ഇന്നത്തെ കാലത്ത് ചെറിയ കുട്ടികൾ പോലും കടുത്ത മാനസിക സംഘർഷത്തിൽ: സ്വാമി ചിദാനന്ദപുരി

രാമനാട്ടുകര: ലോകത്ത് എല്ലായിടത്തും ഇന്ന് സംഘർഷഭരിതമായ അന്തരീക്ഷമാണ് നിലനിൽക്കുന്നതെന്നും മുതിർന്നവർ മാത്രമല്ല, ചെറിയ കുട്ടികൾ പോലും കടുത്ത മാനസിക സമ്മർദ്ദവും ടെൻഷനും അനുഭവിച്ചാണ് ജീവിക്കുന്നതെന്നും സ്വാമി ചിദാനന്ദപുരി അഭിപ്രായപ്പെട്ടു. ചലനാത്മകമായ ഒരു സമൂഹത്തിൽ ആത്മീയതയുടെ പ്രാധാന്യം ഒരിക്കലും കുറയുകയോ മാറിനിൽക്കുകയോ ഇല്ലെന്നും അദ്ദേഹം കൂട്ടിച്ചേർത്തു. അഴിഞ്ഞിലം ത്രൈലോക്യാനന്ദ സ്മാരക സമിതിയുടെ നേതൃത്വത്തിൽ സംഘടിപ്പിച്ച സാംസ്കാരിക സദസ്സിൽ ആത്മീയ പ്രഭാഷണം നടത്തുകയായിരുന്നു അദ്ദേഹം.

​സാംസ്കാരിക സദസ്സ് ചടങ്ങിൽ സമിതി പ്രസിഡന്റ് കെ.ഐ. ഹരീന്ദ്രനാഥ് അധ്യക്ഷത വഹിച്ചു. അഴിഞ്ഞിലം തളി മഹാവിഷ്ണു ക്ഷേത്രം പ്രസിഡന്റ് പി. രാവുണ്ണിക്കുട്ടി നായർ, പി.പി. വേലായുധൻകുട്ടി നായർ, സെക്രട്ടറി സി. ബാലൻ തുടങ്ങിയ പ്രമുഖർ ചടങ്ങിൽ സംബന്ധിക്കുകയും സംസാരിക്കുകയും ചെയ്തു.