കർക്കടകവും രാമായണവും: സമകാലീന സമൂഹത്തിന് ഒരു വഴികാട്ടി വാസ്‌തുഗുരു ഡോ. നിശാന്ത് തോപ്പിൽ M.Phil ,Ph .D

പ്രകൃതിപോലും അതിന്റെ ഭാവപ്പകർച്ചകളാൽ മനസ്സിനെ ഒന്നു തളർത്താൻ ശ്രമിക്കുന്ന കാലമാണ് കർക്കടകം. ആധിധ്യാധികൾ നിറഞ്ഞ, കരിമേഘങ്ങൾ മൂടിയ ഈ കറുത്ത ദിനങ്ങളെ വെളിച്ചത്തിലേക്ക് നയിക്കാനാണ് നാം രാമായണ പാരായണം ആരംഭിക്കുന്നത്. ഇന്ന് കർക്കടകം മൂന്ന്. 

വീടുകളിൽ ഭദ്രദീപത്തിനു മുന്നിലിരുന്ന് അധ്യാത്മരാമായണത്തിന്റെ താളുകൾ മറിയുമ്പോൾ, അത് വെറുമൊരു ആചാര അനുഷ്ഠാനത്തിനപ്പുറം, നാം ജീവിക്കുന്ന ഈ സമകാലീന സമൂഹത്തിന് എത്രത്തോളം പ്രസക്തമാണെന്ന് ചിന്തിക്കേണ്ട നിമിഷം കൂടിയാണിത്.

യുഗങ്ങൾക്കപ്പുറം നടന്ന ഒരു കഥ എന്നതിലുപരി, ഇന്നത്തെ ആധുനിക മനുഷ്യൻ നേരിടുന്ന എല്ലാ സങ്കീർണ്ണതകൾക്കും മാനസിക സംഘർഷങ്ങൾക്കും ഉള്ള ശാശ്വത പരിഹാരമാണ് രാമായണം.

നാം ജീവിക്കുന്ന ഇന്നത്തെ സമൂഹം സാങ്കേതികവിദ്യയിലും ഭൗതികസാഹചര്യങ്ങളിലും ഏറെ മുന്നിലാണ്. എന്നാൽ, ധാർമ്മിക മൂല്യങ്ങളുടെ കാര്യത്തിൽ മനുഷ്യൻ പിന്നോട്ട് പോയിക്കൊണ്ടിരിക്കുന്നു. സ്വാർത്ഥതയും, അധികാരമോഹവും, കുടുംബബന്ധങ്ങളിലെ വിള്ളലുകളും ഇന്നത്തെ വാർത്തകളിൽ നിറയുമ്പോൾ, രാമായണം നമുക്ക് മുന്നിൽ വെക്കുന്നത് ത്യാഗത്തിന്റെയും പരസ്പര സ്നേഹത്തിന്റെയും ഉദാത്തമായ മാതൃകകളാണ്.

ഒരു വശത്ത് സിംഹാസനത്തിന് വേണ്ടി സഹോദരങ്ങൾ തമ്മിൽ പോരടിക്കുന്ന ആധുനിക ലോകം. മറുവശത്ത്, തനിക്ക് കിട്ടേണ്ട രാജ്യം ജ്യേഷ്ഠന് വേണ്ടി സന്തോഷത്തോടെ ഒഴിഞ്ഞുകൊടുക്കുന്ന ഭരതനും, ജ്യേഷ്ഠന്റെ തണലായി കാട്ടിലേക്ക് ഇറങ്ങിത്തിരിക്കുന്ന ലക്ഷ്മണനും. ഈ സഹോദരസ്നേഹവും ത്യാഗമനോഭാവവും തന്നെയാണ് ഇന്നത്തെ കുടുംബങ്ങൾക്ക് ഏറ്റവും വലിയ പാഠം.

