എഫ്ഐആർ രജിസ്റ്റർ ചെയ്യാൻ എപ്പോഴും പ്രാഥമിക അന്വേഷണം വേണ്ടാ -സുപ്രീംകോടതി

ന്യൂഡൽഹി: എഫ്ഐആർ രജിസ്റ്റർ ചെയ്യുംമുൻപ് പ്രാഥമിക അന്വേഷണം നടത്തിയിരിക്കണമെന്നത് എല്ലായ്പ്പോഴും നിർബന്ധമല്ലെന്ന് സുപ്രീംകോടതി, 2014-ലെ ലളിതാ കുമാരി കേസിലാണ് എഫ്‌ഐആറുകൾ രജിസ്റ്റർചെയ്യുന്നത് സംബന്ധിച്ച നിർദേശം സുപ്രീംകോടതി ഇറക്കിയത്. പ്രഥമദൃഷ്ട്യാ കേസെടുക്കാവുന്ന സംഭവങ്ങളിൽ പ്രാഥമിക അന്വേഷണത്തിന്റെ ആവശ്യമില്ലെന്ന് ജസ്റ്റിസ് വിക്രംനാഥ് അധ്യക്ഷനായ ബെഞ്ച് വ്യക്തമാക്കി.

ലഭിച്ചവിവരം പ്രഥമദൃഷ്‌ട്യാ പോലീസിന് കേസെടുക്കാവുന്ന സംഭവമാണെന്ന് ബോധ്യപ്പെടുന്നില്ലെങ്കിൽ മാത്രമേ പ്രാഥമിക അന്വേഷണത്തിന്റെ ആവശ്യമുള്ളൂവെന്ന് കോടതി പറഞ്ഞു. ഗുജറാത്തിലെ ഭുജിലും കച്ചിലും നിയമവിരുദ്ധമായി ഭൂമി പതിച്ചുനൽകിയതുമായി ബന്ധപ്പെട്ട കേസ് പരിഗണിക്കവേയാണ് സുപ്രീംകോടതി ഇക്കാര്യം വ്യക്തമാക്കിയത്. സംഭവത്തിൽ ഗുജറാത്തിലെ മുൻ ഐഎഎസ് ഉദ്യോഗസ്ഥൻ പ്രദീപ് നിരങ്കർന്നാഥ് ശർമയുടെ ജാമ്യാപേക്ഷ തള്ളിയാണ് നിരീക്ഷണം.