വനിതാ മാധ്യമപ്രവർത്തകർക്കെതിരായ പോലീസ് അതിക്രമം: പാർലമെന്റ് സ്ട്രീറ്റിൽ പ്രതിഷേധം ഇരമ്പി

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിഷേധം റിപ്പോർട്ട് ചെയ്യുന്നതിനിടെ വനിതാ മാധ്യമപ്രവർത്തകർക്ക് നേരെ പോലീസ് ലൈംഗികാതിക്രമം നടത്തിയെന്ന പരാതിയിൽ പാർലമെന്റ് സ്ട്രീറ്റിൽ വൻ പ്രതിഷേധം. ഡൽഹി ജന്തർ മന്തറിന് സമീപം നടന്ന സമരത്തിനിടെ മൂന്ന് വനിതാ മാധ്യമപ്രവർത്തകർക്കാണ് പോലീസ് ഉദ്യോഗസ്ഥരിൽ നിന്ന് ദുരനുഭവം നേരിടേണ്ടി വന്നത്. സംഭവത്തിൽ കേസ് രജിസ്റ്റർ ചെയ്യാൻ പോലീസ് മടിക്കുന്നതായി ആരോപണമുണ്ട്. അതേസമയം, പരാതി ക്രൈംബ്രാഞ്ചിന് കൈമാറിയെന്നാണ് ഡൽഹി പോലീസിന്റെ ഔദ്യോഗിക വിശദീകരണം.

​എസ്.ഐ.ആർ. നടപടിയുമായി ബന്ധപ്പെട്ട് മുഖ്യ തിരഞ്ഞെടുപ്പ് കമ്മീഷണർ രാജിവയ്ക്കണമെന്ന് ആവശ്യപ്പെട്ട് നടന്ന പ്രതിഷേധം കവർ ചെയ്യുന്നതിനിടെയായിരുന്നു അക്രമം. സംഭവത്തിൽ പ്രതിഷേധിച്ച് പാർലമെന്റ് സ്ട്രീറ്റിൽ നടന്ന സമരത്തിൽ സി.ജെ.പി. വക്താവ് സൗരവ് ദാസ്, എസ്.എഫ്.ഐ. നേതാവ് ഐഷി ഘോഷ്, സി.പി.ഐ.എം. നേതാവ് ബൃന്ദ കാരാട്ട് തുടങ്ങിയവർ പങ്കെടുത്തു. പോലീസ് നിലവിൽ പ്രതിഷേധക്കാരുമായി ചർച്ച നടത്തിവരികയാണ്.

​വനിതാ മാധ്യമപ്രവർത്തകർക്ക് നേരെയുണ്ടായ അതിക്രമം മാധ്യമസ്വാതന്ത്ര്യത്തിന് മേലുള്ള കടന്നുകയറ്റമാണെന്നും ഞെട്ടലുണ്ടാക്കുന്നതാണെന്നും പ്രസ് കൗൺസിൽ ഓഫ് ഇന്ത്യ (പി.സി.ഐ) പ്രതികരിച്ചു. കുറ്റക്കാർക്കെതിരെ അടിയന്തരമായി കേസെടുത്ത് അന്വേഷണം നടത്തണമെന്നും പി.സി.ഐ ആവശ്യപ്പെട്ടു. ഡൽഹി പോലീസ് കേന്ദ്ര ആഭ്യന്തര മന്ത്രാലയത്തിന് കീഴിലാണെന്ന് ചൂണ്ടിക്കാട്ടിയ ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, വിഷയത്തിൽ കേന്ദ്ര ആഭ്യന്തരമന്ത്രി അമിത് ഷാ മറുപടി പറയണമെന്ന് ആവശ്യപ്പെട്ടു. നൂറുകണക്കിന് വനിതാ പ്രവർത്തകരെയും പോലീസ് ക്രൂരമായ അതിക്രമത്തിന് ഇരയാക്കിയതായി രാഹുൽ ഗാന്ധി ആരോപിച്ചു.