണ്. ലോകത്തിലെ ഏറ്റവും മുൻനിര എഐ ചിപ്പുകൾ നിർമിക്കുന്നത് തായ്‌വാനിലെ TSMC (Taiwan Semiconductor Manufacturing Company) എന്ന കമ്പനിയാണ്. എന്നാൽ ഈ ചിപ്പുകളുടെ ഡിസൈനിംഗും സാങ്കേതികവിദ്യയും ഭൂരിഭാഗവും അമേരിക്ക കേന്ദ്രീകരിച്ചാണ് കിടക്കുന്നത്. സാങ്കേതികവിദ്യയുടെ ഈ ആഗോള വികേന്ദ്രീകരണവും സപ്ലൈ ചെയിൻ രാഷ്ട്രീയവും വിപണിയിലെ പുതിയ തൊഴിൽ സാധ്യതകളെയും സാമ്പത്തിക സമവാക്യങ്ങളെയും സ്വാധീനിക്കുന്നുണ്ട്.

ഗാലപ് റിപ്പോർട്ട് 2026: 

മനുഷ്യവിഭവശേഷിയുടെ താല്പര്യക്കുറവ് എന്ന വെല്ലുവിളി

സാങ്കേതികവിദ്യ അതിവേഗം കുതിക്കുമ്പോഴും ആഗോളതലത്തിൽ ജീവനക്കാരുടെ തൊഴിൽ താല്പര്യത്തിലും ഉൽപ്പാദനക്ഷമതയിലും വൻ ഇടിവ് രേഖപ്പെടുത്തുന്നതായി പുതിയ പഠനങ്ങൾ വ്യക്തമാക്കുന്നു. പ്രമുഖ റിസർച്ച് സ്ഥാപനമായ ഗാലപ് (Gallup) പുറത്തുവിട്ട 2026-ലെ റിപ്പോർട്ട് പ്രകാരം, ലോകമെമ്പാടുമുള്ള ജീവനക്കാരുടെ ജോലിയിലുള്ള മാനസികമായ അടുപ്പവും താല്പര്യവും 20 ശതമാനമായി താഴ്ന്നിരിക്കുകയാണ്.

2022-ൽ ജീവനക്കാരുടെ തൊഴിൽ പങ്കാളിത്തം 23% ആയിരിന്നു. ചരിത്രത്തിൽ ആദ്യമായാണ് ആഗോളതലത്തിൽ തുടർച്ചയായി രണ്ടു വർഷം ഈ നിരക്ക് താഴേക്ക് പോകുന്നത്. ലോകത്ത് ഒരൊറ്റ മേഖലയിൽ പോലും കഴിഞ്ഞ വർഷം തൊഴിൽ പങ്കാളിത്തം ഉയർന്നിട്ടില്ല. ഇതിൽ ഏറ്റവും വലിയ തിരിച്ചടിയുണ്ടായത് ഇന്ത്യ ഉൾപ്പെടുന്ന ദക്ഷിണേഷ്യയിലാണ്. ജീവനക്കാരുടെ ഈ താല്പര്യക്കുറവ് കാരണം കഴിഞ്ഞ വർഷം ആഗോള സമ്പദ്‌വ്യവസ്ഥയ്ക്ക് നഷ്ടമായത് ഏകദേശം 10 ട്രില്യൺ ഡോളറാണ് (ലോക ജിഡിപിയുടെ 9 ശതമാനത്തോളം).

AI വ്യക്തിഗതമായി ജീവനക്കാരുടെ ജോലി എളുപ്പമാക്കുന്നുണ്ടെങ്കിലും, സ്ഥാപനങ്ങളുടെ മൊത്തത്തിലുള്ള വളർച്ചയ്ക്ക് അത് എത്രത്തോളം സഹായിക്കുന്നു എന്നതിൽ ഇപ്പോഴും വ്യക്തതയില്ല. ജീവനക്കാർക്ക് ജോലിയിൽ താല്പര്യമില്ലാതാകുമ്പോൾ ഓഫീസുകളിൽ പരസ്പര ബന്ധങ്ങൾ കുറയുകയും, ഒറ്റപ്പെടലുകൾ കൂടുകയും ചെയ്യുന്നു. ഇത് സ്ഥാപനങ്ങളുടെ കൂട്ടായ്മ സംസ്കാരത്തെ നിശബ്ദമായി തളർത്തുന്നു. ജീവനക്കാരുടെ മാനസികമായ സംതൃപ്തിയും തൊഴിൽ സാഹചര്യങ്ങളും മെച്ചപ്പെടുത്തിയാൽ മാത്രമേ വരാനിരിക്കുന്ന എഐ യുഗത്തിൽ സ്ഥാപനങ്ങൾക്ക് സുസ്ഥിരമായ വളർച്ച കൈവരിക്കാൻ സാധിക്കൂ എന്ന് ഗാലപ് റിപ്പോർട്ട് അടിവരയിടുന്നു.

ഡിജിറ്റൽ സുരക്ഷാ ഭീഷണികളും പരിഹാര മാർഗ്ഗങ്ങളും:-

എഐ നൽകുന്ന അനന്തമായ സാധ്യതകൾക്കൊപ്പം തന്നെ വലിയ സുരക്ഷാ ഭീഷണികളും ഉയരുന്നുണ്ട്. അതിൽ ഏറ്റവും പ്രധാനപ്പെട്ടതാണ് ഡീപ് ഫേക്ക് (Deepfake) സാങ്കേതികവിദ്യയും വ്യാജ വിവരങ്ങളും (Disinformation). യഥാർത്ഥമേത് വ്യാജമേത് എന്ന് തിരിച്ചറിയാൻ കഴിയാത്ത വണ്ണം ഇന്റർനെറ്റിലെ വിവരങ്ങൾ ദുരുപയോഗം ചെയ്യപ്പെടാം. അതിനാൽ സൈബർ സെക്യൂരിറ്റിയിൽ നിന്നും 'ഡിസ് ഇൻഫർമേഷൻ സെക്യൂരിറ്റി' എന്ന ആശയത്തിലേക്ക് ലോകം മാറേണ്ടതുണ്ട്.

