പരാജയങ്ങൾ ജീവിതത്തിന്റെ അവസാനമല്ല, പഠനത്തിന്റെ ആദ്യ ചുവടുവെപ്പുകൾ മാത്രം :കളക്ടർ എൻ. ദേവിദാസ്

'മികവിന്റെ മൂന്ന് ദിനങ്ങൾ'; അമൃതപുരിയിലെ അവധിക്കാല ക്യാമ്പിന് ഹൃദ്യമായ സമാപനം

അമൃതപുരി: അറിവും കളിചിരികളും നിറഞ്ഞ മൂന്നു ദിവസത്തെ ക്യാമ്പ് അനുഭവങ്ങൾക്കൊടുവിൽ അമൃതപുരിയിലെ കുട്ടിക്കൂട്ടം വിടപറഞ്ഞു. വിവിധയിടങ്ങളിൽ നിന്നുമെത്തി കുറഞ്ഞ നാളുകൾ കൊണ്ട് ആഴമേറിയ സൗഹൃദം പങ്കിട്ട കുട്ടികൾ, ഇനിയും കാണാമെന്ന സ്നേഹവാക്കുകളോടെ യാണ് ക്യാമ്പ് അവസാനിപ്പിച്ചത്. മലയാള മനോരമയും അമൃത വിശ്വവിദ്യാപീഠവും സംയുക്തമായി സംഘടിപ്പിച്ച 'മികവിന്റെ 3 ദിനങ്ങൾ' അവധിക്കാല ക്യാമ്പാണ് ഹൃദ്യമായ ഓർമ്മകളോടെ സമാപിച്ചത്.

ക്യാമ്പിന്റെ സമാപന സമ്മേളന ഉദ്ഘാടനം ജില്ലാ കളക്ടർ എൻ. ദേവിദാസ് നിർവഹിച്ചു. മലയാള മനോരമ എഡിറ്റോറിയൽ ഡയറക്ടർ ജോസ് പനച്ചിപ്പു റം, അമൃത വിശ്വവിദ്യാപീഠം കരിയർ കോംപിറ്റൻസി ചെയർമാൻ എം.എസ്. കൃഷ്ണൻകുട്ടി, ഇംഗ്ലീഷ് വിഭാഗം അസിസ്റ്റന്റ് പ്രൊഫസറും ഔട്ട്റീച്ച് ആൻഡ് കമ്മ്യൂണിക്കേഷൻ മാനേജരുമായ അശ്വതി ദാസ് എന്നിവർ ചടങ്ങിൽ സംസാരിച്ചു.

പരാജയങ്ങൾ ജീവിതത്തിന്റെ അവസാനമല്ല, മറിച്ച് പഠനത്തിന്റെ ആദ്യ ചുവടുവെപ്പുകൾ മാത്രമാണെന്ന് കളക്ടർ എൻ. ദേവിദാസ് തന്റെ ഉദ്ഘാടന പ്രസംഗത്തിൽ ഓർമ്മിപ്പിച്ചു. തോൽവികളെ പുതിയൊരു അവസരമായി കാണാൻ കുട്ടികൾക്ക് കഴിയണം. അറിവ് നേടുന്നതിനൊപ്പം തന്നെ മാനുഷിക മൂല്യങ്ങൾ ഉയർത്തിപ്പിടിക്കാനും ജീവിതത്തിൽ ശരിയായ മാർഗ്ഗത്തിലൂടെ ലക്ഷ്യത്തിലേക്ക് സഞ്ചരിക്കാനും ശ്രമിക്കണം. വിജയങ്ങളിലേക്ക് കുറുക്കുവഴികളില്ലെന്നും അതിനായി കഠിനാധ്വാനം ചെയ്യണമെന്നും അദ്ദേഹം കൂട്ടിച്ചേർത്തു. ഡിജിറ്റൽ ലോകത്ത് മാത്രം ഒതുങ്ങിപ്പോകുന്ന പുതിയ തലമുറയ്ക്ക് ഇത്തരം കൂട്ടായ്മകൾ വലിയ ആശ്വാസമാണെന്നും, അറിവിനും വിനോദത്തിനുമപ്പുറം നല്ല സൗഹൃദ ങ്ങളും സാഹോദര്യവും സമഭാവനയും വളർത്തിയെടുക്കാൻ കുട്ടികൾക്ക് സാധിക്കണമെന്നും കളക്ടർ പറഞ്ഞു.

സമാപന ദിനത്തിൽ കുട്ടികൾക്കായി വൈവിധ്യമാർന്ന സെഷനുകളാണ് ഒരുക്കിയിരുന്നത്.