വാസ്തുവും മാനസിക ഊർജ്ജവും രാമായണത്തിൽ

ഒരു വാസ്തു ആചാര്യൻ എന്ന നിലയിൽ ഞാൻ എപ്പോഴും ഊന്നിപ്പറയുന്ന ഒന്നാണ് 'ഊർജ്ജം' (Energy). നമ്മുടെ വീടുകളിലും മനസ്സുകളിലും പോസിറ്റീവ് ഊർജ്ജം നിറയുക എന്നത് പ്രധാനമാണ്. കർക്കടകത്തിലെ രാമായണ പാരായണം വീടുകളിലെ നെഗറ്റീവ് ഊർജ്ജത്തെ പുറംതള്ളി, പ്രശാന്തത കൈവരുത്തുന്നു.

രാമായണം കേവലം രാമന്റെ യാത്ര മാത്രമല്ല, അത് മനുഷ്യ മനസ്സിന്റെ പരിവർത്തനത്തിന്റെ കഥ കൂടിയാണ്. അഹങ്കാരത്തിന്റെയും അധർമ്മത്തിന്റെയും പ്രതീകമായ രാവണനെ, ധർമ്മത്തിന്റെയും വിനയത്തിന്റെയും പ്രതീകമായ ശ്രീരാമൻ കീഴടക്കുന്നത് നമ്മുടെ ഉള്ളിലെ തിന്മകളെ നാം തന്നെ ജയിക്കണം എന്ന സന്ദേശമാണ് നൽകുന്നത്.

സമകാലീന പ്രസക്തി: വർത്തമാനകാലത്തെ രാമരാജ്യം

ഇന്നത്തെ സമൂഹം നേരിടുന്ന ഏറ്റവും വലിയ വെല്ലുവിളി വ്യക്തിബന്ധങ്ങളിലെ ആത്മാർത്ഥതക്കുറവാണ്. വാക്കുകൾക്ക് വിലയില്ലാതാകുന്ന കാലത്ത്, 'പിതൃവാക്യ പരിപാലനത്തിനായി' സർവ്വ സുഖങ്ങളും ഉപേക്ഷിച്ച് കാട്ടിലേക്ക് പോയ രാമൻ, വാഗ്ദാനങ്ങൾ പാലിക്കേണ്ടതിന്റെ മഹത്വം കാണിച്ചുതരുന്നു. മികച്ച ഭരണാധികാരി എങ്ങനെയായിരിക്കണം എന്ന് 'രാമരാജ്യം' എന്ന സങ്കല്പത്തിലൂടെ രാമായണം വ്യക്തമാക്കുന്നു. പ്രജകളുടെ സങ്കടങ്ങൾക്കൊപ്പം നിൽക്കുന്ന, ധർമ്മനിഷ്ഠയുള്ള ഭരണാധികാരിയും, നിയമങ്ങൾ അനുസരിക്കുന്ന ജനങ്ങളും ഉള്ളിടത്താണ് സമാധാനം പുലരുക.

കർക്കടകത്തിലെ ഈ രാമായണ നാളുകൾ കേവലം വായനയിൽ ഒതുങ്ങേണ്ടതല്ല. അതിലെ ഓരോ ശ്ലോകവും ജീവിതത്തിൽ പകർത്താനുള്ളതാണ്. മാതാപിതാക്കളോടുള്ള കടമ, പങ്കാളിയോടുള്ള വിശ്വസ്തത, സഹോദരസ്നേഹം, സമൂഹത്തോടുള്ള പ്രതിബദ്ധത എന്നിവയെല്ലാം രാമായണം നമ്മെ ഓർമ്മിപ്പിക്കുന്നു.

ഈ കർക്കടക മാസം നമ്മുടെ മനസ്സിനെയും വീടിനെയും ശുദ്ധീകരിക്കാ നുള്ളതാകട്ടെ. ആധുനിക സമൂഹത്തിന്റെ വഴിതെറ്റലുകൾക്ക് നേർവഴി കാട്ടാൻ രാമായണത്തിലെ ധർമ്മസന്ദേശങ്ങൾക്ക് സാധിക്കട്ടെ എന്ന് പ്രാർ ത്ഥിക്കുന്നു. എല്ലാവർക്കും ഹൃദയം നിറഞ്ഞ രാമായണമാസ ആശംസകൾ.