'വി.ഡി. സതീശന്റെ രാഷ്ട്രീയതന്ത്രം ഉപയോഗിക്കാനുള്ള വിവേകം ഹൈക്കമാൻഡ് കാണിക്കണം': സാറാ ജോസഫ്

തിരുവനന്തപുരം: കേരളത്തിൽ കോൺഗ്രസ് സർക്കാരിന്റെ അമരക്കാരൻ ആരെന്ന് തീരുമാനിക്കാനുള്ള ചർച്ചകൾ മുറുകുന്നതിനിടെ, വി.ഡി. സതീശന് പിന്തുണയുമായി പ്രമുഖ എഴുത്തുകാരിയും സാമൂഹിക പ്രവർത്തകയുമായ സാറാ ജോസഫ്. വി.ഡി. സതീശന്റെ കഴിവും രാഷ്ട്രീയ തന്ത്രങ്ങളും പരമാവധി പ്രയോജനപ്പെടുത്താനുള്ള വിവേകമാണ് ഹൈക്കമാൻഡ് ഇപ്പോൾ കാണിക്കേണ്ടതെന്ന് അവർ ഫേസ്ബുക്കിൽ പങ്കുവെച്ച കുറിപ്പിൽ അഭിപ്രായപ്പെട്ടു. മുഖ്യമന്ത്രി സ്ഥാനത്തിന് വേണ്ടിയുള്ള ഈ വടംവലി പാർട്ടിയുടെ വിജയത്തിളക്കത്തെ നശിപ്പിക്കുകയാണെന്നും അവർ മുന്നറിയിപ്പ് നൽകി.

​ദേശീയ രാഷ്ട്രീയത്തിൽ കോൺഗ്രസ് നിലനിൽക്കേണ്ടതിന്റെ ആവശ്യം പാർട്ടിയേക്കാൾ കൂടുതൽ ജനങ്ങളാണ് ഇപ്പോൾ തിരിച്ചറിയുന്നതെന്ന് സാറാ ജോസഫ് ചൂണ്ടിക്കാട്ടി. ഇന്ത്യാ സഖ്യമെന്ന രാഷ്ട്രീയ നീക്കത്തെ ബലപ്പെടുത്താനാണ് കേരളത്തിലെ വോട്ടർമാർ കോൺഗ്രസിന് വൻ ഭൂരിപക്ഷം നൽകിയത്. കൃത്യമായ ജനാധിപത്യ നിലപാടുള്ള കരുത്തനായ ഒരു ഭരണാധികാരിക്ക് മാത്രമേ വിശാലമായ ഐക്യം രൂപപ്പെടുത്താൻ കഴിയൂ. അതാരായിരിക്കണം എന്ന കാര്യത്തിൽ കേരളത്തിലെ വോട്ടർമാർ ഒരു പരീക്ഷണം നടത്തിക്കഴിഞ്ഞു എന്നും അവർ കുറിച്ചു.

​ഇടതുപക്ഷത്തിന്റെ പരാജയം ഒരിക്കലും ശാശ്വതമല്ലെന്നും അവർ കരുത്തരായ പ്രതിപക്ഷമായിരിക്കുമെന്നും സാറ ജോസഫ് ഓർമ്മിപ്പിച്ചു. ആരോഗ്യകരമായ രാഷ്ട്രീയ മത്സരം നടക്കുമ്പോഴും സംഘപരിവാർ രാഷ്ട്രീയത്തെ ചെറുക്കാൻ ആവശ്യമായ ഐക്യമാണ് ഉണ്ടാകേണ്ടത്. ജനമനസ്സറിയാനുള്ള കഴിവും ദീർഘവീക്ഷണവും ഹൈക്കമാൻഡ് കാണിക്കണമെന്നും, മുഖ്യമന്ത്രി പദത്തിന് വേണ്ടിയുള്ള ലജ്ജാകരമായ തർക്കങ്ങൾ അവസാനിപ്പിക്കണമെന്നും അവർ തന്റെ കുറിപ്പിലൂടെ ആവശ്യപ്പെട്ടു.