ഡോക്ടർ സ്വപ്നം പാതിവഴിയിൽ; പീഡനാരോപണത്തിൽ രണ്ട് അധ്യാപകർക്ക് സസ്പെൻഷൻ, കണ്ണീരോടെ വിടചൊല്ലി നെടുമങ്ങാട്

കണ്ണൂർ അഞ്ചരക്കണ്ടി മെഡിക്കൽ കോളേജിൽ ആത്മഹത്യ ചെയ്ത ഒന്നാം വർഷ ബിഡിഎസ് വിദ്യാർത്ഥി നിതിൻ രാജിന്റെ മൃതദേഹം നെടുമങ്ങാട്ടെ വീട്ടിലെത്തിച്ചു. പഠനം പൂർത്തിയാക്കി ഡോക്ടറായി മടങ്ങിവരുമെന്ന് പ്രതീക്ഷിച്ചിരുന്ന മകന്റെ ചേതനയറ്റ ശരീരം കണ്ടു മാതാപിതാക്കൾ തളർന്നുവീണത് നാടിനെയാകെ കണ്ണീരിലാഴ്ത്തി.

​വകുപ്പ് മേധാവിയുടെ ഭാഗത്തുനിന്നുണ്ടായ കടുത്ത മാനസിക പീഡനമാണ് നിതിന്റെ മരണത്തിന് കാരണമായതെന്ന് കുടുംബം ആരോപിക്കുന്നു. ജാതിയുടെയും നിറത്തിന്റെയും പേരിൽ അധിക്ഷേപിച്ചിരുന്നതായും 'പുഴുത്ത പട്ടി' എന്ന് വിളിച്ചിരുന്നതായും നിതിന്റെ മാതാപിതാക്കൾ വെളിപ്പെടുത്തി. സീനിയർ വിദ്യാർത്ഥികളിൽ നിന്ന് റാഗിങ് നേരിട്ടിരുന്നതായും ആക്ഷേപമുണ്ട്.

​സംഭവത്തിൽ അന്വേഷണ വിധേയമായി അനാട്ടമി വിഭാഗം മേധാവി ഡോ. എം.കെ. റാം, അസോസിയേറ്റ് പ്രൊഫസർ ഡോ. സംഗീത എന്നിവരെ കോളേജ് മാനേജ്‌മെന്റ് സസ്പെൻഡ് ചെയ്തിട്ടുണ്ട്. കോളേജിന്റെ ആഭ്യന്തര സമിതിയും പോലീസും കേസിൽ വിശദമായ അന്വേഷണം നടത്തിവരികയാണ്.