ശിവഗിരി തീർഥാടനം: കൊടിക്കയർ പദയാത്ര തുടങ്ങി

ചേർത്തല : ശിവഗിരി തീർഥാടനത്തിന്റെ ഭാഗമായി ശിവഗിരിയിൽ പതാക ഉയർത്താനുള്ള കൊടിക്കയറുമായുള്ള പദയാത്ര തുടങ്ങി. ചേർത്തല താലൂക്ക് മഹാസമാധിദിനാചരണ കമ്മിറ്റിയുടെ നേതൃത്വത്തിലാണ് കൊടിക്കയർ പദയാത്രയായി ശിവഗിരിയിലെത്തിക്കുന്നത്. ശ്രീനാരായണഗുരു കണ്ണാടിപ്രതിഷ്ഠ നടത്തിയ കളവംകോടം ശക്തീശ്വരം ക്ഷേത്രത്തിൽനിന്നുള്ള പദയാത്രയിൽ ഇരുനൂറോളം പേരാണ് അണിനിരക്കുന്നത്.

ഗുരുദേവ പ്രാർഥനാമണ്ഡപത്തിൽ പ്രത്യേക പൂജകൾക്കുശേഷം പ്രഭോനന്ദതീർഥ സ്വാമി ജാഥാ ക്യാപ്റ്റൻ വിജയഘോഷ് ചാരങ്കാടിനു കൊടിക്കയർ കൈമാറി. സമ്മേളനം മുൻ എം.പി. എ.എം. ആരിഫ് ഉദ്ഘാടനം ചെയ്തു. വിജയഘോഷ് ചാരങ്കാട്ട് അധ്യക്ഷനായി. സി.ആർ. ദേവരാജ് ചാരങ്കാട്ട് പതാക കൈമാറി.

ശക്തീശ്വരം ക്ഷേത്രം പ്രസിഡന്റ് സി.കെ. ഷാജിമോഹൻ, താലൂക്ക് മഹാസമാധിദിനാചരണ കമ്മിറ്റി കൺവീനർ കെ.ആർ. രാജു കുത്തിയതോട്, വൈസ് ചെയർമാൻ വിദ്യാധരൻ തുറവൂർ, ലേജുമോൾ, പി.എം. പുഷ്കരൻ പുത്തൻകാവ്, ആർ. രമണൻ, ശാന്തകുമാർ, സുരേഷ്, രാജേന്ദ്രപ്രസാദ്, അശോകൻ ചാരങ്കാട്ട് എന്നിവർ സംസാരിച്ചു. പദയാത്ര വിവിധ കേന്ദ്രങ്ങളിലെ സ്വീകരണമേറ്റുവാങ്ങി 29-നു വൈകീട്ട് ശിവഗിരിയിലെത്തും.