ഗുരുസ്മരണയിൽ‍ ശാന്തിഗിരിയിൽ‍ ദീപപ്രദക്ഷിണം

നവഒലി ജ്യോതിർദിനം ആഘോഷങ്ങൾക്ക്

ദിവ്യപൂജാസമർപ്പണത്തോടെ സമാപനം

പോത്തൻ‍കോട്: ശാന്തിഗിരി ആശ്രമത്തിൽ‍ ഇരുപത്തിയഞ്ചാമത് നവഒലി ജ്യോതിർദിനം ആഘോഷങ്ങളുടെ ഭാഗമായി നടന്ന ദീപ പ്രദക്ഷിണം ഭക്തിസാന്ദ്രമായി. യജ്ഞശാലയിൽ‍ നിന്നും ആരംഭിച്ച ദീപ പ്രദക്ഷിണത്തിൽ സന്ന്യാസി- സന്ന്യാസിനിമാരും നൂറുകണക്കിന് ഗുരുഭക്തരും ദീപങ്ങളുമായി ആശ്രമസമുച്ചയം വലയം വച്ച് ഗുരുപാദങ്ങളിൽ സമർ‍പ്പിച്ചു. പഞ്ചവാദ്യ- നാദസ്വരങ്ങളുടെ അകമ്പടിയോടെയായിരുന്നു ദീപ പ്രദക്ഷിണം. ഗുരുവിൻ്റെ ആദിസങ്കൽപ്പലയനം സംഭവിച്ച രാത്രി 9.15 മുതൽ 9.30 വരെയുളള സമയത്ത് ആശ്രമാന്തരീക്ഷം അഖണ്ഡമന്ത്രാക്ഷര മുഖരിതമായി. പഞ്ചവാദ്യത്തിനൊപ്പം 25 രാജ്യങ്ങളിലെ വാദ്യസംഗീതം സമന്വയിപ്പിച്ചു കൊണ്ടുളള മ്യൂസിക് ഫ്യൂഷൻ വ്യത്യസത്മായ ആത്മീയാനുഭവം ഭക്തർക്ക് സമ്മാനിച്ചു . രാജ്യത്തിനകത്തു നിന്നും പുറത്തു നിന്നുമായി ആയിരകണക്കിന് ഗുരുഭക്തർ നവഒലി ജ്യോതിർദിനത്തിൽ‍ പങ്കെടുത്തു. 

ആശ്രമ സ്ഥാപക ഗുരു ആദിസങ്കൽപ്പത്തിൽ ( ദേഹവിയോഗം) ലയിച്ചത് മെയ് 6 ന് ആണെങ്കിലും മെയ് 7 ന് അഞ്ചുമണിയുടെ ആരാധനയോട് കൂടിയാണ് ഭൗതികശരീരം പർണ്ണശാലയിൽ അടക്കം ചെയതത്. ഈ ദിനം ദിവ്യപൂജ സമർപ്പണമായി ശാന്തിഗിരി പരമ്പര ആചരിക്കുന്നു. എല്ലാ വർഷവും നവഒലി ജ്യോതിർദിനാഘോഷങ്ങൾ അവസാനിക്കുന്നത് ദിവ്യപൂജ സമർപ്പണത്തോടെയാണ്. സമർപ്പണത്തിന്റെ ഭാഗമായി വൈകിട്ട് 5 ന് ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വിയുടേയും പ്രസിഡന്റ് സ്വാമി ചൈതന്യ ജ്ഞാന തപസ്വിയുടേയും നേതൃത്വത്തിലുള്ള സന്യാസി സംഘവും ഗുരുഭക്തരും ആശ്രമത്തിൽ പ്രത്യേക പ്രാർത്ഥന നടത്തി. ഇതോടെ ഇത്തവണത്തെ നവഒലി ജ്യോതിർദിനം ആഘോഷങ്ങൾക്ക് സമാപനമായി 

ഫോട്ടോ : ഇരുപത്തിയഞ്ചാമത് നവഒലി ജ്യോതിർദിനത്തോടനുബന്ധിച്ച് പോത്തൻകോട് ശാന്തിഗിരി ആശ്രമത്തിൽ നടന്ന് ദീപപ്രദക്ഷിണം