മഹാഘോഷം, മഹാരാജാസ് വിജയോത്സവം

കൊച്ചി : 14 വർഷത്തിനു ശേഷം എം.ജി. സർവകലാശാലാ കലോത്സവജേതാക്കളായ മഹാരാജാസ് കോളേജിലെ വിദ്യാർഥികളുടെ വിജയാഘോഷം നഗരത്തിലെ ആഹ്ളാദക്കാഴ്ചയായി.

തിങ്കളാഴ്ച്‌ച എറണാകുളം മറൈൻ ഡ്രൈവിൽ നിന്നാരംഭിച്ച വിജയാഘോഷയാത്രയിൽ നൂറുകണക്കിന് വിദ്യാർഥികളാണ് അണിനിരന്നത്. നഗരം ചുറ്റിയെത്തിയ ഘോഷയാത്ര കാമ്പസിൽ സമാപിച്ച ശേഷം നടന്ന വിജയസംഗമം ഉദ്ഘാടനം ചെയ്തത് പഴയ മഹാരാജാസ് വിദ്യാർഥി കൂടിയായ ചലച്ചിത്ര സംവിധായകൻ ആഷിഖ് അബുവായിരുന്നു.

കലോത്സവത്തിൽ നേട്ടങ്ങൾ കൊയ്‌ത പ്രതിഭകളെ അദ്ദേഹം അഭിനന്ദിച്ചു. അവർക്കുള്ള സമ്മാനങ്ങളും വിതരണം ചെയ്തു. അദ്ദേഹം തൻ്റെ കാമ്പസ് ഓർമ്മകൾ പങ്കുവെച്ചു.

വിദ്യാർഥികളുടെ കലാപരമായ നേട്ടങ്ങൾക്ക് കരുത്തുപകർന്ന അധ്യാപകരുടെ സാന്നിധ്യം ശ്രദ്ധേയമായി. കോളേജ് സ്റ്റുഡന്റ്സ് ചെയർമാൻ മുഹമ്മദ് അഫ്രിദ് അധ്യക്ഷത വഹിച്ചു. പ്രിൻസിപ്പൽ ഡോ. ഷജില ബീവി, സ്റ്റാഫ് അഡ്വൈസർ വിനീഷ് കെ.എ.. ആർട്‌സ് ക്ലബ് സെക്രട്ടറി മൃദുൽ, ഗവേണിങ് ബോഡി അംഗം ഡോ. എം.എസ്. മുരളി, ഡോ. കൃഷ്ണപ്രസാദ്, കലോത്സവം സംഘാടക സമിതി കൺവീനർ ജോയൽ ബാബു, മാഗസിൻ എഡിറ്റർ തേജാലക്ഷ്മ‌ി എന്നിവർ സംസാരിച്ചു.