ആന്ധ്ര മുഖ്യമന്ത്രി ജഗന്‍ മോഹന്‍ റെഡ്ഡിക്കുനേരെ ആക്രമണം; കല്ലേറിൽ കണ്ണിന് സമീപം പരിക്ക്

വിജയവാഡ: വൈ.എസ്.ആർ. കോൺ​ഗ്രസ് അധ്യക്ഷനും ആന്ധ്രപ്രദേശ് മുഖ്യമന്ത്രിയുമായ ജഗന്‍ മോഹന്‍ റെഡ്ഡിക്കുനേരെ കല്ലേറ്. ശനിയാഴ്ച രാത്രി വിജയവാഡയിലെ തിരഞ്ഞെടുപ്പ് പ്രചാരണത്തിനിടെയായിരുന്നു സംഭവം. അക്രമത്തില്‍ അദ്ദേഹത്തിന്റെ ഇടതു കണ്ണിന് മുകളിലായി പരിക്കേറ്റു.

To advertise here, Contact Us

വിജയവാഡയിലെ സിങ് ന​ഗറിലെ വിവേകാനന്ദ സ്കൂൾ സെന്റർ പരിസരത്ത് ജനങ്ങളെ അഭിവാദ്യം ചെയ്യുന്നതിനിടെയായിരുന്നു അജ്ഞാതന്റെ കല്ലേറ്. പ്രവർത്തകർ മാലയിട്ട് ​ജ​ഗനെ സ്വീകരിക്കുന്നതിനിടയിലായിരുന്നു ആൾക്കൂട്ടത്തിനിടയിൽ നിന്നും ആക്രമണം. സംഭവത്തിന്റെ വീഡിയോ ദൃശ്യങ്ങൾ പുറത്തുവന്നു.

കല്ലേറുണ്ടായ ഉടൻ പ്രചാരണ വാഹനത്തിൽ വച്ചുതന്നെ ഡോക്ടർമാർ അദ്ദേഹത്തിന് പ്രാഥമിക ചികിത്സ നൽകി. തുടര്‍ന്ന്‌, ജ​ഗൻ തന്റെ പര്യടനം പുനരാരംഭിച്ചു. കല്ലേറിന് പിന്നിൽ ആരാണെന്ന്‌ കണ്ടെത്താൻ പോലീസിന് സാധിച്ചിട്ടില്ല. അതേസമയം, അക്രമത്തിന് പിന്നിൽ ടി.ഡി.പി പ്രവർത്തകരാണെന്ന് വൈ.എസ്.ആർ.സി.പി നേതാക്കൾ ആരോപിച്ചു.