വീട്ടുമുറ്റത്ത് ചിതയൊരുങ്ങി, ചേച്ചിക്കൊപ്പം അനിയത്തിക്കും

കൊട്ടിയം: മൂന്നുസെൻ്റിലെ കൂരയോടു ചേർന്ന് ചേച്ചിക്കൊപ്പം അനിയത്തിക്കും ചിതയൊരുങ്ങി. മഞ്ഞപ്പിത്തം ബാധിച്ച് വെള്ളിയാഴ്‌ച മരിച്ച മീനാക്ഷിക്ക് ചിതയൊരുക്കിയത് വീടിനോടു തൊട്ടുചേർന്ന മുറ്റത്തായിരുന്നു. ശനിയാഴ്ച്‌ച വൈകീട്ടായിരുന്നു സംസ്കാരം.

ഞായറാഴ്ച‌ വൈകീട്ട് ഇതിനോടു ചേർന്നാണ് സഹോദരി നീതുവിനും ചിതയൊരുക്കിയത്. തിരുവനന്തപുരം മെഡിക്കൽ കോളേജിലെ നടപടി പൂർത്തിയാക്കിയശേഷം സന്ധ്യയോടെയാണ് മൃതദേഹം വീട്ടിലെത്തിച്ച് സംസ്കരിച്ചത്. പി.സി. വിഷ്‌ണുനാഥ് എംഎൽഎ, തൃക്കോവിൽവട്ടം പഞ്ചായത്ത് പ്രസിഡന്റ് ജി.എസ്. സിന്ധു. വൈസ് പ്രസിഡൻറ് സതീഷ്കുമാർ, ബ്ലോക്ക് പഞ്ചായത്ത് അംഗം ഫൈസൽ കുളപ്പാടം, പഞ്ചായത്ത് അംഗം സുനിത എന്നിവർ സംബന്ധിച്ചു.