ഇതിനുള്ള പ്രധാന പരിഹാര മാർഗ്ഗങ്ങൾ താഴെ പറയുന്നവയാണ്:

ബ്ലോക്ക്ചെയിൻ സാങ്കേതികവിദ്യ:-

എഐ നൽകുന്ന ഡാറ്റയുടെ ഉറവിടം ട്രാക്ക് ചെയ്യാനും വിവരങ്ങളുടെ സത്യാവസ്ഥ ഉറപ്പുവരുത്താനും ബ്ലോക്ക്ചെയിൻ സാങ്കേതികവിദ്യ ഉപയോഗിക്കണം. ഇതിനായി ജീവനക്കാർക്ക് പ്രത്യേക പരിശീലനം നിർബന്ധമാക്കണം.

ഉള്ളടക്ക ലേബലിംഗ് 

ഒരു പ്രോജക്റ്റിലോ റിപ്പോർട്ടിലോ എത്രത്തോളം എഐ ഉപയോഗിച്ചിട്ടുണ്ടെന്നും എത്രത്തോളം മനുഷ്യന്റെ ഇടപെടൽ ഉണ്ടെന്നും വ്യക്തമാക്കുന്ന ലേബലുകൾ നിർബന്ധമാക്കണം. ഇത് അധ്വാനത്തിന്റെ മൂല്യവും വിശ്വാസ്യതയും നിലനിർത്താൻ സഹായിക്കും.

എഐ ലിറ്ററസി 

ജീവനക്കാരെ കേവലം ടൂളുകൾ ഉപയോഗിക്കാൻ മാത്രം പഠിപ്പിച്ചാൽ പോരാ; അതിലെ റിസ്ക് തിരിച്ചറിയുവാനുള്ള കഴിവും കൃത്യമായ തീരുമാനങ്ങൾ എടുക്കാനുള്ള അധികാരവും അവർക്ക് നൽകണം.

അന്തിമ അധികാരം മനുഷ്യന്: 

സാങ്കേതികവിദ്യ എത്ര വേഗത്തിൽ വിവരങ്ങൾ തന്നാലും, അതിൽ ഏതാണ് സത്യം ഏതാണ് കള്ളം എന്ന് തിരിച്ചറിയാനുള്ള അന്തിമ അധികാരം മനുഷ്യൻ കൈവിടരുത്. യന്ത്രം വേഗത നൽകുമ്പോൾ അതിന് വിവേകവും സുരക്ഷയും നൽകേണ്ടത് മനുഷ്യനാണ്.

മനുഷ്യകേന്ദ്രീകൃതമായ ഒരു എഐ സംസ്കാരം

പഠനങ്ങൾ സൂചിപ്പിക്കുന്നത് AI-യുടെ ശേഷി കൂടുന്നതിനനുസരിച്ച് അതിന്റെ സുരക്ഷിതത്വം വർദ്ധിക്കുന്നില്ല എന്നാണ്. എഐയുടെ സുരക്ഷ കൂട്ടാൻ ശ്രമിക്കുമ്പോൾ അതിന്റെ കൃത്യത കുറയുന്നതായും കാണാം. ഇവിടെയാണ് മനുഷ്യവിവേകത്തിന്റെ പ്രസക്തി. സാങ്കേതികവിദ്യ എത്ര വളർന്നാലും അനിശ്ചിതത്വങ്ങൾക്കിടയിൽ കൃത്യമായി തീരുമാനങ്ങൾ എടുക്കുവാനും സർഗാത്മകമായി ചിന്തിക്കുവാനും സഹാനുഭൂതിയോടെ പ്രവർത്തിക്കുവാനും മനുഷ്യന് മാത്രമേ സാധിക്കുകയുള്ളൂ.

എഐ മനുഷ്യനെ മാറ്റിസ്ഥാപിക്കുകയല്ല ചെയ്യുന്നത്, മറിച്ച് മനുഷ്യന്റെ ജോലിയെ കൂടുതൽ ഉയർന്ന ഉത്തരവാദിത്തമുള്ള ഒന്നാക്കി മാറ്റുകയാണ് ചെയ്യുന്നത്. മനുഷ്യകേന്ദ്രീകൃതമായ ഒരു വർക്ക് സൈക്കിളിലൂടെ സാങ്കേതികവിദ്യയും മനുഷ്യന്റെ സുരക്ഷയും തമ്മിലുള്ള വ്യത്യാസം കുറച്ചുകൊണ്ടുവരേണ്ടതുണ്ട്. നിർമിത ബുദ്ധിയെ ഭയപ്പെടേണ്ടതില്ല, മറിച്ച് വിവേകത്തോടെയും ഉത്തരവാദിത്തത്തോടെയും കൂടെക്കൂട്ടുകയാണ് വേണ്ടത്. സാങ്കേതികവിദ്യയുടെ കരുത്തും മനുഷ്യത്വത്തിന്റെ നന്മയും സമന്വയിപ്പിച്ചു കൊണ്ട് മാത്രമേ സുരക്ഷിതവും സുസ്ഥിരവുമായ ഒരു നവലോകം കെട്ടിപ്പടുക്കാൻ നമുക്ക് സാധിക്കുകയുള്ളൂ.

By 

ടീ .ഷാഹുൽ ഹമീദ് 

Shahul1971@gmail.com

9895043496