ജയിലുകൾ നിറയ്ക്കും, സിജെപി സമരം വ്യാപിപ്പിക്കും: മുംബൈയ്ക്ക് പിന്നാലെ ജന്തർ മന്തറിലേക്കെന്ന് അഭിജീത് ദീപ്‌കെ

ന്യൂഡൽഹി: ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള സിജെപിയുടെ പ്രക്ഷോഭം രണ്ടാം ഘട്ടത്തിലേക്ക് കടക്കുകയാണെന്നും, രാജ്യവ്യാപക പ്രതിഷേധത്തിന്റെ ഭാഗമായി മുംബൈക്ക് ശേഷം ഇനി ഡൽഹി ജന്തർ മന്തറിലേക്ക് സമരം വ്യാപിപ്പിക്കുമെന്നും അഭിജീത് ദീപ്‌കെ അറിയിച്ചു. ഒക്‌ടോബർ 10-ന് ജന്തർ മന്തറിൽ സമാധാനപരമായി പ്രതിഷേധം നടത്തുമ്പോൾ ഡൽഹി പൊലീസ് എവിടെ തടഞ്ഞാലും അവിടം ജന്തർ മന്തറായി മാറുമെന്ന് അദ്ദേഹം മുന്നറിയിപ്പ് നൽകി. ബെംഗളൂരു, ഗോവ, കൊൽക്കത്ത, പട്‌ന, റാഞ്ചി എന്നിവിടങ്ങളിലൂടെ സമരം വ്യാപിപ്പിച്ച് ഈ മാസം അവസാനത്തോടെ ഡൽഹിയിൽ സമാപിക്കും. മുംബൈ ശിവാജി പാർക്കിൽ നടന്ന പ്രതിഷേധ സംഗമത്തിൽ സിജെപി സ്ഥാപകൻ അഭിജീത് ദീപ്‌കെ പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമർശനമുന്നയിക്കുകയും ഗ്യാനേഷ് കുമാറിനെ പുറത്താക്കിയില്ലെങ്കിൽ ജയിലുകൾ നിറയ്ക്കുമെന്ന് മുന്നറിയിപ്പ് നൽകുകയും ചെയ്തു.

​2024-ലെ ലോക്‌സഭാ തെരഞ്ഞെടുപ്പിന് ശേഷമുള്ള എസ്‌ഐആർ നടപടിയിലൂടെ രാജ്യത്താകെ 13 മുതൽ 14 ശതമാനം വരെയുള്ള വോട്ടർമാരുടെ പേരുകൾ നീക്കം ചെയ്തെന്നും, എൻഡിഎയും പ്രതിപക്ഷവും തമ്മിലുള്ള വോട്ട് വ്യത്യാസം രണ്ട് ശതമാനം മാത്രമായിരുന്ന സാഹചര്യത്തിൽ ഇത് ഫലങ്ങളെ സ്വാധീനിക്കുമെന്നും അദ്ദേഹം ആരോപിച്ചു. ഡൽഹിയിൽ അരവിന്ദ് കെജ്രിവാളിന്റെ മണ്ഡലത്തിൽ നിന്ന് 40,000 വോട്ടുകളും, തമിഴ്‌നാട്ടിൽ ഒരു ലക്ഷവും, ബംഗാളിൽ 50,000 വോട്ടുകളും നീക്കം ചെയ്തതായി ചൂണ്ടിക്കാട്ടിയ ദീപ്‌കെ ബിജെപി സ്വാധീനമേഖലകളിൽ ഇത്തരം വെട്ടിച്ചുരുക്കലുകൾ ഉണ്ടാകാത്തത് എന്തുകൊണ്ടാണെന്നും ചോദിച്ചു. നടി ഷബാന ആസ്മി, തുഷാർ ഗാന്ധി, ശിവസേന (യുബിടി) എംഎൽഎ സാവന്ത് തുടങ്ങിയവർ മുംബൈയിലെ പ്രതിഷേധത്തിൽ പങ്കെടുത്തു.