ആധാർ കാർഡ് ഇനി വാട്‌സ്ആപ്പിലും; എളുപ്പത്തിൽ ഡൗൺലോഡ് ചെയ്യാനുള്ള വഴി ഇതാ

ആധാർ കാർഡ് കൈവശമില്ലാത്ത സാഹചര്യങ്ങളിൽ ഇനി ആശങ്കപ്പെടേണ്ടതില്ല. അക്ഷയ കേന്ദ്രങ്ങളെയോ ഔദ്യോഗിക വെബ്‌സൈറ്റുകളെയോ ആശ്രയിക്കാതെ തന്നെ വാട്‌സ്ആപ്പിലൂടെ വളരെ എളുപ്പത്തിൽ ആധാർ കാർഡ് ഡൗൺലോഡ് ചെയ്തെടുക്കാം. കേന്ദ്ര സർക്കാരിന്റെ 'മൈ ഗവ് ഹെൽപ്പ് ഡെസ്ക്' (MyGov Helpdesk) വഴിയാണ് ഈ സേവനം ലഭ്യമാകുന്നത്.

​ഇതിനായി ഉപഭോക്താക്കൾ ആദ്യം ചെയ്യേണ്ടത് 9013151515 എന്ന നമ്പർ ഫോണിൽ സേവ് ചെയ്യുക എന്നതാണ്. തുടർന്ന് ഈ നമ്പറിലേക്ക് വാട്‌സ്ആപ്പിൽ ഒരു 'Hi' അയക്കുന്നതോടെ ചാറ്റ്ബോട്ട് സജീവമാകും. തുടർന്നു വരുന്ന മെനുവിൽ നിന്ന് 'DigiLocker' സേവനം തിരഞ്ഞെടുക്കണം. ആധാർ കാർഡ് ഡൗൺലോഡ് ചെയ്യുന്നതിനായി നിങ്ങളുടെ 12 അക്ക ആധാർ നമ്പർ നൽകുക. ആധാറുമായി ലിങ്ക് ചെയ്തിരിക്കുന്ന മൊബൈൽ നമ്പറിലേക്ക് വരുന്ന ഒടിപി (OTP) നൽകി വെരിഫിക്കേഷൻ പൂർത്തിയാക്കുന്നതോടെ ആധാർ കാർഡ് പിഡിഎഫ് (PDF) രൂപത്തിൽ ലഭ്യമാകും.

​ഈ സേവനം ഉപയോഗപ്പെടുത്താൻ ഉപഭോക്താക്കൾക്ക് ഡിജിലോക്കറിൽ അക്കൗണ്ട് ഉണ്ടായിരിക്കണം എന്നതും ആധാറും മൊബൈൽ നമ്പറും തമ്മിൽ ബന്ധിപ്പിച്ചിരിക്കണം എന്നതും നിർബന്ധമാണ്. ആധാറിന് പുറമെ പാൻ കാർഡ്, ഡ്രൈവിംഗ് ലൈസൻസ് തുടങ്ങിയ രേഖകളും ഇത്തരത്തിൽ ഡൗൺലോഡ് ചെയ്യാൻ സാധിക്കും. സുരക്ഷാ കാരണങ്ങളാൽ ഒരു തവണ ഒരു ഫയൽ മാത്രമേ ഇത്തരത്തിൽ ഡൗൺലോഡ് ചെയ്തെടുക്കാൻ കഴിയൂ എന്ന കാര്യം പ്രത്യേകം ശ്രദ്ധിക്കുക.