പ്രവാസികൾക്ക് ആകാശത്ത് വെച്ച് ഓണസദ്യ ഉണ്ണാം; എയർ ഇന്ത്യ എക്സ്പ്രസിന്റെ 'ഓണസദ്യ' പദ്ധതിക്ക് തുടക്കം

തിരുവനന്തപുരം: ഈ ഓണക്കാലത്ത് വിമാനയാത്ര നടത്തുന്ന പ്രവാസികൾ ഉൾപ്പെടെയുള്ള യാത്രക്കാർക്ക് ആകാശത്ത് വെച്ച് പ്രൗഢഗംഭീരമായ ഓണസദ്യ ആസ്വദിക്കാൻ അവസരമൊരുക്കി എയർ ഇന്ത്യ എക്സ്പ്രസ്. കേരളത്തിൽ നിന്ന് വിവിധ വിദേശ രാജ്യങ്ങളിലേക്കും തിരിച്ചുമായി യാത്ര ചെയ്യുന്നവർക്കാണ് ഈ അപൂർവ വിരുന്ന് ലഭിക്കുക. ഓഗസ്റ്റ് 15 മുതൽ 31 വരെയുള്ള തീയതികളിൽ യാത്ര ചെയ്യുന്നവർക്ക് ടിക്കറ്റ് ബുക്ക് ചെയ്യുമ്പോൾ മുൻകൂട്ടി ഓണസദ്യ തിരഞ്ഞെടുക്കാവുന്നതാണ്. യാത്രയ്ക്ക് 18 മണിക്കൂർ മുൻപ് വരെ എയർ ഇന്ത്യ എക്സ്പ്രസിന്റെ വെബ്‌സൈറ്റിലൂടെയോ മൊബൈൽ ആപ്പിലൂടെയോ സദ്യ ഓർഡർ ചെയ്യാം. പദ്ധതിയുടെ ഉദ്ഘാടനം സംസ്ഥാന ടൂറിസം വകുപ്പ് മന്ത്രി നിർവഹിച്ചു.

​മട്ട അരി, നെയ്, പരിപ്പ്, തോരൻ, എരിശ്ശേരി, അവിയൽ, കൂട്ടുകറി, സാമ്പാർ, ഇഞ്ചിപ്പുളി, മാങ്ങാ അച്ചാർ, ഏത്തക്ക ഉപ്പേരി, ശർക്കര വരട്ടി, പാലട പ്രഥമൻ എന്നിവ അടങ്ങിയ വിഭവസമൃദ്ധമായ സദ്യ വാഴയിലയിലാണ് വിളമ്പുന്നത്. കസവ് കരയുടെ ഡിസൈനിലുള്ള പ്രത്യേക പാക്കറ്റുകളിലെത്തുന്ന ഈ സദ്യയ്ക്ക് 500 രൂപയാണ് നിരക്ക്. കേരളത്തിലെ നാല് വിമാനത്താവളങ്ങളിൽ നിന്നായി പ്രതിമാസം 2,850-ഓളം സർവീസുകൾ നടത്തുന്ന എയർ ഇന്ത്യ എക്സ്പ്രസിന്റെ 70 ശതമാനം സർവീസുകളും ഗൾഫ് മേഖലകളിലേക്കാണ്. കഴിഞ്ഞ വർഷവും മികച്ച വിജയം നേടിയ ഈ പദ്ധതി ഇത്തവണയും നാടണയുന്നവർക്കും തിരികെ പോകുന്ന പ്രവാസികൾക്കും വേറിട്ട അനുഭവമായി മാറും.