അങ്ങനെ അവർ സംരംഭകരായി...

സ്വയംതൊഴിൽ നൽകുന്ന വനിതകളുടെ സൊസൈറ്റി

കാഞ്ഞിരപ്പള്ളി; വീട്ടമ്മമാരെന്ന വിളിപ്പേരിൽ ഒതുങ്ങിപ്പോകാതിരിക്കാൻ തൊഴിലിന്റെ വഴിതേടിയ ഒരുകൂട്ടം വനിതകൾ, ഇന്ന് വെറും തൊഴിലാളികൾ മാത്രമല്ല സംരംഭകരും സൊസൈറ്റിയുടെ ഓഹരി ഉടമകളും കൂടിയാണ്. 55 വനിതകൾ ചേർന്ന് രൂപവത്കരിച്ച അഞ്ചലിപ്പ ലേബറേഴ്സ‌് ഇൻഡസ്ട്രിയൽ കോ-ഓപ്പറേറ്റീവ് സൊസൈറ്റിയാണ് അംഗങ്ങളുൾപ്പെടെ 60 പേർക്ക് സ്വയംതൊഴിൽ നൽകുന്നത്.

ആദ്യഘട്ടത്തിൽ സ്വകാര്യ കമ്പനിയുടെ ഗ്ലൗസുകളുടെ പായ്ക്കിങ്, ഗുണമേന്മ പരിശോധന എന്നിവയാണ് നടന്നുവരുന്നത്. അഞ്ചിലിപ്പ മഡോണ സ്‌കൂളിൻ്റെ രണ്ട് മൂന്ന് മുറികളിലായിട്ടാണ് സൊസൈറ്റിയുടെ പ്രവർത്തനം. ഇത് കൂടുതൽ പേർക്ക് തൊഴിൽ നൽകിക്കൊണ്ട് വ്യാപിപ്പിക്കാനുള്ള ശ്രമത്തിലാണ് ഈ വീട്ടമ്മമാർ.

വിവിധ സ്വകാര്യ സ്ഥാപനങ്ങളുമായി ചേർന്ന് വനിതകൾക്ക് തൊഴിൽ ഉറപ്പാക്കുകയാണ് സൊസൈറ്റി. താലൂക്കിന് കീഴിലെ വിവിധയിടങ്ങളിൽനിന്നുള്ളവർ സൊസൈറ്റിയുടെ ഭാഗമാണ്.

കഴിഞ്ഞ ഏപ്രിലിൽ കൂട്ടായ്‌മയ്ക്ക് രൂപം നൽകിയത്. പിന്നീട് തൊഴിലാളികളെ ഓഹരിയുടമകളാക്കി ഒക്ടോബറിൽ ലേബറേഴ്സ‌് ഇൻഡസ്ട്രിയൽ കോ-ഓപ്പറേറ്റീവ് സൊസൈറ്റിയായി രജിസ്റ്റർ ചെയ്ത്. ഫാ. ടോണി കുതിരമറ്റം സൊസൈറ്റിയുടെ പ്രമോട്ടറായി പ്രവർത്തിക്കുന്നു. കാഞ്ഞിരപ്പള്ളിയുടെ വികസനത്തിന് ഈ സൊസൈറ്റി പ്രത്യേക സംഭാവന നൽകുമെന്നും ഭാവിയിൽ വ്യവസായമേഖലയിൽ കൂടുതൽ കാര്യങ്ങൾ ചെയ്യാൻ ഈ സൊസൈറ്റിക്ക് കഴിയുമെന്നും സൊസൈറ്റിക്ക് നേത്യത്വം നൽകുന്ന പഞ്ചായത്തംഗം ആനിയമ്മ ജോയി പറഞ്ഞു.