മനസ്സിലെ മാലിന്യങ്ങളകറ്റാൻ പ്രാർത്ഥനയ്ക്ക് കഴിയും: സ്വാമി ശുഭാംഗാനന്ദ

മനസ്സിലെ മാലിന്യങ്ങളകറ്റാൻ പ്രാർത്ഥനയ്ക്ക് കഴിയും

: സ്വാമി ശുഭാംഗാനന്ദ

മാഹി: പ്രാർത്ഥിക്കുന്ന മനസ്സിനെ ഒഴുകുന്ന നദിയോടാണ് ഉപമിക്കാറുള്ളതെന്നും, ഉള്ളിലെ മാലിന്യങ്ങളെ ഒഴുക്കിക്കളയാൻ പ്രാർത്ഥനയിലൂടെ സാധിക്കുമെന്നും ശ്രീനാരായണ ധർമ്മസംഘം ട്രസ്റ്റ് ചെയർമാൻ സ്വാമി ശുഭാംഗാനന്ദ പ്രസ്താവിച്ചു. മാഹി ഇ. വത്സരാജ് സിൽവർ ജൂബിലി ഹാളിൽ ഗുരുധർമ്മ പ്രചരണ സഭയുടെ ആഭിമുഖ്യത്തിൽ സംഘടിപ്പിച്ച ശ്രീ ശാരദാ പ്രതിഷ്ഠാ വാർഷികവും ശ്രീനാരായണ ധർമ്മമീമാംസ പരിഷത്തും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഈശ്വരചിന്ത കൊണ്ട് അർത്ഥമാക്കുന്നത് മനസ്സിനെ ശുചീകരിക്കാനും പവിത്രീകരിക്കാനുമാണ്. ദൈവത്തിനും ദേവാലയത്തിനുമപ്പുറമാണ് മനുഷ്യരെന്ന് ശ്രീനാരായണ ഗുരു ലോകത്തെ പഠിപ്പിച്ചു. ജ്ഞാനത്തിന്റെ പാതയിലേക്ക് മനുഷ്യരെ നയിക്കാനാണ് അറിവിന്റെ ദേവതയായ ശാരദാംബയെ പ്രതിഷ്ഠിച്ചത്. അറിവ് ലഭിച്ചു കഴിഞ്ഞാൽ എല്ലാ ദുരിതങ്ങൾക്കും അറുതിയാകുമെന്ന് ഗുരു വിശ്വസിച്ചിരുന്നു. ജനനീ നവരത്നമഞ്ജരി എന്ന കൃതി ശാരദാ പ്രതിഷ്ഠയിലൂടെ ലക്ഷ്യമിട്ടതെന്താണെന്ന് വ്യക്തമാക്കുന്നുണ്ട്. ഈശ്വര ചിന്തയിലധിഷ്ഠിതമായ ജീവിതത്തിലൂടെ മാത്രമേ മനുഷ്യ മനസ്സിനെ നിർമ്മലമാക്കാനാവൂ. കല്ല് മുതൽ കണ്ണാടി വരെ പ്രതിഷ്ഠിച്ചുകൊണ്ട് ശാസ്ത്രീയ വീക്ഷണത്തിലൂടെ ആത്മീയ ദർശനത്തിന്റെ ഔന്നത്യം അദ്ദേഹം നമുക്ക് കാട്ടിത്തന്നു. പ്രാപഞ്ചിക വിഷയങ്ങളിൽ നിന്ന് ഒളിച്ചോടാതെ സമൂഹത്തോടൊപ്പം സഞ്ചരിച്ച ഋഷിവര്യനാണ് മഹാഗുരുവെന്നും സ്വാമികൾ ചൂണ്ടിക്കാട്ടി.