ആറ്റുകാൽ ഭഗവതി ക്ഷേത്രം: സ്ത്രീകളുടെ ശബരിമല.

കിള്ളി നദിയിൽ കുളിച്ചു കൊണ്ടിരുന്ന മുല്ലുവീട്ടിൽ തറവാട്ടിലെ കാരണവർക്ക് മുന്നിൽ ഒരു ബാലികയായി ദേവി പ്രത്യക്ഷപ്പെട്ടു.

  നദി കടക്കാൻ സഹായിച്ച കാരണവർ ബാലികയെ വീട്ടിലേക്ക് ക്ഷണിച്ചു. എന്നാൽ പെട്ടെന്ന് ബാലിക അപ്രത്യക്ഷയായി.

  അന്ന് രാത്രി കാരണവരുടെ സ്വപ്നത്തിൽ പ്രത്യക്ഷപ്പെട്ട ദേവി, താൻ ഇരുന്ന കാട്ടുപടർപ്പിൽ മൂന്ന് വരകൾ കാണുമെന്നും അവിടെ തനിക്കായി ഒരു ക്ഷേത്രം പണിയണമെന്നും ആവശ്യപ്പെട്ടു.

  അപ്രകാരം നിർമ്മിക്കപ്പെട്ടതാണ് ഇന്നത്തെ ആറ്റുകാൽ ക്ഷേത്രം എന്നാണ് സങ്കൽപം.

ലോകപ്രശസ്തമായ ആറ്റുകാൽ പൊങ്കാല

ലോകത്തിൽ ഏറ്റവും കൂടുതൽ സ്ത്രീകൾ ഒത്തുചേരുന്ന ചടങ്ങ് എന്ന നിലയിൽ ഗിന്നസ് ബുക്കിൽ ഇടംപിടിച്ച ഉത്സവമാണ് ആറ്റുകാൽ പൊങ്കാല. മകരം-കുംഭം മാസങ്ങളിലായി നടക്കുന്ന പത്തുദിവസത്തെ ഉത്സവത്തിന്റെ ഒൻപതാം നാളിലാണ് പൊങ്കാല നടക്കുന്നത്.

  അരി, ശർക്കര, തേങ്ങ, നെയ്യ് എന്നിവ ചേർത്ത് മൺകലത്തിൽ തയ്യാറാക്കുന്ന 'പൊങ്കാല നിവേദ്യം' ദേവിക്ക് ഏറ്റവും പ്രിയപ്പെട്ടതാണെന്ന് വിശ്വസിക്കപ്പെടുന്നു.

  വ്രതശുദ്ധിയോടെ എത്തുന്ന ലക്ഷക്കണക്കിന് സ്ത്രീകൾ കിലോമീറ്ററുകളോളം നിരന്ന് റോഡരികിൽ അടുപ്പുകൂട്ടി പൊങ്കാല അർപ്പിക്കുന്നു.

  ക്ഷേത്ര മുറ്റത്തെ പണ്ടാര അടുപ്പിൽ തീ ജ്വലിപ്പിക്കുന്നതോടെയാണ് ചടങ്ങുകൾക്ക് തുടക്കമാകുന്നത്. ഉച്ചയ്ക്ക് ഉച്ചപൂജയ്ക്ക് ശേഷം മേൽശാന്തി തീർത്ഥം തളിക്കുന്നതോടെ പൊങ്കാല പൂർത്തിയാകുന്നു.

  പൊങ്കാല കൂടാതെ മറ്റ് ചില പ്രധാന ആചാരങ്ങളും ഈ ഉത്സവത്തിന്റെ ഭാഗമാണ്. കണ്ണകിയുടെ ചരിത്രം വിവരിക്കുന്ന തോറ്റംപാട്ട് ഉത്സവകാലത്ത് ക്ഷേത്രത്തിൽ പാടാറുണ്ട്. പാണ്ഡ്യരാജാവിന്റെ നിഗ്രഹത്തെ വിവരിക്കുന്ന ഭാഗം പാടി കഴിയുമ്പോഴാണ് പൊങ്കാല അടുപ്പിൽ തീ കത്തിക്കുന്നത്.

 ബാലന്മാർ നടത്തുന്ന ഒരു വഴിപാടാണ് കുത്തിയോട്ടം. മഹിഷാസുരനെ നിഗ്രഹിച്ച ദേവിയുടെ പടയാളികളായാണ് ഇവർ സങ്കൽപ്പിക്കപ്പെടുന്നത്.

  ചെറിയ പെൺകുട്ടികൾ ഐശ്വര്യത്തിനായി നടത്തുന്ന വഴിപാടാണ് താലപ്പൊലി.

ജാതി-മത ഭേദമന്യേ ലക്ഷക്കണക്കിന് സ്ത്രീകൾ ഒത്തുചേരുന്ന ആറ്റുകാൽ പൊങ്കാല സ്ത്രീശക്തിയുടെയും ഐക്യത്തിന്റെയും പ്രതീകം കൂടിയാണ്. തിരുവനന്തപുരം നഗരത്തെ ഭക്തിസാന്ദ്രമാക്കുന്ന ഈ ഉത്സവം കേരളത്തിന്റെ സാംസ്കാരിക ഭൂപടത്തിലെ സുവർണ്ണ അധ്യായമാണ്.

ബിജു കാരക്കോണം.