ക്യാൻസർ മരുന്നുകൾക്ക് വിലക്കുറവ്: 1,364 മരുന്നുകളുടെ വില പുതുക്കി; രോഗികൾക്ക് പ്രതിവർഷം 3,540 കോടി രൂപയുടെ ലാഭം

ന്യൂഡൽഹി: ക്യാൻസർ ചികിത്സയ്ക്കുള്ള മരുന്നുകളുടെ വിലയിൽ പ്രഖ്യാപിച്ച വൻ വിലക്കുറവ് പ്രാബല്യത്തിൽ വന്നു. വ്യാപാരികൾക്ക് ഈടാക്കാവുന്ന ലാഭവിഹിതത്തിന് (Trade Margin) കേന്ദ്ര സർക്കാർ നിയന്ത്രണം ഏർപ്പെടുത്തിയതിനെ തുടർന്ന് 1,364 ക്യാൻസർ മരുന്ന് ഫോർമുലേഷനുകളുടെ പുതുക്കിയ വില നിലവിൽ വന്നു. ഇതിലൂടെ ക്യാൻസർ രോഗികൾക്ക് പ്രതിവർഷം 3,540.38 കോടി രൂപയുടെ ലാഭമുണ്ടാകുമെന്നാണ് കണക്കാക്കുന്നത്.

​137 ക്യാൻസർ മരുന്നുകൾക്കാണ് ദേശീയ ഔഷധ വിലനിർണയ അതോറിറ്റി (NPPA) ലാഭവിഹിത പരിധി (ട്രേഡ് മാർജിൻ) 30 ശതമാനമായി നിശ്ചയിച്ചത്. ഇതിന്റെ ഭാഗമായി വിവിധ പ്രമുഖ കമ്പനികളുടെ ബ്രാൻഡഡ് മരുന്നുകളുടെ വില ഗണ്യമായി കുറഞ്ഞു. ചില മരുന്നുകൾക്ക് 50 ശതമാനത്തിലേറെ വിലക്കുറവുണ്ടായിട്ടുണ്ട്. റിപ്പോർട്ട് ചെയ്തവയിൽ ഏറ്റവും ഉയർന്ന വിലക്കുറവ് 96.45 ശതമാനമാണ്.

​ആരോഗ്യ കുടുംബക്ഷേമ മന്ത്രാലയത്തിന് കീഴിലുള്ള ഡയറക്ടറേറ്റ് ജനറൽ ഓഫ് ഹെൽത്ത് സർവീസസ് (DGHS) രൂപീകരിച്ച വിദഗ്ധ സമിതി നൽകിയ ശുപാർശകളുടെ അടിസ്ഥാനത്തിലാണ് ഈ നടപടി. ഫാർമസ്യൂട്ടിക്കൽസ് വകുപ്പിന് കീഴിൽ പ്രവർത്തിക്കുന്ന എന്പിപിഎയാണ് വില നിയന്ത്രണം നടപ്പാക്കിയത്. ക്യാൻസർ ചികിത്സയുടെ ഭാരിച്ച സാമ്പത്തിക ബാധ്യത കുറയ്ക്കുകയാണ് സർക്കാരിന്റെ പ്രധാന ലക്ഷ്യം. 85 ഔഷധ നിർമാണ കമ്പനികൾ 121 മരുന്നുകളുടെ പുതുക്കിയ പരമാവധി ചില്ലറ വിൽപ്പന വില (MRP) നൽകിയിട്ടുണ്ട്.

​ഏതൊക്കെ മരുന്നുകൾക്കാണ് വില കുറഞ്ഞത്?

ഇമ്മ്യൂണോതെറാപ്പി മരുന്നുകൾ ഉൾപ്പെടെ ഇരുപതിലധികം തരം ക്യാൻസറുകളുടെ ചികിത്സയ്ക്ക് ഉപയോഗിക്കുന്ന മരുന്നുകൾ വിലനിയന്ത്രണത്തിന്റെ പരിധിയിൽ വരും. ഡെനോസുമാബ്, പെഗ്ഫിൽഗ്രാസ്റ്റിം, ബെവാസിസുമാബ്, പെംബ്രോളിസുമാബ്, ദുർവാലുമാബ്, ഒസിമെർട്ടിനിബ് തുടങ്ങിയ വ്യാപകമായി ഉപയോഗിക്കുന്ന പ്രമുഖ ക്യാൻസർ മരുന്നുകൾക്ക് ഈ വിലക്കുറവ് ബാധകമാണ്.

​പുതുക്കിയ വില എങ്ങനെ അറിയാം?

പുതുക്കിയ വില നിലവിൽ വന്നതോടെ മെഡിക്കൽ ഷോപ്പുകൾക്കും ആശുപത്രി ഫാർമസികൾക്കും നിശ്ചയിച്ച എം.ആർ.പിക്ക് മുകളിലുള്ള തുകയ്ക്ക് മരുന്നുകൾ വിൽക്കാനാകില്ല. മരുന്നുകളുടെ പാക്കറ്റിൽ രേഖപ്പെടുത്തിയിട്ടുള്ള പുതുക്കിയ പരമാവധി ചില്ലറ വിൽപ്പന വില പരിശോധിച്ചും, എൻപിപിഎയുടെ 'ഫാർമ സഹി ദാം' (Pharma Sahi Daam) മൊബൈൽ ആപ്പ് വഴിയും ഉപഭോക്താക്കൾക്ക് പുതുക്കിയ വില ഉറപ്പാക്കാം. അധിക തുക ഈടാക്കിയാൽ 'ഫാർമ ജൻ സമാധാൻ' പോർട്ടൽ വഴിയോ 1800-111-255 എന്ന ഹെൽപ്പ് ലൈൻ നമ്പറിലോ പരാതിപ്പെടാം.