ഇടിമിന്നലേറ്റ് വില്ലേജ് ഓഫീസ് ജീവനക്കാരിക്ക് ദാരുണാന്ത്യം; ഭർത്താവുൾപ്പെടെ രണ്ട് പേർക്ക് പരിക്ക്

കണ്ണൂർ: ആലക്കോട് കാപ്പിമലയിലുണ്ടായ ശക്തമായ ഇടിമിന്നലിൽ പുളിങ്ങോം വില്ലേജ് ഓഫീസ് ജീവനക്കാരി ദാരുണമായി മരണപ്പെട്ടു. ചെറുപുഴ സ്വദേശിനിയായ അഞ്ജു മാത്യു (31) ആണ് മരിച്ചത്. കാപ്പിമല മഞ്ഞപ്പുല്ല് ഭാഗത്ത് വെച്ചായിരുന്നു അപകടം സംഭവിച്ചത്. അപകടത്തിൽ അഞ്ജുവിന്റെ ഭർത്താവുൾപ്പെടെ രണ്ട് പേർക്ക് പരിക്കേൽക്കുകയും ചെയ്തു.

​അഞ്ജുവിന്റെ ഭർത്താവ് സോനു സെബാസ്റ്റ്യൻ, ഫോറസ്റ്റ് വാച്ചറായ സനീഷ് എന്നിവർക്കാണ് ഇടിമിന്നലിൽ പരിക്കേറ്റത്. ഇവരുടെ പരിക്ക് ഗുരുതരമല്ലെന്നാണ് പ്രാഥമിക വിവരം. അപകടം നടന്നയുടൻ തന്നെ പരിക്കേറ്റ ഇരുവരെയും കരുവഞ്ചാലിലെ സ്വകാര്യ ആശുപത്രിയിൽ പ്രവേശിപ്പിച്ചു. നിലവിൽ ഇവർ അവിടെ ചികിത്സയിലാണ്.