സാഹിത്യപ്രവർത്തനംകൊണ്ടുമാത്രം മാറ്റം കൊണ്ടുവരാൻ ആകില്ല-എം.കെ. സാനു

കൊച്ചി: സാഹിത്യപ്രവർത്തനം കൊണ്ടുമാത്രം സാമൂഹിക മാറ്റം സാധ്യമല്ലെന്ന് പ്രൊഫ. എം.കെ. സാനു പറഞ്ഞു. തുടർച്ചയിൽ സംഘടിത പ്രവർത്തനംകൂടി വേണം. റഷ്യയിൽ സാഹിത്യപ്രവർത്തനത്തിൻ്റെ തുടർച്ചയിൽ ലെനിന്റെ നേതൃത്വത്തിൽ സംഘടിത പ്രവർത്തനം നടത്തിയതിനാലാണ് സാമൂഹികമാറ്റം സാധ്യമായതെന്ന് എളമക്കരയിൽ യുവകലാതരംഗ് സാഹിത്യോത്സവം ഉദ്ഘാടനം ചെയ്‌തുകൊണ്ട് എം കെ സാനു പറഞ്ഞു. ചടങ്ങിൽ കണയന്നൂർ താലൂക്ക് ലൈബ്രറി സെക്രട്ടറിഡി.ആർ. രാജേഷ് അധ്യക്ഷനായി. സാഹിത്യകാരൻ

വി. ഷിനിലാൽ, കലാമണ്ഡലം പ്രഭാകരൻ, യുവകലാതരംഗ് ഭാരവാഹികളായ സി.ടി. മനു, അഡ്വ. ഡി.ജി. വിപിൻ, ടി.ബി. നിഷ എന്നിവർ സംസാരിച്ചു.തുടർന്ന് സാഹിത്യകാരൻ വി. ഷിനിലാലുമായി സർഗസംവാദം നടന്നു. ഷാജി ജോർജ് പ്രണത മോഡറേറ്ററായി. 'പാട്ടിലെ കവിതയും കവിതയിലെ പാട്ടും' എന്ന വിഷയത്തിൽ ഗാനരചയിതാവ് വയലാർ ശരച്ചന്ദ്രൻ, സംഗീതസംവിധായകൻ ബിജിബാൽ എന്നിവർ സംസാരിച്ചു. സംഗീതസംവിധായകൻ കെ.എം. ഉദയൻ മോഡറേറ്ററായി. തുടർന്ന് തബലയിൽ ഫ്യൂഷനും കൊച്ചി 'നാട്ടറിവ് പഠന കേന്ദ്രത്തിന്റെ നാടൻപാട്ടും നടന്നു.