ചെക്ക് കേസ്: മാണി സി. കാപ്പൻ എം.എൽ.എ.യുടെ ശിക്ഷ മരവിപ്പിച്ച് സെഷൻസ് കോടതി

മുംബൈ: ചെക്ക് തിരിമറി കേസിൽ പാലാ എം.എൽ.എ. മാണി സി. കാപ്പന് മുംബൈ ദിന്തോഷി സെഷൻസ് കോടതിയുടെ ആശ്വാസ വിധി. കേസിൽ കീഴ്ക്കോടതി വിധിച്ച ശിക്ഷാ നടപടികൾ സെഷൻസ് കോടതി മരവിപ്പിച്ചു. ശിക്ഷ റദ്ദാക്കണമെന്ന് ആവശ്യപ്പെട്ട് മാണി സി. കാപ്പൻ നൽകിയ അപ്പീൽ പരിഗണിച്ച കോടതി, പിഴത്തുകയുടെ 20 ശതമാനം കെട്ടിവെക്കാനും നിർദേശിച്ചു.

​സെക്യൂരിറ്റി എന്ന നിലയിലാണ് ചെക്ക് നൽകിയതെന്നാണ് അപ്പീലിൽ കാപ്പന്റെ അഭിഭാഷകൻ കോടതിയിൽ വാദിച്ചത്. കണ്ണൂർ വിമാനത്താവളത്തിൽ ഓഹരി പങ്കാളിത്തം വാഗ്ദാനം ചെയ്ത് മൂന്ന് കോടിയിലധികം രൂപ തട്ടിയെടുത്തെന്ന പ്രവാസി മലയാളിയായ പാലക്കാട് സ്വദേശി ദിനേശ് മേനോന്റെ പരാതിയിലടക്കം നാല് കേസുകളിൽ മുംബൈ ബോറിവലി മജിസ്‌ട്രേറ്റ് കോടതിയാണ് കാപ്പൻ കുറ്റക്കാരനാണെന്ന് കണ്ടെത്തിയത്. എം.എൽ.എ. പരാതിക്കാരന് 1,20,00,000 രൂപ നൽകണമെന്നും ഒരു വർഷം തടവുശിക്ഷ അനുഭവിക്കണമെന്നുമായിരുന്നു കീഴ്ക്കോടതിയുടെ ഉത്തരവ്.

​നേരത്തെ വിധി പ്രസ്താവിക്കുന്ന സമയത്ത് കോടതിയിൽ ഹാജരാകാതിരുന്നതിനെ തുടർന്ന് മാണി സി. കാപ്പനെതിരെ ജാമ്യമില്ലാ വാറണ്ട് പുറപ്പെടുവിച്ചിരുന്നു. തുടർന്ന് കാപ്പൻ നേരിട്ട് കോടതിയിൽ ഹാജരായി അപേക്ഷ നൽകിയതിനെ തുടർന്നാണ് ജാമ്യമില്ലാ വാറണ്ട് റദ്ദാക്കിയത്. ഇതിന് പിന്നാലെയാണ് ശിക്ഷ മരവിപ്പിച്ചുകൊണ്ടുള്ള സെഷൻസ് കോടതി ഉത്തരവ് പുറത്തുവന്നത്.