ഹിന്ദിയും മലയാളവും കന്നഡയും സ്നേഹിച്ചവർ

ഉദുമ: ഹിന്ദി മാതൃഭാഷയായ മധ്യപ്രദേശിൽ ജനിച്ചു. വളരുന്നത് ഇങ്ങ് കേരളത്തിൽ. പഠിക്കുന്നതാകട്ടെ കന്നഡ മീഡിയത്തിലും. ഹിന്ദിയും മലയാളവും കന്നഡയും മാതൃഭാഷയാക്കുന്ന മൂന്ന് സഹോദരികൾ ബേക്കൽ ഗവ. ഫിഷറീസ് ഹയർ സെക്കൻഡറി സ്‌കൂളിൽ ഇത്തവണ പത്താം തരം പരീക്ഷ എഴുതുന്നുണ്ട്. മുസ്കാൻ റാത്തോർ, രാഗിണി റാത്തോർ, ചാന്ദിനി റാത്തോർ എന്നിവരാണ് കന്നഡ ഒന്നാം പേപ്പർ നന്നായെഴുതി ആദ്യ ദിവസം സന്തോഷത്തോടെ പരീക്ഷാ ഹാൾ വിട്ടത്.

മൂത്തയാളായ മുസ്കകാൻ റാത്തോർ രണ്ടാം ക്ലാസുവരെ ജന്മനാട്ടിൽ പഠിച്ചിരുന്നു. കുടുംബം കളനാട്ടേക്ക് വന്നതോടെ മൂന്നുപേരും ബേക്കൽ എ.എൽ.പി.എസിൽ ഒന്നാം ക്ലാസിൽ ചേർന്നു. അങ്ങനെയാണ് സഹോദരങ്ങളെല്ലാം ഒരേ വർഷം പത്താം തരത്തിലെത്തുന്നത്. ഗ്വാളിയർ മൊറേനയിൽനിന്നും 30 വർഷം മുൻപ് മാർബിൾ ജോലിക്കെത്തി നിരോത്തം റാത്തോറിൻ്റെയും സീമ റാത്തോറിൻ്റെയും മക്കളാണിവർ.

മലയാളവും ഹിനിയും കന്നഡയും നന്നായി എഴുതാനും വായിക്കാനും കഴിയുന്ന ഈ കുട്ടികൾ മികച്ച വിജയം നേടുമെന്ന് പ്രതീക്ഷിക്കുന്നതായി കന്നഡ മീഡിയത്തിന്റെ ചുമതലയുള്ള മുതിർന്ന അധ്യാപികയായ രജനിയും സ്കൂൾ പരിസ്ഥിതി ക്ലബിൻ്റെ ചുമതലയുള്ള അധ്യാപകൻ എ.കെ. ജയപ്രകാശും പറഞ്ഞു.