സഹനത്തിൻ കുരിശുമെടുത്ത്...

കട്ടപ്പന: കിഴക്കിൻ്റെ കാൽവരി എന്നറിയപ്പെടുന്ന എഴുകുംവയൽ കുരിശുമലയിൽ ദുഃഖവെള്ളിയാഴ്‌ചയിൽ വിശ്വാസികൾ മലകയറി.രാവിലെ മലയടിവാരത്തുള്ള ടൗൺ കപ്പേളയിൽനിന്ന് ഇടുക്കി രൂപതാ മെത്രാൻ മാർ ജോൺ നെല്ലിക്കുന്നേലിന്റെ നേതൃത്വത്തിൽ കുരിശിൻ്റെ വഴി പ്രാർഥന ചൊല്ലി പരിഹാര പ്രദക്ഷിണമായി മലമുകളിലെത്തി. തുടർന്ന് മലമുകളിലുളള ദേവാലയത്തിൽ ദുഃഖവെള്ളിയോടനുബന്ധിച്ചുള്ള പ്രത്യേക പ്രാർഥനകളും കുർബാനയും നടന്നു. മലമുകളിലുള്ള കർമങ്ങൾക്ക് എഴുകുംവയൽ കുരിശുമല ഡയറക്ടർ ഫാ. തോമസ് വട്ടമല, അസിസ്റ്റൻ്റ് വികാരി ഫാ. ലിബിൻ വള്ളിയാംതടം, ഫാ. ആൻ്റണി പാലപ്പുളിക്കൽ, ഫാ. അമൽ മണിമലക്കുന്നേൽ എന്നിവർ സഹകാർമികരായി. ജില്ലയിലെ വിവിധ സ്ഥലങ്ങളിൽനിന്ന് സ്വകാര്യ ബസുകളും കെഎസ്ആർടിസിയും സർവീസ് നടത്തി.