കേന്ദ്ര ജീവനക്കാരുടെയും പെൻഷൻകാരുടെയും ഡി.എ. 3 ശതമാനം കൂട്ടി; ദീപാവലി സമ്മാനമെന്ന് കേന്ദ്രസർക്കാർ

ന്യൂഡൽഹി : കേന്ദ്ര സർക്കാർ ജീവനക്കാരുടെയും പെൻഷൻകാരുടെയും ക്ഷാമബത്ത (ഡി.എ.) മൂന്ന് ശതമാനം വർധിപ്പിച്ചതായി കേന്ദ്രമന്ത്രി അശ്വിനി വൈഷ്ണവ് അറിയിച്ചു. ദീപാവലി സമ്മാനമായാണ് സർക്കാർ ഈ പ്രഖ്യാപനം നടത്തിയിരിക്കുന്നത്. കേന്ദ്ര മന്ത്രിസഭയുടെ അംഗീകാരത്തോടെയാണ് തീരുമാനം നടപ്പിലാകുന്നത്. ഇതോടെ അടിസ്ഥാന ശമ്പളത്തിന്റെ 60 ശതമാനമായിരുന്ന ക്ഷാമബത്ത 63 ശതമാനമായി ഉയരും.

​ഈ വർഷം ജൂലൈ ഒന്നു മുതൽ മുൻകാല പ്രാബല്യത്തോടെയാണ് വർധന നടപ്പിലാക്കുന്നത്. ദീപാവലിക്ക് ഒരാഴ്ചയിലധികം മുൻപ് പ്രഖ്യാപിച്ച ഈ ആനുകൂല്യത്തിന്റെ പ്രയോജനം ഏകദേശം 48 ലക്ഷം കേന്ദ്ര സർക്കാർ ജീവനക്കാർക്കും 68 ലക്ഷം പെൻഷൻകാർക്കും ലഭിക്കും. ഏഴാം ശമ്പള കമ്മീഷന്റെ ശുപാർശകളുടെ അടിസ്ഥാനത്തിലുള്ള ഫോർമുല അനുസരിച്ചാണ് ഈ വർധന വരുത്തിയിരിക്കുന്നത്.

​ജീവനക്കാരുടെയും പെൻഷൻകാരുടെയും ജീവിതച്ചെലവിലുണ്ടാകുന്ന വർധന നേരിടാനും പണപ്പെരുപ്പം മൂലം സ്ഥിരവരുമാനത്തിന്റെ വാങ്ങൽശേഷി കുറയുന്നത് പരിഹരിക്കാനുമാണ് ക്ഷാമബത്ത നൽകുന്നത്. ലേബർ ബ്യൂറോ പ്രതിമാസം പുറത്തുവിടുന്ന വ്യാവസായിക തൊഴിലാളികളുടെ ഉപഭോക്തൃ വില സൂചിക (CPI-IW) അടിസ്ഥാനമാക്കിയാണ് വർഷത്തിൽ രണ്ടുതവണ (ജനുവരി, ജൂലൈ മാസങ്ങളിൽ) ക്ഷാമബത്ത പരിഷ്കരിക്കുന്നത്.

​കഴിഞ്ഞ വർഷങ്ങളിലെ കണക്കുകൾ പരിശോധിച്ചാൽ, 2023 ജൂലൈയിൽ 46 ശതമാനമായിരുന്ന ക്ഷാമബത്ത പടിപടിയായി ഉയർന്ന് 2026 ജനുവരിയിൽ 60 ശതമാനത്തിലെത്തിയിരുന്നു. നിലവിലെ വർധന കൂടി ചേരുമ്പോഴാണ് ഇത് 63 ശതമാനമായി ഉയരുന്നത്. ജൂലൈ ഒന്നു മുതൽ പ്രാബല്യവരുന്നതിനാൽ ജീവനക്കാർക്കും പെൻഷൻകാർക്കും ഈ മാസത്തെ ശമ്പളത്തോടൊപ്പം ജൂലൈ മുതലുള്ള കുടിശ്ശികയും (അരിയർ) ചേർത്ത് ലഭിക്കും.