ചൈനയ്ക്കുവേണ്ടി ചാരപ്രവർത്തനം നടത്തിയെന്ന് സംശയം; മേജറുടെ ഭാര്യയെ ചോദ്യം ചെയ്ത് ഇന്റലിജൻസ്

​ജമ്മു കശ്മീർ: ചൈനീസ് രഹസ്യാന്വേഷണ സംഘങ്ങളുമായി ബന്ധമുണ്ടെന്ന സംശയത്തെ തുടർന്ന് മുതിർന്ന സൈനിക ഉദ്യോഗസ്ഥന്റെ ഭാര്യയെ സെൻട്രൽ ഇന്റലിജൻസ് ബ്യൂറോ (സി.ഐ.ബി.) ഉദ്യോഗസ്ഥർ ചോദ്യം ചെയ്തു. തെലങ്കാന സ്വദേശിനിയായ യുവതിയാണ് അന്വേഷണ സംഘത്തിന്റെ പിടിയിലായത്. മേജർ റാങ്കിലുള്ള സൈനിക ഉദ്യോഗസ്ഥന്റെ ഭാര്യയായ ഇവർ, സൈനിക സുരക്ഷാ സംവിധാനങ്ങളുമായി ബന്ധപ്പെട്ട വിഷയങ്ങളിലാണ് ഗവേഷണം നടത്തിവന്നിരുന്നത്. പത്താൻകോട്ടിലേക്ക് ട്രെയിനിൽ യാത്ര ചെയ്യാനായി റെയിൽവേ സ്റ്റേഷനിലെത്തിയപ്പോഴാണ് ഇവർ കസ്റ്റഡിയിലായത്.

​ചൈനീസ് രഹസ്യാന്വേഷണ ഏജന്റുമാർ ഗവേഷകരെന്ന വ്യാജേനയാണ് യുവതിയുമായി ബന്ധം സ്ഥാപിച്ചതെന്നാണ് അന്വേഷണ ഏജൻസികളുടെ പ്രാഥമിക കണ്ടെത്തൽ. തുടക്കത്തിൽ പരിസ്ഥിതി, ഭൗമരാഷ്ട്രീയം തുടങ്ങിയ വിഷയങ്ങളിൽ ലേഖനങ്ങളും ഗവേഷണ കുറിപ്പുകളും തയ്യാറാക്കാൻ ആവശ്യപ്പെട്ട സംഘം, പിന്നീട് സൈനിക പ്രതിരോധവുമായി ബന്ധപ്പെട്ട വിഷയങ്ങളിലേക്ക് ശ്രദ്ധ തിരിക്കുകയായിരുന്നു. സൈനിക സുരക്ഷാ സംവിധാനങ്ങളെക്കുറിച്ചുള്ള നിർണായക വിവരങ്ങൾ ശേഖരിക്കാനായിരുന്നോ ഈ നീക്കമെന്നാണ് അന്വേഷണ സംഘം പ്രധാനമായും പരിശോധിക്കുന്നത്. യുവതിക്ക് വിദേശ രഹസ്യാന്വേഷണ പ്രവർത്തകരുമായി എങ്ങനെയൊക്കെ ബന്ധമുണ്ടായി എന്നും, എന്തെല്ലാം വിവരങ്ങളാണ് ഇവർ പങ്കുവെച്ചത് എന്നതിനെക്കുറിച്ചും വിശദമായ അന്വേഷണം നടക്കുകയാണ്.

​എങ്കിലും, യുവതി സൈനിക സുരക്ഷയെ ബാധിക്കുന്ന രേഖകളോ ചിത്രങ്ങളോ മറ്റ് ഇലക്ട്രോണിക് വിവരങ്ങളോ ശേഖരിച്ച് വിദേശ ഏജന്റുമാർക്ക് കൈമാറിയിട്ടുണ്ടോ എന്ന കാര്യത്തിൽ ഇതുവരെ ഔദ്യോഗിക വ്യക്തത വന്നിട്ടില്ല. ഈ പ്രവർത്തനങ്ങളിൽ യുവതി അറിഞ്ഞുകൊണ്ടാണോ പങ്കെടുത്തത് എന്നതടക്കമുള്ള നിർണായക വിവരങ്ങൾ പുറത്തുവരാൻ കൂടുതൽ അന്വേഷണം ആവശ്യമാണെന്ന് അധികൃതർ വ്യക്തമാക്കി. സംഭവവുമായി ബന്ധപ്പെട്ട് കൂടുതൽ വിവരങ്ങൾ ഔദ്യോഗികമായി പുറത്തുവിട്ടിട്ടില്ല.