വിപുലമായ പരിപാടികളോടെ ശാന്തിഗിരിയിൽ പുതുവത്സരാഘോഷം ഡിസംബർ 31 ന്

ഡിസംബർ 20 ന് തുടക്കമായ മെഗാഫ്‌ലവർഷോയിൽ ഇതിനകം സന്ദർശകരുടെ വൻതിരക്കാണ്. മഞ്ഞിൻ താഴ്വരയും അരയന്നങ്ങളുടെ വീടും പക്ഷിസങ്കേതവുമൊക്കെ കാണികളുടെ മനം കവരുന്ന കാഴ്ചാനുഭവങ്ങളായി മാറിക്കഴിഞ്ഞു. രാജ്യത്തെ വിവിധ വെജിറ്റേറിയൻ രുചികൾ നിറയുന്ന ഭക്ഷ്യമേളയാണ് ഫെസ്റ്റിന്റെ മുഖ്യ ആകർഷണം. പുതുവത്സരാഘോഷത്തോടനുബന്ധിച്ച് ഡിസംബർ 30,31, ജനുവരി 1 തീയതികളിൽ ഫുഡ് കോർട്ടിൽ നൂറിലധികം വിഭവങ്ങളാണ് ഭക്ഷണപ്രേമികളെ കാത്തിരിക്കുന്നത്. ആഹാരത്തിനൊപ്പം ആരോഗ്യസംരക്ഷണത്തിന്റെ പാഠങ്ങളും ഫെസ്റ്റ് നഗരിയിലെ നവആരോഗ്യധർമ്മകേന്ദ്രം സന്ദർശകർക്ക് പ്രദാനം ചെയ്യുന്നു. കുടുബസമേതമെത്തി സന്തോഷിക്കാനും ആസ്വദിക്കാനുമുളള സുരക്ഷിത ഇടമായി ശാന്തിഗിരി ഫെസ്റ്റ് മാറുകയാണ്. പുതുവത്സര ആഘോഷത്തോടനുബന്ധിച്ച് സുരക്ഷസംവിധാനങ്ങൾ കർശനമാക്കുമെന്നും ഓരോ പോയിന്റിലും പ്രദർശനവിപണന സ്റ്റാളുകളിലും പ്രത്യേകം വോളണ്ടിയേഴ്‌സിനെ ചുമതലപ്പെടുത്തുമെന്നും ഫെസ്റ്റ് കോർഡിനേഷൻ ഓഫീസിൽ നിന്നും അധികൃതർ അറിയിച്ചു. 

ഫോട്ടോ : പുതുവത്സരആഘോഷങ്ങളുടെ മുന്നോടിയായി ശാന്തിഗിരിയിലെ താമര പർണ്ണശാല  ദീപാലംകൃതമായപ്പോൾ