മാലിന്യം കുന്നുകൂടി, തെരുവ് നായകളുടെ വിഹാര കേന്ദ്രമായി ന്യൂമാഹിയിലെ ബോട്ടിൽ ബൂത്ത്; അധികൃതർക്ക് പരാതി നൽകിയിട്ടും നടപടിയില്ല

മാലിന്യ കൂമ്പാരം കാരണം ഈ പ്രദേശം തെരുവ് നായകളുടെ പ്രധാന വിഹാര കേന്ദ്രമായി മാറിയിരിക്കുകയാണ്. വീഡിയോ ദൃശ്യങ്ങളിൽ പോലും നായ്ക്കളുടെ ശല്യം വ്യക്തമായി കാണാം. മാലിന്യം റോഡിലേക്ക് വ്യാപിച്ചുകിടക്കുന്നത് കാരണം വാഹന ഗതാഗതത്തിനും കാൽനട യാത്രക്കാർക്കും ഒരുപോലെ ബുദ്ധിമുട്ടുണ്ടാക്കുന്നു. പ്രദേശത്ത് രൂക്ഷമായ ദുർഗന്ധവും ആരോഗ്യപ്രശ്നങ്ങളും സൃഷ്ടിക്കുന്നുണ്ട്.

പരിസരവാസികൾ പറയുന്നത്, ഈ ബോട്ടിൽ ബൂത്തിൻ്റെ ദുരവസ്ഥ ശ്രദ്ധയിൽപ്പെടുത്തിക്കൊണ്ട് മുമ്പും പല തവണ പഞ്ചായത്ത് അധികൃതരെയും വാർഡ് മെമ്പർമാരെയും സമീപിച്ചിരുന്നു. എന്നാൽ ഇന്നുവരെ ഒരു അടിയന്തര നടപടിയും അധികൃതരുടെ ഭാഗത്തുനിന്നും ഉണ്ടായിട്ടില്ല.

പൊതുജനാരോഗ്യത്തിന് ഭീഷണിയുയർത്തുന്ന ഈ വിഷയത്തിൽ ന്യൂമാഹി പഞ്ചായത്ത് അധികൃതർ അടിയന്തരമായി ഇടപെടണമെന്നും ബോട്ടിൽ ബൂത്തും പരിസരവും എത്രയും പെട്ടെന്ന് വൃത്തിയാക്കി പരിഹാരം കാണണമെന്നുമാണ് നാട്ടുകാരുടെ ശക്തമായ ആവശ്യം.

:ബഷീർ ഏരത്ത്