സ്‌ക്വാഡ്രൺ ലീഡർ ലക്ഷ്മിയുടെ ഓർമ്മകൾക്ക് പതിറ്റാണ്ട്

വിളപ്പിൽശാല: എയർഫോഴ്‌സ് അക്കാദമിയിൽ പ്രവേശനം നേടിയ ആദ്യ മലയാളിപ്പെൺകുട്ടിയായി വിളപ്പിൽശാലയുടെ അഭിമാനമായി മാറിയ ലക്ഷ്മിയുടെ കണ്ണീരോർമ്മകൾക്ക് പത്തുവർഷം. വിളപ്പിൽശാല കുന്നുംപുറം ലക്ഷ്മിനിവാസിൽ എയർഫോഴ്‌സ് സ്‌ക്വാഡ്രൺ ലീഡർ ലക്ഷ്മി എസ്.നായർ 2014 ഒക്ടോബർ 23-നാണ് വിടപറഞ്ഞത്.

പഠനകാലത്ത് നാടിന്റെ അഭിമാനമായിരുന്നു ലക്ഷ്മി. 2004-ൽ സൈനികസേവനം പെൺകുട്ടികൾക്ക് അപ്രാപ്യമല്ലെന്ന് തെളിയിച്ച് സെക്കന്തരാബാദ് എയർഫോഴ്‌സ് അക്കാദമിയിൽ പ്രവേശനം നേടി. ഇരുപത്തിനാലാം വയസ്സിൽ ജമ്മുകശ്മീരിൽ ഫ്ളൈയിങ് ഓഫീസറായി നിയമനം. കശ്മീരിൽ മികച്ച സേവനത്തിന് ഗവർണറുടെ പുരസ്കാരത്തിന് അർഹയായി. 32-ാം വയസ്സിലാണ് നാടിനെ കണ്ണീരിലാഴ്ത്തി ലക്ഷ്മി വിടപറഞ്ഞത്.

ബുധനാഴ്ച ലക്ഷ്മിയുടെ പത്താം ഓർമ്മദിനമായിരുന്നു. അച്ഛൻ കെ.എസ്.നായരും അമ്മ ശോഭനനായരും ബന്ധുക്കളും സ്മൃതിമണ്ഡപത്തിൽ കണ്ണീരോർമ്മയിൽ പുഷ്പാർച്ചന നടത്തി.

2014-ൽ ഉത്തർപ്രദേശിലെ മധുര മിലിറ്ററി ആശുപത്രിയിൽ രണ്ടാമത്തെ കുഞ്ഞിന്റെ പ്രസവത്തെത്തുടർന്ന് ലക്ഷ്മിക്ക്‌ അസ്വസ്ഥത അനുഭവപ്പെട്ടു. തുടർന്ന് ഡൽഹി മിലിറ്ററി ആശുപത്രിയിലേക്കു മാറ്റിയെങ്കിലും അവിടെവെച്ച് 2014 ഒക്ടോബർ 23-ന് മരിച്ചു. മരിക്കുമ്പോൾ ആഗ്രയിൽ എയർ ട്രാഫിക് കൺട്രോളറായിരുന്നു ലക്ഷ്മി. പൂർണ സൈനികബഹുമതികളോടെ വീട്ടുവളപ്പിലായിരുന്നു സംസ്കാരം.

സെക്കന്തരാബാദ് എയർഫോഴ്‌സ് സ്റ്റേഷനിൽ വിങ് കമാൻഡറാണ് ലക്ഷ്മിയുടെ ഭർത്താവ് ഷാജി നായർ. മക്കളായ പ്ലസ്‌വൺ വിദ്യാർഥി ശ്രേയ, അഞ്ചാം ക്ലാസുകാരൻ അവിനാഷ് എന്നിവർ അച്ഛനൊപ്പം ഹൈദരാബാദിലാണ്.