ഭ്രമണപഥം ഉയർത്താനായില്ല; ​ISRO-യുടെ നാവി​ഗേഷൻ ഉപ​ഗ്രഹം പ്രതിസന്ധിയിൽ

ബെംഗളൂരു: ഇന്ത്യൻ ബഹിരാകാശ ഗവേഷണ സംഘടനയുടെ (ഐ.എസ്.ആർ.ഒ.) നാവി​ഗേഷൻ ഉപ​ഗ്രഹം പ്രതിസന്ധിയിൽ. ശ്രീഹരിക്കോട്ട സതീഷ് ധവാൻ സ്പെയ്‌സ് സെന്ററിലെ നൂറാം വിക്ഷേപണത്തിലൂടെ അയച്ച എൻ.വി.എസ്. 02 ഉപഗ്രഹത്തിനാണ് പ്രതിസന്ധി. സാങ്കേതിക തകരാർ മൂലം വിക്ഷേപണശേഷം ഉപ​ഗ്രഹത്തിന്റെ ഭ്രമണപഥം ഉയർ‌ത്താനായില്ല. പ്രതിസന്ധി മറികടക്കാനുള്ള ശ്രമത്തിലാണ് നിലവിൽ ശാസ്ത്രജ്ഞർ.

ഗതി, ദിശ നിർണയ ആവശ്യങ്ങൾക്കായി ഇന്ത്യ വികസിപ്പിക്കുന്ന നാവിക് (നാവിഗേഷൻ വിത്ത് ഇന്ത്യൻ കോസ്റ്റലേഷൻ) സംവിധാനത്തിലേക്കുള്ള രണ്ടാമത്തെ ഉപഗ്രഹമാണ് എൻ.വി.എസ്-02. ഈ ശ്രേണിയിലെ ആദ്യ ഉപഗ്രഹം 2023 മേയ് 29-ന് വിക്ഷേപിച്ചിരുന്നു. ഗതി, ദിശ നിർണയ ആവശ്യങ്ങൾക്ക് അമേരിക്കയുടെ ജി.പി.എസിനെ ആശ്രയിക്കുന്നതിന് പകരം സ്വയംപര്യാപ്തത കൈവരിക്കാനാണ് നാവികിലൂടെ ലക്ഷ്യമിട്ടിരുന്നത്.